ତାଳଚେର: ଜଣେ ଯୁବତୀଙ୍କୁ ଭଲ ପାଉଥିଲେ ୨ ଯୁବକ। ଆଉ ଏହି ତ୍ରିକୋଣୀୟ ପ୍ରେମ କାହାଣୀରେ ବଳି ପଡ଼ିଗଲେ ଜଣେ ଯୁବକ। ଟ୍ରକ୍‌ ଚଢ଼ାଇ ତାଙ୍କୁ ବୀଭତ୍ସ ଭାବେ ହତ୍ୟା କରିବା ପରେ ଦୁର୍ଘଟଣାର ରୂପ ଦେବାକୁ ଚେଷ୍ଟା କରିଛନ୍ତି ଦୁର୍ବୃତ୍ତ। ତେବେ ଏହି ଲୋମଟାଙ୍କୁରା ହତ୍ୟା ଘଟଣାର ପର୍ଦ୍ଦାଫାସ କରିଛି ତାଳଚେର ପୁଲିସ। କୋଲିୟରି ଥାନା ଅନ୍ତର୍ଗତ ଦେଉଳବେଡ଼ା ଅଞ୍ଚଳର ବିଶ୍ବଜିତ ନାଏକ(୨୫)ଙ୍କ ହତ୍ୟ‌ା ଘଟଣାର ମୁଖ୍ୟ ଅଭିଯୁକ୍ତ ଅନୁଗୁଳ ବଅଁରପାଳ ଥାନା ଶାଳଗାଡ଼ିଆ ଗ୍ରାମର ଆନନ୍ଦ ନାଏକ (୩୩)କୁ ଗିରଫ କରିବା ପରେ ପୁଲିସ ଏହି ରହସ୍ୟମୟ ଘଟଣାରୁ ପରଦା ହଟାଇଛି। ଆଜି ଅଭିଯୁକ୍ତକୁ ନେଇ ଘଟଣାସ୍ଥଳରେ ସିନ୍‌ ରିକ୍ରିଏସନ୍‌ କରିଛି ପୁଲିସ। 

Advertisment

ବୁଧବାର ଅନୁଗୁଳ ଏସ୍‌ପି ରାହୁଲ ଜୈନ ତାଳଚେର ଥାନାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇ କହିଛନ୍ତି, ଗତ ମାସ ୨୭ ତାରିଖ ଦିନ ପ୍ରାୟ ସାଢ଼େ ଗୋଟାଏ ବେଳେ ଦେଉଳବେଡ଼ା ଗ୍ରାମର ଗୁଡ଼ୁ ଓରଫ୍‌ ବିଶ୍ବଜିତ ନାଏକ ନିଖୋଜ ହୋଇ ଯାଇଥିଲେ। ଏ ନେଇ ତାଙ୍କ ବାପା ବିମଳ ନାଏକ କୋଲିୟରି ଥାନାରେ ଏତଲା ଦେଇଥିଲେ। ଅଭିଯୋଗର ୮ ଦିନ ପର୍ଯ୍ୟନ୍ତ ପୁଲିସ ବିଶ୍ବଜିତଙ୍କର କୌଣସି ପତ୍ତା ପାଇ ନଥିବାବେଳେ ୫ ତାରିଖରେ ତାଳଚେର ଥାନା ଶିବରାମପୁର ଜଙ୍ଗଲ ନିକଟରେ ତାଙ୍କ ସ୍କୁଟି (ଓଡି୩୫ଜି-୯୫୨୩) ସହିତ ଜାତୀୟ ରାଜପଥ କଡ଼ ନାଳରେ ବିଶ୍ବଜିତଙ୍କ ଗଳିତ ମୃତଦେହ ଠାବ କରାଯାଇଥିଲା। ବିଶ୍ବଜିତଙ୍କୁ ହତ୍ୟା କରି ଦୁର୍ଘଟଣାର ରୂପ ଦିଆଯାଇଛି ବୋଲି ପୁଲିସର ପ୍ରାଥମିକ ଅନୁସନ୍ଧାନରୁ ଏକପ୍ରକାର ସ୍ପଷ୍ଟ ହୋଇ ଯାଇଥିଲା। ଏସ୍‌ଡିପିଓ ଭରତ ଚନ୍ଦ୍ର ସାହୁଙ୍କ ତତ୍ତ୍ବାବଧାନରେ ୩ଟି ଥାନାର ଅଧିକାରୀ ମାମଲାର ଖୋଳତାଡ଼ କରିଥିଲେ।  

ରାସ୍ତା ପାର୍ଶ୍ବକୁ ଶବ, ସ୍କୁଟି ଫିଙ୍ଗି ଦୁର୍ଘଟଣାର ରୂପ ଦେବାକୁ ଚେଷ୍ଟା
ବ୍ୟବହାର କରିଥିଲେ ନକଲି ସିମ୍‌, ନୂଆ ମୋବାଇଲ୍‌

