ଜାଣନ୍ତୁ ଆସନ୍ତାକାଲି ଠାରୁ କେଉଁ ବ୍ୟାବସାୟିକ ପ୍ରତିଷ୍ଠାନ ଖୋଲା ରହିବ
ବ୍ୟାଙ୍କିଂ ସେବା ଜାରି ରହିବ
ଭୁବନେଶ୍ବର : ମେ ମାସ ୩ ତାରିଖ ରାତି ୧୨ଟା ପର୍ଯ୍ୟନ୍ତ ସାରା ଦେଶରେ ଲକ୍ ଡାଉନ୍ ତାଲାବନ୍ଦ ଜାରି ରହିବ। ଚଳିତମାସ ୨୦ ତାରିଖରୁ କରୋନା ସଂକ୍ରମଣ ନିୟନ୍ତ୍ରଣରେ ଥିବା ଅଞ୍ଚଳ ଓ ରାଜ୍ୟମାନଙ୍କରେ ଯାତାୟତ ଉପରେ କିଛିଟା କଟକଣା କୋହଳ କରିବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ଏ ନେଇ କେନ୍ଦ୍ର ସ୍ବରାଷ୍ଟ୍ର ବିଭାଗର ନିର୍ଦ୍ଦେଶ ପରେ ରାଜ୍ୟ ସରକାରଙ୍କ ରାଜସ୍ବ ବିଭାଗ ବିସ୍ତୃତ ମାର୍ଗଦର୍ଶିକା ଜାରି କରିଛି। ଏହି ଅନୁସାରେ ଆସନ୍ତୁ ଜାଣିବା କେଉଁ ବ୍ୟାବସାୟିକ ପ୍ରତିଷ୍ଠାନ ଖୋଲା ରହିବ।
Sambad is now on WhatsApp
Join and get latest news updates delivered to you via WhatsApp
-ପିଡିଏସ୍ ରାସନ୍ ଦୋକାନ, ଖାଦ୍ୟ ସାମଗ୍ରୀ ବିକ୍ରି କରୁଥିବା ତେଜରାତି ଦୋକାନ, ଫଳ ଦୋକାନ, ଦୁଗ୍ଧ ଓ ଦୁଗ୍ଧଜାତୀୟ ଜିନିଷ ବିକ୍ରି, ମାଛ ଓ ମାଂସ, ପ୍ରାଣୀ ଖାଦ୍ୟ, ଗୋଖାଦ୍ୟ, ସାର, କୀଟନାଶକ ସାମଗ୍ରୀର ପରିବହନ, ଭଣ୍ଡାର ଓ ବିକ୍ରି ହେବ। ଏଥିପାଇଁ ଲୋକଙ୍କ ଯିବାଆସିବା ଦୂର କରିବାକୁ ଜିଲ୍ଲା ପ୍ରଶାସନ ଘରେ ପହଞ୍ଚାଇବା ପାଇଁ ବ୍ୟବସ୍ଥା କରିପାରିବେ।
-ଢାବା ଓ ଖାଦ୍ୟ ପ୍ରସ୍ତୁତ କରୁଥିବା ହୋଟେଲ୍ଗୁଡ଼ିକ ଘରକୁ ଖାଦ୍ୟ ପାର୍ସଲ୍ ଦେବେ। କୌଣସି ବି ପରିସ୍ଥିତିରେ ଢାବା ଓ ହୋଟେଲ୍ରେ ଲୋକେ ଖାଇବେ ନାହିଁ
