କାର ଓଲଟି ୪ ଆହତ

ଅଳତି: ରାମଚନ୍ଦ୍ରପୁର ଥାନା ଅନ୍ତର୍ଗତ ନହଙ୍ଗି-ଦେଓଗାଁ ରାସ୍ତାର ଜେନାପଦା ନିକଟରେ ଆଜି ପୂର୍ବାହ୍ନରେ ଏକ କାର୍‌ (ଓଡି-୩୪-ଜି-୨୩୫୦) ରାସ୍ତାକଡ଼କୁ ଓଲଟି ପଡ଼ିବାରୁ ଚାରିଜଣ ଆହତ ହୋଇଛନ୍ତି। କୁପାରି ଅଞ୍ଚଳର ଭଗବାନ ଦେହୁରୀ ଶ୍ବଶୁରଘର ଖଡ଼ିକାଶୁଳବାହାଳିକୁ ବିବାହ କାର୍ଯ୍ୟ ଯୋଗଦେବା ପାଇଁ ଆସିଥିଲେ।

ପଦନାଛକକୁ ଥଣ୍ଡାପାନୀୟ ଓ ଜଳଖିଆ ନେବାପାଇଁ ଆସୁଥିବା ବେଳେ ଭାରସାମ୍ୟ ହରାଇ କାର୍‌ଟି ଓଲଟି ଯାଇଥିଲା। ସ୍ଥାନୀୟ ଲୋକେ ଆହତମାନଙ୍କୁ ଉଦ୍ଧାର କରି ସାଇଁକୁଳ ଡାକ୍ତରଖାନା ପଠାଇଥିଲେ। ଭଗବାନଙ୍କ ମୁଣ୍ଡରେ ଶକ୍ତ ଆଘାତ ଲାଗିଥିବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି।