ଭୁବନେଶ୍ବର : ଭାରତର ମହାଲେଖା ନିୟନ୍ତ୍ରକ (ସିଏଜି) ୨୦୧୮-୧୯ ଆର୍ଥିକ ବର୍ଷ ପାଇଁ ଓଡ଼ିଶା ସରକାରଙ୍କ ଆର୍ଥିକ ପ୍ରଦର୍ଶନର ସମୀକ୍ଷା ପ୍ରକାଶ କରିଛନ୍ତି । ରିପୋର୍ଟରେ ରାଜ୍ୟ ସରକାରଙ୍କ ଆର୍ଥିକ ପରିଚାଳନାକୁ ନେଇ ସିଏଜି ସନ୍ତୋଷ ପ୍ରକାଶ କରିଥିଲେ ମଧ୍ୟ କେତେକ କ୍ଷେତ୍ରରେ ପ୍ରଶ୍ନଚିହ୍ନ ଲଗାଇଛନ୍ତି । ବିଶେଷକରି କେତେକ ଅନୁଦାନ ରାଶିର ବିନିଯୋଗ ପ୍ରମାଣପତ୍ର ମିଳିନଥିବାରୁ ତାହା ଠିକ ଭାବେ ଖର୍ଚ୍ଚ ହୋଇଛି କି ନା ତାହାକୁ ନେଇ ସିଏଜି ସଂଦେହ ପ୍ରକଟ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହି ଆର୍ଥିକ ବର୍ଷରେ ରାଜ୍ୟ ସରକାରଙ୍କ ରାଜସ୍ବ ପ୍ରାପ୍ତି ୯୯,୫୪୬ କୋଟି ଟଙ୍କା ଥିଲା, ଯାହାକି ପୂର୍ବ ଆର୍ଥିକ ବର୍ଷ ତୁଳନାରେ ୧୬.୮ ପ୍ରତିଶତ ଅଧିକ ଥିଲା । ଉକ୍ତ ଆର୍ଥିକ ବର୍ଷରେ ସରକାରଙ୍କ ଆୟ ସହ ବ୍ୟୟ ମଧ୍ୟ ବୃଦ୍ଧି ପାଇଥିଲା । ରାଜସ୍ବ ବ୍ୟୟ ପ୍ରାୟ ୧୮.୮୨ ପ୍ରତିଶତ ବୃଦ୍ଧି ପାଇ ୮୫,୩୫୬ କୋଟିରେ ପହଞ୍ଚିଥିଲା । ୨୦୧୮-୧୯ରେ ରାଜ୍ୟ ୧୪,୧୯୦ କୋଟିର ରାଜସ୍ବ ବଳକା ହାସଲ କରିଥିଲା । ୨୦୧୭-୧୮ରେ ରାଜସ୍ବ ବଳକା ରାଜସ୍ବ ପ୍ରାପ୍ତିର ୧୫.୬୯ ପ୍ରତିଶତ ଥିବାବେଳେ ୨୦୧୮-୧୯ରେ ତାହା ୧୪.୨୫ ପ୍ରତିଳତକୁ ଖସିଆସିଥିଲା ।
୨୦୧୮-୧୯ ଆର୍ଥିକ ବର୍ଷରେ ପ୍ରାୟ ୧୩ଟି ଅନୁଦାନ ଅଧିନରେ ଥିବା ୨୭ଟି ସ୍କିମରେ ମୋଟ ୧୩୦୪ କୋଟି ଟଙ୍କା ବିନିଯୋଗ କରାଯାଇପାରିନଥିଲା ଓ ଫେରସ୍ତ ଦିଆଯାଇଥିଲା । ଉକ୍ତ ଆର୍ଥିକ ବର୍ଷରେ ରାଜ୍ୟ ସରକାର ମୋଟ ୨୫୯୫୭ କୋଟି ଟଙ୍କାର ଅନୁଦାନ ପ୍ରଦାନ କରିଥିଲେ । କିନ୍ତୁ ଏହି ରାଶି ମଧ୍ୟରୁ ୧୯,୩୭୧ କୋଟି ବା ୭୫ ପ୍ରତିଶତ ରାଶିର ବିନିଯୋଗ ପ୍ରମାଣପତ୍ର ଦିଆଯାଇନଥିଲା । ଫଳରେ ଉକ୍ତ ରାଶି ଉଦ୍ଦିଷ୍ଟ କାର୍ଯ୍ୟପାଇଁ ବ୍ୟବହାର ହୋଇଛି କି ସେଥିରେ କୌଣସି ଭରସା ନଥିଲା ବୋଲି ସିଏଜି ମନ୍ତବ୍ୟ ଦେଇଛନ୍ତି ।