ଶ୍ରୀକଲାଘାଟିରେ କାର୍‌ ଦୁର୍ଘଟଣା: ଅଭିନେତା ଅଭିଷେକ, ଅଭିନେତ୍ରୀ ସାୟଲ ଆହତ

ଘୁ.ଉଦୟଗିରି: କନ୍ଧମାଳ ଜିଲ୍ଲା ଘୁ.ଉଦୟଗିରି ନିକଟ ଶ୍ରୀକଲାଘାଟିରେ କାର୍‌ ଦୁର୍ଘଟଣାରେ ଅଭିନେତା ଅଭିଷେକ ଗିରି (ବାଲେଶ୍ୱର), ଅଭିନେତ୍ରୀ ସାୟଲ ମୁଖାର୍ଜୀ (ପଟିଆ, ଭୁବନେଶ୍ୱର) ଓ ସହଯୋଗୀ ସୁନୀଲ ପଟ୍ଟନାୟକ (ଭୁବନେଶ୍ୱର) ଆହତ ହୋଇଛନ୍ତି। କୁହୁଡ଼ି ପାଇଁ କାର୍‌ଟି ରାସ୍ତା ଦେଖି ନପାରି ଭାରସାମ୍ୟ ହରାଇବା ସହ ଦୁର୍ଘଟଣାଗ୍ରସ୍ତ ହୋଇଥିବା କୁହାଯାଇଛି। ତେବେ ଏହି ଦୁର୍ଘଟଣାରେ ତିନିଜଣ ସାମାନ୍ୟ ଆହତ ହୋଇଥିଲେ। ତୁରନ୍ତ ସେମାନଙ୍କୁ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ନିଆଯାଇ ପ୍ରାଥମିକ ଚିକିତ୍ସା କରାଯାଇଛି। ପୁଲିସ ଦୁର୍ଘଟଣାଗ୍ରସ୍ତ କାର୍‌କୁ ଜବତ କରିବା ସହ ମାମଲା ରୁଜୁ କରି ଅଧିକ ତଦନ୍ତ କରୁଥିବା ଏସ୍‌ଆଇ ଅନନ୍ତ ପ୍ରଧାନ ସୂଚନା ଦେଇଛନ୍ତି।

ସୂଚନା ଅନୁସାରେ ଓଡ଼ିଆ ଫିଲ୍ମ ‘ଅଦୃଶ୍ୟ’ ସୁଟିଂ ପାଇଁ ଗତ କିଛିଦିନ ହେଲା ଏକ ଟିମ୍ ଆସି ଏଠାରେ ରହିବା ସହ ବିଭିନ୍ନ ସ୍ଥାନରେ ସୁଟିଂ କରୁଥିଲେ। ଗତକାଲି କୌଣସି ଏକ ଅଞ୍ଚଳରେ ସୁଟିଂ ସାରି ଫେରୁଥିବା ବେଳେ ଭୋର୍‌ରେ ଶ୍ରୀକଲା ଘାଟିରେ କାର୍‌ଟି ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା। ଦୁର୍ଘଟଣା ଘଟିବା ପରେ କାର୍‌ର ବେଲୁନ୍‌ ବାହାରି ଫୁଟି ଯାଇଥିବା ଦେଖିବାକୁ ମିଳିଛି। ସୌଭାଗ୍ୟବଶତଃ କାରରେ ବସିଥିବା ସମସ୍ତ ଯାତ୍ରୀ ସାମାନ୍ୟ ଆହତ ହୋଇଥିବା ବେଳେ ଏକ ନିଶ୍ଚିତ ବଡ଼ ଦୁର୍ଘଟଣାରୁ ବର୍ତ୍ତି ଯାଇଛନ୍ତି।