ବାଇକ୍‌କୁ ବଞ୍ଚାଇବାକୁ ଯାଇ ଓଲଟିଲା କାର୍‌, ଦମ୍ପତି ଗୁରୁତର

ପାଟଣାଗଡ଼: ପାଟଣାଗଡ଼ ସହର ନିକଟରେ ଏକ ସଡ଼କ ଦୁର୍ଘଟଣାରେ ସାର୍ଥକ ମିଶ୍ର ଓ ତାଙ୍କ ସ୍ତ୍ରୀ ସୀମା ମିଶ୍ର ଗୁରୁତର ଆହତ ହୋଇଛନ୍ତି। ସୂଚନା ଅନୁଯାୟୀ, ବୁଧବାର ସକାଳୁ ଟିଟିଲାଗଡ଼ର ସାର୍ଥକ ଓ ତାଙ୍କ ସ୍ତ୍ରୀ ସୀମା କାର୍‌ (ଓଡି ୦୩ ଡବ୍ଲୁ ୦୧୫୭) ଯୋଗେ ପାଟଣାଗଡ଼ ଦେଇ ପଦ୍ମପୁର ଯାଉଥିଲେ। ପାଟଣାଗଡ଼ ନିକଟ ଗଙ୍ଗାସଗର ଗ୍ରାମ ନିକଟରେ ବିପରୀତ ଦିଗରୁ ଦ୍ରୁତ ଗତିରେ ଏକ ବାଇକ୍‌ ଆସୁଥିବା ଦେଖି ତାକୁ ବଞ୍ଚାଇବାକୁ ଯାଇ ଚାଳକ କାର୍‌କୁ ରାସ୍ତାକଡ଼କୁ ନେଇଥିଲେ।

ଫଳରେ  କାର୍‌ଟି ଭାରସାମ୍ୟ ହରାଇ ରାସ୍ତାକଡ଼ର ନାଳରେ ଓଲଟି ପଡ଼ିଥିଲା। କାର୍‌ରେ ଥିବା ଦମ୍ପତି ଆହତ ହୋଇଥିଲେ। ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରି ଚିକିତ୍ସା ପାଇଁ ଡାକ୍ତରଖାନା ନେଇଥିଲେ। ପରେ ଉଭୟଙ୍କୁ ବଲାଙ୍ଗୀର ଭୀମଭୋଇ ମେଡିକାଲ କଲେଜ ଓ ହସପିଟାଲକୁ ସ୍ଥାନାନ୍ତର କରାଯାଇଛି।