କଟକ : ପ୍ରାୟ ୫୦ ଦିନ ହେବ ଅଚଳ ହୋଇପଡିଛି ସବରେଜିଷ୍ଟ୍ରାର ଅଫିସ । ଅଫିସ ଖୋଲା ଅଛି, ଅଫିସର ଆସୁଛନ୍ତି, ହେଲେ ସରକାରୀ କଟକଣା ଯୋଗୁ କାମ ଆଗେଇ ପାରୁନାହିଁ । କ୍ୟାସ୍ଲେସ ବ୍ୟବସ୍ଥାକୁ ନେଇ ଦୀର୍ଘ ୫୦ ଦିନ ଧରି ଏପରି ଅଚଳାବସ୍ଥା ସୃଷ୍ଟି ହୋଇଥିବାରୁ ସାଧାରଣରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । କ୍ୟାସ୍ଲେସ ବ୍ୟବସ୍ଥା ଲାଗୁ ନେଇ ସରକାର ନିଜ ଜିଦରେ ଅଟଳ ଥିବା ବେଳେ ଏହାକୁ ହଟାଇବା ପାଇଁ ମୋହରିର ତଥା ଆଇନଜୀବୀମାନେ ଦାବି କରିଛନ୍ତି । ଅନ୍ୟପଟେ ଜମିବାଡି କିଣାବିକାରେ ଏ ପ୍ରକାର ଅଚଳାବସ୍ଥା ଦୂର କରିବା ପାଇଁ ହାଇକୋର୍ଟରେ ମାମଲା ରୁଜୁ ହୋଇଛି । ଆସନ୍ତାକାଲି ସୋମବାର ଏହି ଗୁରୁତ୍ୱପୂର୍ଣ୍ଣ ମାମଲାର ଶୁଣାଣି ହେବ ବୋଲି ଜଣାଯାଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ସବ୍ରେଜିଷ୍ଟ୍ରାର ଅଫିସରେ ନଗଦ ବ୍ୟବସ୍ଥା ଉଚ୍ଛେଦ ପାଇଁ ରାଜ୍ୟ ସରକାର ଗତ ଅଗଷ୍ଟ ମାସରେ ନିଷ୍ପତ୍ତି ନେଇଥିଲେ । ଏ ନେଇ ଆଇଜିଆର୍ଙ୍କ ପକ୍ଷରୁ ଗତ ଅଗଷ୍ଟ ୨୨ ତାରିଖରେ ରାଜ୍ୟର ୧୮୫ଟି ସବରେଜିଷ୍ଟ୍ରାର ଅଫିସକୁ ଚିଠି ଦ୍ୱାରା ଅବଗତ କରାଯାଇଥିଲା । ଗତ ସେପ୍ଟେମ୍ବର ପହିଲାରେ ସମସ୍ତ ସବରେଜିଷ୍ଟ୍ରାର କାର୍ଯ୍ୟାଳୟରେ କ୍ୟାସଲେସ ବ୍ୟବସ୍ଥା ଲାଗୁ ହୋଇଥିଲା । ନିୟମ ଅନୁସାରେ, ଜମିବାଡି କିଣାବିକା, ବିବାହ ପଞ୍ଜୀକରଣ ତଥା ଅନ୍ୟାନ୍ୟ ପଞ୍ଜୀକରଣ କେବଳ ବ୍ୟାଙ୍କ ଜରିଆରେ ହୋଇପାରିବ । ମାତ୍ର ଏଥିରେ ଗ୍ରାହକମାନେ ଅଯଥା ହଇରାଣ ହେଉଥିବାରୁ ନିଖିଳ ଉତ୍କଳ ଦଲିଲ ମୋହରିର ସଂଘ ଅଭିଯୋଗ କରିବା ସହ ଏ ନେଇ ଗତ ୩ ତାରିଖଠାରୁ ଧର୍ମଘଟ ଆରମ୍ଭ କରିଛି। ଏହି ଧର୍ମଘଟକୁ ଆଇନଜୀବୀମାନେ ସମର୍ଥନ କରୁଛନ୍ତି । ସଂଘ ଦର୍ଶାଇଛି ଯେ କ୍ୟାସ୍ଲେସ ଯୋଗୁ ସାଧାରଣ ଲୋକେ ନାନାଦି ହଇରାଣ ଭୋଗୁଛନ୍ତି । କେତେକ ଗ୍ରାମାଞ୍ଚଳରେ ବ୍ୟାଙ୍କ କିମ୍ବା ଟ୍ରେଜେରୀର ସୁବିଧା ନଥିବାବେଳେ ସେଠାରେ ପଞ୍ଜୀକରଣ ହୋଇପାରିବ ନାହିଁ ।
ସେହିପରି ବିଭିନ୍ନ ସମୟରେ ବ୍ୟାଙ୍କ ବନ୍ଦ ରହୁଥିବାରୁ ପଞ୍ଜୀକରଣ ହୋଇପାରିବ ନାହିଁ । ଏଥିସହିତ ବ୍ୟାଙ୍କରେ ବାରମ୍ବାର ଲିଙ୍କ୍ ଫେଲ୍ ହେଉଥିବାରୁ ପଞ୍ଜୀକରଣ ପାଇଁ ଅସୁବିଧା ସୃଷ୍ଟି ହେବ। ସେହିପରି କ୍ୟାସ୍ଲେସ ବ୍ୟବସ୍ଥା ଯୋଗୁ ରାଜ୍ୟର ପ୍ରାୟ ୩୦ ହଜାର ଦଲିଲ ଲେଖକ, ମୋହରିର ଜୀବିକା ହରାଇବେ । ଏହାକୁ ପ୍ରତ୍ୟାହାର ପାଇଁ ସଂଘ ଦାବି କରିବା ସହ ଏ ନେଇ ମୁଖ୍ୟମନ୍ତ୍ରୀ ତଥା ସଂପୃକ୍ତ ବିଭାଗର ବରିଷ୍ଠ ଅଧିକାରୀମାନଙ୍କୁ ଅବଗତ କରାଯାଇଛି । କିନ୍ତୁ ଏଯାଏ କୌଣସି ଠୋସ ପଦକ୍ଷେପ ନିଆଯାଇ ନାହିଁ । ଫଳରେ ଧର୍ମଘଟ ଯୋଗୁ ଦୈନିକ କୋଟି କୋଟି ଟଙ୍କାର ରାଜସ୍ୱ ହାନୀ ହେଉଥିବା ଅଭିଯୋଗ ହୋଇଛି । ବହୁ ଅଭିଯୋଗ ପରେ ସରକାର ନଗଦ ଦେଣନେଣର ସୀମା ଦଶହଜାର ଟଙ୍କା ଧାର୍ଯ୍ୟ କରିଛନ୍ତି । ମାତ୍ର ଏହା ସମୁଦ୍ରକୁ ଶଙ୍ଖେ ପରି । ବ୍ୟାଙ୍କ କଟକଣା ଯୋଗୁ କଟକ, ଜଗତପୁର, ଭୁବନେଶ୍ୱର ତଥା ରାଜ୍ୟର ଅନ୍ୟ ଗୁରୁତ୍ୱପୂର୍ଣ୍ଣ ସବ୍ରେଜିଷ୍ଟ୍ରାର ଅଫିସର କାର୍ଯ୍ୟ ଏକପ୍ରକାର ଅଚଳ ହୋଇପଡିଛି । ପରିସ୍ଥିତି ସ୍ୱାଭାବିକ ନ ହେବାରୁ ଏ ନେଇ ସନାତନ ବିଶ୍ୱାଳ ନାମକ ଜଣେ ବ୍ୟକ୍ତି ହାଇକୋର୍ଟରେ ମାମଲା ରୁଜୁ କରିଛନ୍ତି । ଆସନ୍ତାକାଲି ଏହି ମାମଲାର ବିଚାର ହେବ। ଅନ୍ୟପକ୍ଷରେ ତାମିଲନାଡୁ, କର୍ଣ୍ଣାଟକ, ପଶ୍ଚିମବଙ୍ଗ, ଆନ୍ଧ୍ରପ୍ରଦେଶରେ ଏହି କ୍ୟାସ୍ଲେସ୍କୁ ବିରୋଧ କରାଯାଇଛି । ହେଲେ ଏ କ୍ଷେତ୍ରରେ ରାଜ୍ୟ ସରକାର ଅନୁଧ୍ୟାନ କରୁ ନଥିବା ଅଭିଯୋଗ ହୋଇଛି। କ୍ୟାସଲେସ ଧର୍ମଘଟ ପୂର୍ବରୁ ରାଜ୍ୟର ଅମଲାମାନେ ୧୧ ଦଫା ଦାବି ନେଇ ଅଗଷ୍ଟ ପହିଲାରୁ ଏକମାସ ବ୍ୟାପୀ କାର୍ଯ୍ୟବନ୍ଦ ଆନ୍ଦୋଳନ କରିଥିଲେ ।