ଦକ୍ଷତା ବିକାଶର କଳେବର ବଢ଼ିବ: କାର୍ଯ୍ୟକ୍ରମରେ ସାମିଲ ହେେବ ଶିଳ୍ପାନୁଷ୍ଠାନ, କଲେଜ, ମିସନ ଶକ୍ତି
ଜୁଲାଇ ୧୫ରୁ ୩୦ ଜିଲ୍ଲାରେ ବୁଲିବ କୌଶଳ ରଥ, ଓଡ଼ିଶାରେ ନିର୍ମାଣ ହେବ ୧୦ଟି କୌଶଳ ଭବନ
ଭୁବନେଶ୍ୱର: ଦକ୍ଷତା ବିକାଶ କାର୍ଯ୍ୟକ୍ରମ ଆଉ କେବଳ ଛାତ୍ରଛାତ୍ରୀଙ୍କ ଟ୍ରେନିଂ ମଧ୍ୟରେ ସୀମିତ ରହିବ ନାହିଁ। ଏହାକୁ ଶିଳ୍ପାନୁଷ୍ଠାନ, ମହାବିଦ୍ୟାଳୟ ଓ ମିସନ ଶକ୍ତି ପରିସରଭୁକ୍ତ କରିବା ଉପରେ ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ ଗୁରୁତ୍ୱାରୋପ କରିଛନ୍ତି। ବିଭାଗର ସମୀକ୍ଷା କରିବା ଅବସରରେ ମନ୍ତ୍ରୀ ଶ୍ରୀ ସ୍ୱାଇଁ କହିଛନ୍ତି ଯେ ଶିଳ୍ପାନୁଷ୍ଠାନ ଓ କମ୍ପାନିଗୁଡ଼ିକରେ ଓଡ଼ିଆ ଛାତ୍ରଛାତ୍ରୀଙ୍କ ଯୋଗଦାନ ପୂର୍ବରୁ ସେମାନଙ୍କୁ ସୁଦକ୍ଷ କରାଯିବ। କମ୍ପାନି ଓ ଶିଳ୍ପାନୁଷ୍ଠାନ ବୁଝାମଣାପତ୍ରରେ ଓଡ଼ିଆ ଯୁବକଯୁବତୀଙ୍କୁ ସେମାନଙ୍କ ଅନୁଷ୍ଠାନଗୁଡ଼ିକରେ ନିଯୁକ୍ତି ସୁଯୋଗ ପାଇଁ ଚୁକ୍ତିବଦ୍ଧ ହେଉଥିବାବେଳେ ଯୋଗ୍ୟ ପ୍ରାର୍ଥୀମାନେ କୁଶଳୀ ହେବା ନିହାତି ଜରୁରୀ। ସ୍ଥଳ ବିଶେଷରେ କମ୍ପାନି ଓ ଶିଳ୍ପାନୁଷ୍ଠାନଗୁଡ଼ିକୁ ମଧ୍ୟ ଉପଯୁକ୍ତ ଟ୍ରେନର ଓ ଭିତ୍ତିଭୂମି ଯୋଗାଇ ଦେବାକୁ ଚୁକ୍ତି କରାଯାଇପାରିବ। ଭିଏତ୍ନାମ, ସୁଇଜରଲାଣ୍ଡ ଓ ସିଙ୍ଗାପୁର ପରି ଅଞ୍ଚଳରେ ଦକ୍ଷତା ବିକାଶ ଉନ୍ନତ ହୋଇଥିବାରୁ ସେମାନଙ୍କ ଉତ୍ପାଦିକତା ମଧ୍ୟ ତୁଳନାତ୍ମକ ଭାବେ ଅଗ୍ରଣୀ ଭୂମିକା ନେଇଛି। ତେଣୁ ମହାବିଦ୍ୟାଳୟରେ ପାଠପଢ଼ା ସମୟରେ ଛାତ୍ରଛାତ୍ରୀ ଓ ପାଠପଢ଼ା ସମୟ ବାହାରେ ଯୁବକ ଯୁବତୀଙ୍କୁ ଦକ୍ଷତା ବିକାଶ କାର୍ଯ୍ୟକ୍ରମରେ ସାମିଲ କରାଯାଇପାରିବ। ମିସନ ଶକ୍ତି ଓ ଆପ୍ରେଣ୍ଟିସିପ୍ ସହ ଦକ୍ଷତା ବିକାଶ ଟ୍ରେନିଂକୁ ଯୋଡ଼ିବାର ବହୁତ ଆବଶ୍ୟକତା ରହିଛି ବୋଲି ମନ୍ତ୍ରୀ ଶ୍ରୀ ସ୍ୱାଇଁ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଉଚ୍ଚ ଶିକ୍ଷାନୁଷ୍ଠାନ ଛାତ୍ରଛାତ୍ରୀଙ୍କୁ ଦକ୍ଷତା ବିକାଶ ଓ ବୈଷୟିକ ଶିକ୍ଷା ସମ୍ପର୍କରେ ସଚେତନତା କରିବାକୁ ୩୦ ଜିଲ୍ଲାର ଉଚ୍ଚ ଶିକ୍ଷାନୁଷ୍ଠାନରେ ୩୦ଟି ସ୍କିଲ୍-ହବ ପରିଚାଳନା କରାଯିବ। ଜୁଲାଇ ୧୫ରେ ‘ବିଶ୍ୱ ଯୁବ ଦକ୍ଷତା ଦିବସ’ ଅବସରରେ ଦୁଇଟି କୌଶଳ ରଥ ୩୦ଟି ଜିଲ୍ଲା ଅତିକ୍ରମ କରିବ। ଏହାବ୍ୟତୀତ ସ୍ୱଳ୍ପ ଅବଧି ଭିତ୍ତିକ ଦକ୍ଷତା କାର୍ଯ୍ୟକ୍ରମ, ଆଇଟିଆଇ, ପଲିଟେକ୍ନିକ୍, ବିଶ୍ୱ ଦକ୍ଷତା କେନ୍ଦ୍ର ଓ ଉଚ୍ଚତର ବୈଷୟିକ ଶିକ୍ଷା ସଂସ୍ଥାନଗୁଡ଼ିକରେ ଦିଆଯାଉଥିବା କାର୍ଯ୍ୟକ୍ରମ ଦୃଶ୍ୟ-ଶ୍ରାବ ଯନ୍ତ୍ର ମାଧ୍ୟମରେ ପ୍ରଚାର କରାଯିବ। ଯୁବକମାନଙ୍କୁ ଆତିଥେୟତା ପ୍ରଶିକ୍ଷଣ ପାଇଁ ବିଶ୍ୱ ଦକ୍ଷତା କେନ୍ଦ୍ରଠାରେ ପ୍ରଥମ କୌଶଳ ଭବନ ନିର୍ମାଣ କରାଯାଉଛି। ମୋଟ ଉପରେ ୧୦ଟି କୌଶଳ ଭବନ ନିର୍ମାଣ ହେବ।
ଏହି ଭବନରେ ରୋଷେଇ ବିଜ୍ଞାନ, ଖାଦ୍ୟ ଓ ପାନୀୟ, ଗୃହରକ୍ଷୀ ସେବା ଏବଂ ଫ୍ରଣ୍ଟ୍ ଅଫିସ୍ ଆସୋସିଏଟ୍ ପାଠ୍ୟକ୍ରମରେ ପ୍ରଶିକ୍ଷଣ ପାଇଁ ସୁବିଧା ରହିବ। ବାର୍ଷିକ ୪୦୫ ଜଣ ଯୁବକଙ୍କୁ ଏହି ଭବନରେ ଦକ୍ଷ କରିବାର କ୍ଷମତା ରହିଛି। ମୁଖ୍ୟମନ୍ତ୍ରୀ ଦକ୍ଷତା ବିକାଶ ଫେଲୋସିପ୍ କାର୍ଯ୍ୟକ୍ରମ ଓ ଜାତୀୟ ଶୈକ୍ଷିକ ରୢାଙ୍କିଙ୍ଗ୍ ଫ୍ରେମ୍ୱାର୍କ ସମ୍ପର୍କରେ ବୈଠକରେ ଆଲୋଚନା ହୋଇଛି। ବିଭାଗର ପ୍ରମୁଖ ଶାସନ ସଚିବ ଉଷା ପାଢ଼ୀ ବୈଠକରେ ଉପସ୍ଥିତ ରହି ସମସ୍ତ ତଥ୍ୟ ସମ୍ପର୍କରେ ମନ୍ତ୍ରୀଙ୍କୁ ଅବଗତ କରାଇଥିଲେ।