-ଅନ୍ଲାଇନ୍ ଇ-ମାର୍କେଟ୍ ସଂସ୍ଥା ଆମାଜନ୍, ଫ୍ଲିପ୍କାର୍ଟ, ବ୍ଲୁ ଡାର୍ଟ କୋରିୟର, ଡିଟିଡିସି, ବିଗ୍ ବାସ୍କେଟ୍, ଗ୍ରୋଫର୍ସ, ଅର୍ବାନ୍ କ୍ଲାପ୍, ଜୋମାଟୋ, ମିନ୍ତ୍ରା, ସ୍ବିଗି, କେଏଫ୍ସି, ପିଜା ହଟ୍, ଡୋମିନସ୍, ଉବେର୍ ଇଟ୍ସ୍ ଆଦି ସଂସ୍ଥା ଲୋକଙ୍କୁ ଘରେ ଜିନିଷ ପହଞ୍ଚାଇପାରିବେ
-ଇ-କର୍ମର୍ସ ବ୍ୟବସ୍ଥାରେ ବି ସାମଗ୍ରୀ ଘରେ ଯୋଗାଇଦିଆଯିବ
-ତେଜରାତି ଜିନିଷ ଯୋଗାଉଥିବା ବିଗ୍ ବଜାର, ରିଲାୟେନ୍ସ୍ ଫ୍ରେସ୍, ଓମ୍ଫେଡ୍, ଓପୋଲେଫେଡ୍, ଚିଲିକା ଫ୍ରେସ୍, ସ୍ପେନ୍ସର୍ସ୍ ଭଳି ସଂସ୍ଥାମାନେ ଘରେ ଜିନିଷ ପହଞ୍ଚାଇପାରିବେ
-ଖୋର୍ଦ୍ଧା, ଭଦ୍ରକ, ସୁନ୍ଦରଗଡ଼, କେନ୍ଦ୍ରାପଡ଼ା, କଟକ, ପୁରୀ, ଯାଜପୁର, କଳାହାଣ୍ଡି ଏବଂ ଢେଙ୍କାନାଳ ସହରରେ ବ୍ୟାଙ୍କ ଓ ଇନ୍ସୁରାନ୍ସ୍ କମ୍ପାନିମାନେ ସେମାନଙ୍କ ଅଫିସରେ ୫୦% କର୍ମଚାରୀ ନିୟୋଜିତ କରିପାରିବେ
-ସମସ୍ତ ମୁଦ୍ରିତ ଓ ବୈଦୁତିକ ଗଣମାଧ୍ୟମ ବି ଚାଲୁ ରହିବ
-ଡାଟା କଲ୍ ସେଣ୍ଟର ସହିତ ସମସ୍ତ ଆଇଟି, ଆଇଟି ସମ୍ବନ୍ଧୀୟ ସେବା ଚାଲୁ ରହିବ
-ଟେଲିକମ୍ୟୁନିକେସନ୍, ଇଣ୍ଟରନେଟ୍ ସେବା, ଡିଟିଏଚ୍ ସେବା ପ୍ରଦାନକାରୀ ଅଫିସ୍ ଖୋଲା ରହିବ
-ରାଜ୍ୟ ସରକାରଙ୍କ ଦ୍ବାରା ନିଯୁକ୍ତ ଜନ ସେବା କେନ୍ଦ୍ରଗୁଡ଼ିକ ବି ଖୋଲା ହେବ
-ଶୀତଳଭଣ୍ଡାର, ସାଧାରଣ ଭଣ୍ଡାର ଗୃହ ସମେତ ବନ୍ଦର, ରେଳଷ୍ଟେସନ୍ରେ ଭଣ୍ଡାର, କଣ୍ଟେନର୍ ଡିପୋ, ବ୍ୟକ୍ତିଗତ ୟୁନିଟ୍ ଓ ଅନ୍ୟାନ୍ୟ ଷ୍ଟୋର ହାଉସଗୁଡ଼ିକ ଖୋଲା ରହିବ
-ନିରାପତ୍ତା ସେବା ଯୋଗାଉଥିବା ଘରୋଇ ସୁରକ୍ଷା ସଂସ୍ଥା ଓ ଆବାସିକ ରକ୍ଷଣାବେକ୍ଷଣ ସେବା ଯୋଗାଉଥିବା ସଂସ୍ଥାଗୁଡ଼ିକ କାର୍ଯ୍ୟ କରିବେ
-ତାଲାବନ୍ଦ ଯୋଗୁଁ ବାହାର ଦେଶ ଓ ବାହାର ରାଜ୍ୟର ପର୍ଯ୍ୟଟକମାନଙ୍କୁ ରଖିଥିବା ହୋଟେଲ୍ଗୁଡ଼ିକ ଖୋଲା ହେବ