ତଦନ୍ତରୁ ଜଣାଯାଇଥିଲା, ବିଶ୍ବଜିତଙ୍କୁ ହତ୍ୟା କରିବାର ମୁଖ୍ୟ କାରଣ ହେଉଛି ପ୍ରେମ ସମ୍ପର୍କ। ଜଣେ ଯୁବତୀଙ୍କ ସହ ପ୍ରେମ ସମ୍ପର୍କକୁ କେନ୍ଦ୍ର କରି ଆନନ୍ଦ ନାଏକ, ତା’ର ସହଯୋଗୀ ସତ୍ୟପ୍ରକାଶ ନାଏକ ଓରଫ ନନ୍ଦୁ ସହିତ ବିଶ୍ବଜିତକଙ୍କ ମନୋମାଳିନ୍ୟ ଥିଲା। ତେଣୁ ଉଭୟ ବିଶ୍ବଜିତଙ୍କୁ ଅପହରଣ ଓ ହତ୍ୟା କରିବା ପାଇଁ ଷଡ଼୍‌ଯନ୍ତ୍ର କରିଥିଲେ। ତାଙ୍କୁ ଏହି କାମରେ ଆଉ ୨ ଜଣ ସହଯୋଗ କରିଥିଲେ। ଏକ ବେନାମି ସିମ୍‌ ଓ ଏକ ନୂଆ ମୋବାଇଲ୍‌ ବ୍ୟବହାର କରି ତାଙ୍କୁ ଡାକିବା ପରେ ଏକ କାର୍‌ (ଓଡି୩୩କ୍ୟୁ-୮୯୮୯)ରେ ଅପହରଣ କରି ନେଇଥିଲେ। ସନ୍ଧ୍ୟା ପରେ ସେମାନେ ବିଶ୍ବଜିତଙ୍କୁ ଶିବରାମପୁର ଗାଁ ପାଖକୁ ନେଇଥିଲେ। ସେଠାରେ ଥିବା ଏକ କୋଇଲା ବୋଝେଇ ଟ୍ରକ୍‌ ପଛ ଚକ ତଳେ ତାଙ୍କୁ ଶୁଆଇ ଦେଇଥିଲେ। ପରେ ଟ୍ରକ୍‌ରେ ଶୋଇଥିବା ଚାଳକଙ୍କୁ ନିଦରୁ ଉଠାଇ ମାଡ଼ପିଟ୍ କରି ଭୟଭୀତ କରିଥିଲେ। ସେଠାରୁ ସଙ୍ଗେ ସଙ୍ଗେ ଟ୍ରକ୍‌କୁ ନେଇ ପଳାଇବାକୁ ଧମକ ଦେଇଥିଲେ। ଭୟଭୀତ ଟ୍ରକ୍‌ ଚାଳକ ଗାଡ଼ି ଷ୍ଟାର୍ଟ କରି ପଳାଇଯିବାରୁ ଟ୍ରକ୍‌ଟି ବିଶ୍ବଜିତଙ୍କ ମୁଣ୍ଡ ଓ ଶରୀରର କିଛି ଅଂଶରେ ଚଢ଼ି ଯାଇଥିଲା। ପରେ ଏହାକୁ ଦୁର୍ଘଟଣାର ରୂପ ଦେବା ପାଇଁ ଅଭିଯୁକ୍ତମାନେ ରାସ୍ତାକଡ଼ ନାଳରେ ବିଶ୍ବଜିତଙ୍କ ସ୍କୁଟି ଓ ମୃତଦେହକୁ ଫିଙ୍ଗି ଦେଇଥିଲେ।  

ତଦନ୍ତ ଅଧିକାରୀ ଏସ୍‌ଆଇ ପୁଲିନ କୁମାର ପ୍ରଧାନ ଘଟଣା ସଂପର୍କରେ ତାଳଚେର ଥାନା ଅଧିକାରୀଙ୍କୁ ଜଣାଇବା ପରେ ଅଭିଯୁକ୍ତ ଆନନ୍ଦ ବିରୋଧରେ ବିଏନ୍‌ଏସ୍ ୧୦୩(୧)/୨୩୮-ଏ/୬୧(୨)ରେ ତାଳଚେର ଥାନାରେ ୩୮୭/୨୫ରେ ଏକ ମାମଲା ରୁଜୁ ହୋଇଛି। ଆନନ୍ଦକୁ ପୁଲିସ ଗିରଫ କରିଥିବାବେଳେ ଏହି ଘଟଣାରେ ବ୍ୟବହୃତ ହୋଇଥିବା କାର୍‌କୁ ମଧ୍ୟ ଜବତ କରିଛି। ଅନ୍ୟ ଅଭିଯୁକ୍ତଙ୍କୁ ଖୁବ୍‌ଶୀଘ୍ର ଗିରଫ କରାଯିବ ବୋଲି ଏସ୍‌ପି ଶ୍ରୀ ଜୈନ କହିଛନ୍ତି।