ବୃଦ୍ଧବ୍ୟକ୍ତିଙ୍କୁ ଧକ୍କା ଦେଇ ଇଲେକ୍ଟ୍ରି ଖୁଣ୍ଟ ଭାଙ୍ଗିଲେ କାର ଚାଳକ
ବାଲିପାଟଣା : ଭୁବନେଶ୍ୱର ଉପକଣ୍ଠ ସରଦେଇପୁର ବାଲିପାଟଣା ରାସ୍ତାର ମଧୁବନ ଛକଠାରେ କାର ଦୁର୍ଘଟଣାଗ୍ରସ୍ତ ହୋଇଛି | ଜଣେ ବୃଦ୍ଧ ବ୍ୟକ୍ତିଙ୍କୁ ଧକ୍କା ଦେବା ପରେ ଇଲେକ୍ଟ୍ରି ଖୁଣ୍ଟ ଭାଙ୍ଗିଦେଇଛନ୍ତି କାର ଚାଳକ | ଦୁର୍ଘଟଣାରେ ଗାରେଡିପାଞ୍ଚଣର ରାଧାକୃଷ୍ଣ ପରିଡା (୭୫) ଗୁରୁତର ଆହତ ହୋଇଥିବା ଜଣା ପଡ଼ିଛି | ତାଙ୍କୁ ପ୍ରଥମେ ବାଲିପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା | ସ୍ୱାସ୍ଥ୍ୟ ଅବସ୍ଥାରେ ସୁଧାର ନ ଆସିବାରୁ ୧୦୮ ଆମ୍ବୁଲାନ୍ସ ଯୋଗେ ତାଙ୍କୁ କ୍ୟାପିଟାଲ ହସ୍ପିଟାଲ ପଠାଇ ଦିଆଯାଇଛି | କାର ଚାଳକ ମଧ୍ୟ ଆହତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି |
Sambad is now on WhatsApp
Join and get latest news updates delivered to you via WhatsApp
ସୂଚନାରୁ ପ୍ରକାଶ, ଆଜି ଦିନ ୧୧.୩୦ ସମୟରେ ବାଲିପାଟଣା ଛକ ଅଭିମୁଖେ ଏକ ନାଲି ରଙ୍ଗର କ୍ରେଟା ଗାଡି ନମ୍ବର ଓଡି ୦୨ ଏଏକ୍ସ ୨୦୫୬ ଯାଉଥିଲା | ରାଧାକୃଷ୍ଣ ଆଖଣ୍ଡଳମଣି ମନ୍ଦିରରୁ ପୂଜା ସାରି ଘରକୁ ଫେରୁଥିବା ବେଳେ ହଠାତ କାର ତାଙ୍କୁ ଧକ୍କା ଦେବାରୁ ସେ ରାସ୍ତାରେ ଛିଟିକି ପଡିଥିଲେ | ଦୁର୍ଘଟଣା ପରେ ତାଙ୍କ ମୁଣ୍ଡରେ ଆଘାତ ଲାଗିଛି | ବୃଦ୍ଧଙ୍କୁ ଧକ୍କା ଦେବା ପରେ ଗାଡ଼ି ରାସ୍ତା କଡ଼ ଇଲକ୍ଟ୍ରି ଖୁଣ୍ଟକୁ ଧକ୍କା ଦେଇ ରାସ୍ତା କଡ଼କୁ ପଶିଯାଇଥିଲା | ଖୁଣ୍ଟ ଭାଙ୍ଗିବା ସମୟରେ ତାରରେ ବିଦ୍ୟୁତ ସଂଯୋଗ ଥିବାରୁ ପ୍ରଥମେ ଲାଇନ କଟା ଯାଇଥିଲା। ଏହା ପରେ ଖୁଣ୍ଟକୁ ରାସ୍ତାରୁ ହଟା ଯାଇଛି | ଗାଡ଼ି ଚାଳକଙ୍କ ନାମରେ ଥାନାରେ ଅଭିଯୋଗ ଦିଆଯିବ ବୋଲି ବିଦ୍ୟୁତ ବିଭାଗ ଯନ୍ତ୍ରୀ ମଦନ ମୋହନ ଜେନା ସୂଚନା ଦେଇଛନ୍ତି | ବାଲିପାଟଣା ପୁଲିସ ଘଟଣାର ତଦନ୍ତ ଆରମ୍ଭ କରିଛି |