ଭୁବନେଶ୍ୱର: ଦ୍ରୁତ ଜନସଂଖ୍ୟା ବୃଦ୍ଧି ଏବଂ ସେହି ଅନୁସାରେ ଗାଡିମୋଟର ସଂଖ୍ୟା ବୃଦ୍ଧି କାରଣରୁ ଗୋଟିଏ ସ୍ଥାନରୁ ଆଉ ଗୋଟିଏ ସ୍ଥାନକୁ ଯିବା ଆସିବା ପାଇଁ ଅଧିକ ସମୟ ଲାଗୁଛି । ଏହାକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ପକ୍ଷରୁ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ବିଭିନ୍ନ ସମୟରେ ରାଜ୍ୟର ରୋଡ଼ ନେଟୱର୍କ ନେଇ ସମୀକ୍ଷା କରିବା ସହ ବଡ ବଡ ସହର ପାଇଁ ସୁଚିନ୍ତିତ ବାଇପାସ ରାସ୍ତା ନିର୍ମାଣ ପାଇଁ ନିର୍ଦ୍ଦେଶ ଦେଇଛନ୍ତି I ଏହାକୁ ଦୃଷ୍ଟିରେ ରଖି ନିର୍ମାଣ ବିଭାଗ ପକ୍ଷରୁ ବିଭିନ୍ନ ସହର ଉପକଣ୍ଠରେ ବାଇପାସ ରାସ୍ତା ନିର୍ମାଣକୁ ପ୍ରାଧାନ୍ୟ ଦିଆଯାଉଛି I ସେଥିରୁ ଅନେକ ଗୁଡିଏ ରାସ୍ତା ନିର୍ମାଣଧୀନ ଥିବା ବେଳେ ଆଗକୁ ଅଧିକ ବାଇପାସ ରାସ୍ତା ନିର୍ମାଣ ପାଇଁ ସରକାର ଯୋଜନା ପ୍ରସ୍ତୁତ କରିଛନ୍ତି । ଯାହା କେବଳ ସହରର ଭିଡକୁ ହ୍ରାସ କରିବା ତାହା ନୁହେଁ ବରଂ ଗୋଟିଏ ସ୍ଥାନରୁ ଆଉ ଗୋଟିଏ ସ୍ଥାନ କୁ ଯିବା ପାଇଁ ଦୂରତ୍ୱ ଓ ସମୟ ହ୍ରସ କରିବ । ଏହା ଏକ ନୂତନ ବାଣିଜ୍ୟିକ କରିଡର ସୃଷ୍ଟି ସହିତ ଅନେକ ଶିଳ୍ପସଂସ୍ଥାକୁ ଯୋଡିବା ଲାଗି ପଥ ସୁଗମ କରିବ । ଏହା  ପର୍ଯ୍ୟଟନ କ୍ଷେତ୍ର ଓ ବନ୍ଦର ଯୋଗାଯୋଗକୁ ମଧ୍ୟ  ଅଧିକ ସୁଦୃଢ କରିବ ।