-ପାଇପ୍ ମିସ୍ତ୍ରୀ, ଇଲେକ୍ଟ୍ରିସିଆନ୍, ବୈଦୁତିକ ମରାମତି, ମୋବାଇଲ୍ ମରାମତି, ଏୟାର କୁଲର୍, ଓ୍ବାଟର୍ ପିଉରିଫାୟର୍, ଏୟାର୍ କଣ୍ଡିସନର୍ ଓ କମ୍ପ୍ୟୁଟର୍ ପାର୍ଟସ୍ ବିକ୍ରି କରୁଥିବା ଦୋକାନଗୁଡ଼ିକ ଖୋଲା ହେବ
-ସିମେଣ୍ଟ, ଛଡ଼, ଚିପ୍ସ୍ ଭଳି ନିର୍ମାଣ ସାମଗ୍ରୀ ବିକ୍ରି କରୁଥିବା ଦୋକାନ ବି ଖୋଲା ରହିବ
-ଟ୍ରକ୍ ମରାମତି ଗ୍ୟାରେଜ୍, ଜାତୀୟ ରାଜପଥରେ ଢାବାଗୁଡ଼ିକ ସାମାଜିକ ଦୂରତା ରକ୍ଷା କରି ବ୍ୟବସାୟ କରିବେ
ବ୍ୟାଙ୍କିଂ ସେବା ଜାରି ରହିବ
-ଆରବିଆଇ ନିୟନ୍ତ୍ରିତ ଆର୍ଥିକ ସଂସ୍ଥା ଏନ୍ପିସିଆଇ, ସିସିଆଇଏଲ୍ ଦ୍ବାରା ଅର୍ଥ ପଇଠ ବ୍ୟବସ୍ଥା ଜାରି ରହିବ
-ଏଟିଏମ୍, ବ୍ୟାଙ୍କିଂ ସେବାରେ ନିୟୋଜିତ ଆଇଟି ଭେଣ୍ଡର୍ସ୍, ବିଜିନେସ୍ କଲେଜ୍ପଣ୍ଡେଣ୍ଟ୍, ଏଟିଏମ୍ ଅପରେଟର୍ସ୍ ଓ ନଗଦ ପରିଚାଳନା କରୁଥିବା ଏଜେନ୍ସିଜ୍ଗୁଡ଼ିକ କାର୍ଯ୍ୟ କରିବେ
-ବ୍ୟାଙ୍କିଂ ସେବା ଚାଲୁ ରଖିବା ପାଇଁ ସ୍ଥାନୀୟ ପ୍ରଶାସନ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା ଯୋଗାଇଦେବେ
-ଆଇଆର୍ଡିଏ ଅଧୀନରେ ଥିବା ଇନ୍ସୁରାନ୍ସ କମ୍ପାନିଗୁଡ଼ିକ ଖୋଲା ରହିବ
-ସେହିପରି ସିକ୍ୟୁରିଟିଡ୍ ଆଣ୍ଡ୍ ଏକ୍ସ୍ଚେଞ୍ଜ୍ ବୋର୍ଡ଼ ଅଫ୍ ଇଣ୍ଡିଆ (ସେବି) ବିଜ୍ଞପ୍ତି ପ୍ରକାଶ କରିଥିବା ଅର୍ଥ ଲଗାଣକାରୀ ସଂସ୍ଥାଗୁଡ଼ିକ ମଧ୍ୟ କାର୍ଯ୍ୟ କରିବେ
-ଅଣବ୍ୟାଙ୍କିଂ ସଂସ୍ଥା ଯେପରିକି ଗୃହ ଋଣ ଯୋଗାଣ ସଂସ୍ଥା ଓ ମାଇକ୍ରୋ ଫାଇନାନ୍ସ ସଂସ୍ଥାଗୁଡ଼ିକ ଖୁବ୍ କମ୍ କର୍ମଚାରୀରେ ଅଫିସ ଚଳାଇବେ।
-କୋ-ଅପରେଟିଭ୍ କ୍ରେଡିଟ୍ ସୋସାଇଟିଗୁଡ଼ିକ ଖୋଲା ରହିବ