ବୁଲାଗୋରୁଙ୍କ ସହ ଧକ୍କା: ୧୬୦୧ ଲୋକ ମଲେଣି, ୩୩୧ ପଶୁ ବି ମରିଛନ୍ତି

ଭୁବନେଶ୍ୱର: ସଡ଼କ ଦୁର୍ଘଟଣାରେ ଯେତିକି ଜୀବନ ବର୍ଷକୁ ଯାଉଛି ତା’ର ୯.୨୨% କେବଳ ବୁଲା ଗାଈଗୋରୁଙ୍କ (ଗାଈ, ଷଣ୍ଢ, କୁକୁର) ପାଇଁ ଯାଉଛି। ଅର୍ଥାତ୍ ଗତ ୩ ବର୍ଷରେ (୨୦୨୨ରୁ ୨୦୨୪ ପର୍ଯ୍ୟନ୍ତ) ସଡ଼କ ଦୁର୍ଘଟଣାରେ ୧୭୩୪୮ ଜଣଙ୍କର ମୃତ୍ୟୁ ହୋଇଥିବା ବେଳେ ଏଥିରୁ ୧୬୦୧ ଜଣଙ୍କ ଜୀବନ ବୁଲା ଗାଈଗୋରୁଙ୍କ ସହ ଧକ୍କାରେ ଯାଇଛି। ଯାହା ଏବେ ଓଡ଼ିଶା ପାଇଁ ବଡ଼ ସମସ୍ୟା ପାଲଟିଛି। ରାସ୍ତା ଡିଜାଇନ୍ ଯେତେ ଭଲ ଥିଲେ ବି, ଲୋକ ଯେତେ ସତର୍କତାର ସହ ଗାଡ଼ି ଚଳାଇଲେ ବି ହଠାତ୍ ବୁଲା ଗାଈଗୋରୁ ଗାଡ଼ି ଆଗକୁ ଆସି ଜୀବନ ନେଇଯାଉଛନ୍ତି। ଦୁର୍ଘଟଣା କମାଇବାକୁ ରାଜ୍ୟ ସରକାର ରାସ୍ତା ଡିଜାଇନ୍‌ରେ ବ୍ୟାପକ ପରିବର୍ତ୍ତନ ଆଣୁଥିଲେ ହେଁ ବୁଲା ଗାଈଗୋରୁଜନିତ ଦୁର୍ଘଟଣା ମୃତ୍ୟୁକୁ ଅଟକାଇପାରୁନାହାନ୍ତି।

ବାଣିଜ୍ୟ ଓ ପରିବହନ ବିଭାଗର ତଥ୍ୟରୁ ଜାଣିବାକୁ ମିଳିଛି ଯେ ୨୦୨୨ମସିହାରେ ରାଜ୍ୟରେ ୧୧,୬୬୩ଟି ସଡ଼କ ଦୁର୍ଘଟଣା ହୋଇଥିବାବେଳେ ୫,୪୬୭ ଜଣଙ୍କର ମୃତ୍ୟୁ ହୋଇଥିଲା ଏବଂ ୧୦,୩୦୨ ଜଣ ଆହତ ହୋଇଥିଲେ। ବିଡ଼ମ୍ବନାର ବିଷୟ ଏଥିରୁ ବୁଲା ଗାଈଗୋରୁଙ୍କ ଯୋଗୁ ୯୫୨ଟି ଦୁର୍ଘଟଣା ହୋଇଥିବାବେଳେ ୫୨୧ଜଣଙ୍କର ମୃତ୍ୟୁ ହୋଇଥିଲା। ୨୦୨୩ରେ ସ୍ଥିତି ଆହୁରି ସଙ୍ଗିନ ଥିଲା। ରାଜ୍ୟରେ ମୋଟ୍ ୧୧,୯୯୨ଟି ସଡ଼କ ଦୁର୍ଘଟଣା ହୋଇଥିବାବେଳେ ଏଥିରେ ୫,୭୩୯ଜଣଙ୍କର ମୃତ୍ୟୁ ହୋଇଥିଲା ଏବଂ ୧୦,୩୬୯ଜଣ ଆହତ ହୋଇଥିଲେ। ଏଥିରୁ ୧,୧୬୮ଟି ଦୁର୍ଘଟଣା ବୁଲା ଗାଈଗୋରୁଙ୍କ ଯୋଗୁ ହୋଇଥିଲା। ଏଥିରେ ୬୪୩ ଜଣ ମରିଥିଲେ। ୨୦୨୪ରେ ୧୨,୩୭୫ଟି ସଡ଼କ ଦୁର୍ଘଟଣା ହୋଇଥିବାବେଳେ ୬,୧୪୨ଜଣଙ୍କ ଜୀବନ ଯାଇଥିଲା ଏବଂ ୧୦,୭୭୦ଜଣ ଆହତ ହୋଇଥିଲେ। କିନ୍ତୁ ଏହି ବର୍ଷ ବୁଲା ଗାଈଗୋରୁଙ୍କ ଯୋଗୁ ୯୦୩ଟି ଦୁର୍ଘଟଣା ହୋଇଥିବାବେଳେ ୪୩୭ଜଣଙ୍କର ମୃତ୍ୟୁ ହୋଇଛି। ଏହି ୩ବର୍ଷରେ ଏହିଭଳି ଦୁର୍ଘଟଣାଜନିତ ଆହତଙ୍କ ସଂଖ୍ୟା ୩ ହଜାରରୁ ଅଧିକ ବୋଲି ଜଣାପଡ଼ିଛି। କେବଳ ମଣିଷ ମରିନାହାନ୍ତି, ୨୦୨୨ରୁ ୨୦୨୫ (ଅଗଷ୍ଟ ମାସ) ସୁଦ୍ଧା ୩୩୧ଟି ପଶୁଙ୍କର ଜୀବନ ବି ଯାଇଛି।