Advertisment

ବର୍ତ୍ତମାନ ୧୪୯୨୯୦ .୮୫ ଲକ୍ଷ ବ୍ୟୟ ଅଟକଳରେ ୪୮ କିମି ଦୀର୍ଘ ମୋଟ ୧୦ଟି ବାଇପାସ ନିର୍ମାଣ କାର୍ଯ୍ୟ ଆଗେଇ ଚାଲିଥିବା ବେଳେ ୨୦୨୫-୨୬ ଆର୍ଥିକ ବର୍ଷ ଲାଗି ୨୭୭୯୧.୫୭ ଲକ୍ଷ ବ୍ୟୟ  ଅଟକଳରେ ୩୨ କିମି ଦୀର୍ଘ ମୋଟ ୬ ଟି ବାଇପାସ କାର୍ଯ୍ୟ ପାଇଁ ଅନୁମୋଦିତ ହୋଇଛି । ଏଥିମଧ୍ୟରେ କଟକ ଖାନନଗର ନିକଟ ଏବଂ ଯୋବ୍ରାଠାରେ ୬ ଲେନ ବିଶିଷ୍ଟ ରାସ୍ତା ନିର୍ମାଣ ଚାଲୁଅଛି ଯାହା କଟକ ସହର ଓ ମୁନିସିପାଲ ଅଂଚଳର ଭିଡ ହ୍ରାସ ଏବଂ ଗମନାଗମନକୁ ସମୟକୁ ୬୦ ମିନିଟ ପର୍ଯ୍ୟନ୍ତ ହ୍ରାସ କରିବ । ସେହିପରି ୭.୭ କିମି  ଦୀର୍ଘ ଢେଙ୍କାନାଳ କାମାକ୍ଷାନଗର ବାଇପାସ ରାସ୍ତା ନିର୍ମାଣଧୀନ ରହିଛି ଯାହା ସେଠାରେ ଥିବା ମାର୍କେଟ ଅଂଚଳର ଭିଡକୁ ହ୍ରାସ କରିବା ସହିତ ଯିବା ଆସିବା ସମୟକୁ ୧୫ ମିନିଟ ପର୍ଯ୍ୟନ୍ତ  ହ୍ରାସ କରିବ ।

ନିର୍ମାଣଧୀନ ୧୩ କିଲୋମିଟର ଦୀର୍ଘ ବ୍ରହ୍ମପୁର ରିଂ ରୋଡ ଏହି ଅଞ୍ଚଳର ଭିଡ ହ୍ରାସ ସହ ଯାତ୍ରା ସମୟକୁ ୩୦ ମିନଟ ପର୍ଯ୍ୟନ୍ତ କମ କରିବ । ଝାରସୁଗୁଡା ଜିଲ୍ଲାରେ ୪ ଲେନ ରାସ୍ତା ସହ ସର୍ଭିସ ରୋଡ଼ ଥାଇ ୮ କିମି ଦୀର୍ଘ ବେଲପାହାଡ ବାଇପାସ୍ ରାସ୍ତା ଯାହା ବେଲପାହାଡ ଟାଉନ ଅଂଚଳର ଭିଡ ହ୍ରସ ଦିଗରେ ସହାୟକ ହେବ । ସେହିପରି  ଭବାନିପାଟଣାକୁ ସଂଯୋଗୀକରଣ କରୁଥିବା ୬ କିମି ଦୀର୍ଘ ଲିଙ୍କ ରୋଡ, କେନ୍ଦ୍ରାପଡା ଜିଲାରେ ୪ କିଲୋମିଟର ଦୀର୍ଘ  ପଟ୍ଟାମୁଣ୍ଡାଇ ବାଇପାସ ରାସ୍ତା, କେଉଁଝର ଜିଲ୍ଲାର ଘସିପୁରାଠାରେ ସିଲଂ ବ୍ରହ୍ମଣିପାଲ ବାଇପାସ ରାସ୍ତା  ଏବଂ ଭଙ୍ଗାନଇ ଠାରୁ ମଦନପୁର ଶାଳପଡା ଓ ପଥରପଡା ବାଇପାସ ରୋଡ ଏବଂ ଖୋର୍ଦ୍ଧା ତମାଣ୍ଡ ଛକ ଠାରୁ ପାଇକରାପୁର ଛକ ପର୍ଯ୍ୟନ୍ତ ସାଢେ ୫ କିଲୋମିଟର ଦୀର୍ଘ ଇନର ଭୁବନେଶ୍ୱର ରିଂ ରୋଡ଼ ନିର୍ମାଣ ଚାଲୁଅଛି  । ସହରର ଭିଡ ହ୍ରାସ, ପାଶ୍ୱବର୍ତୀ ଗ୍ରାମକୁ ସଂଯୋଗୀକରଣ ଓ ବାଣିଜ୍ୟ କାରବାରକୁ ଏହା ଗତିଶୀଳ କରିବ  ।