ଭୁବନେଶ୍ବର: କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ(ସିବିଏସ୍‌ଇ) ଅଧୀନ ଦେଶର ସମସ୍ତ ବିଦ୍ୟାଳୟରେ ସିସିଟିଭି ଲାଗିବ। ଛାତ୍ରଛାତ୍ରୀ ଓ କର୍ମଚାରୀଙ୍କ ସୁରକ୍ଷାକୁ ଗୁରୁତ୍ବ ଦେଇ ବିଦ୍ୟାଳୟରେ ହାଇ-ରିଜୋଲ୍ୟୁସନ ସିସିଟିଭି କ୍ୟାମେରା ସ୍ଥାପନ କରିବା ଏଣିକି ବାଧ୍ୟତାମୂଳକ ହୋଇଛି। ଯେଉଁଥିରେ ରିଅଲ୍‌-ଟାଇମ ଅଡିଓ-ଭିଜୁଆଲ ରେକର୍ଡିଂ କ୍ଷମତା ରହିବ। ଏହାଦ୍ବାରା ସ୍କୁଲ ପରିସରରେ ନିରାପତ୍ତା ବୃଦ୍ଧି ପାଇବ। ବିଶେଷକରି କ୍ୟାମ୍ପସକୁ ପ୍ରବେଶ କରୁଥିବା ବ୍ୟକ୍ତିବିଶେଷଙ୍କ ଉପରେ କଡ଼ା ନଜର ରଖାଯାଇପାରିବ। ରାଗିଂ, ନିର୍ଯାତନା, ଅନୁପ୍ରବେଶ ପରି ବିଭିନ୍ନ ପ୍ରକାର କାର୍ଯ୍ୟକଳାପ ରୋକିବାରେ ଏହା ସହାୟକ ହେବ ବୋଲି ସିବିଏସ୍‌ଇ ପକ୍ଷରୁ ଆଜି ଜାରି ବିଜ୍ଞପ୍ତିରେ କୁହାଯାଇଛି।
Advertisment
ବିଦ୍ୟାଳୟର ସମସ୍ତ ପ୍ରବେଶ ଓ ପ୍ରସ୍ଥାନ ପଥରେ ଏହି ସିସିଟିଭି ଲାଗିବ। କ୍ୟାମ୍ପସର ଲବି, କରିଡର, ପାହାଚ, ଶ୍ରେଣୀଗୃହ, ପରୀକ୍ଷାଗାର, ଗ୍ରନ୍ଥାଗାର, କ୍ୟାଣ୍ଟିନ, ଖେଳପଡ଼ିଆ ଓ ଅନ୍ୟାନ୍ୟ ସାଧାରଣ ଅଞ୍ଚଳରେ ଲଗାଯିବ। ଗୋପନୀୟତା ବଜାୟ ରଖିବାକୁ କେବଳ ବିଦ୍ୟାଳୟ ଶୌଚାଳୟ ଓ ୱାସ୍‌ରୁମ୍‌ରେ କ୍ୟାମେରା ଲଗାଯିବ ନାହିଁ। ସିସିଟିଭି ଫୁଟେଜ୍‌ ଅତି କମ୍‌ରେ ୧୫ ଦିନ ପାଇଁ ସଂରକ୍ଷିତ କରି ରଖାଯିବ ଏବଂ ଆବଶ୍ୟକ ହେଲେ ଯାଞ୍ଚ ହେବ। ସିବିଏସ୍‌ଇ ପରୀକ୍ଷା କେନ୍ଦ୍ରଗୁଡ଼ିକ ପାଇଁ ଫଳ ଘୋଷଣାର ଦୁଇ ମାସ ପର୍ଯ୍ୟନ୍ତ ଫୁଟେଜ୍‌ ସଂରକ୍ଷିତ ରଖିବାକୁ ନିର୍ଦ୍ଦେଶ ଦିଆଯାଇଛି। ପ୍ରତି ୧୦ଟି ଶ୍ରେଣୀଗୃହ ବା‌ ୨୪୦ ଜଣ ଛାତ୍ରଛାତ୍ରୀଙ୍କ ପାଇଁ ଜଣେ ନିରୀକ୍ଷକ(ଇନ୍‌ଭିଜିଲେଟର) ନିଯୁକ୍ତ ହେବେ। ପରୀକ୍ଷା ସମୟରେ ସମ୍ପୃକ୍ତ ନିରୀକ୍ଷକ ରିଅଲ-ଟାଇମ ଫୁଟେଜ୍‌ ନିରୀକ୍ଷଣ କରିବେ ଏବଂ ଅନିୟମିତତା କାର୍ଯ୍ୟକଳାପର ରିପୋର୍ଟ ଦାଖଲ କରିବେ। ସିସିଟିଭି ବ୍ୟବସ୍ଥାର ନିୟମିତ ରକ୍ଷଣାବେକ୍ଷଣ ଓ ଯାଞ୍ଚ ହେବ। ଅଭିଭାବକଙ୍କ ଅଭିଯୋଗ ସ୍କୁଲର ଅଭିଯୋଗ ନିରାକରଣ ନୀତି ଅନୁଯାୟୀ ପରିଚାଳନା କରାଯିବ। ସିସିଟିଭି ଫୁଟେଜ୍‌ କେବଳ ଅନୁମୋଦିତ ଅଧିକାରୀ ଓ ସୁରକ୍ଷା କର୍ମଚାରୀ ଦେଖିପାରିବେ। ଛାତ୍ରଛାତ୍ରୀ, କର୍ମଚାରୀ ଓ ଅଭିଭାବକଙ୍କୁ ସିସିଟିଭି ସ୍ଥାପନ ବିଷୟରେ ପୂର୍ବରୁ ସୂଚନା ଦିଆଯିବ ଏବଂ ସ୍ପଷ୍ଟ ଭାବେ ଲେଖାଯାଇ ପ୍ରଦର୍ଶନ ହେବ। ଗୋପନୀୟତା ଅଧିକାରକୁ ସମ୍ମାନ ଦେବା ପାଇଁ ଫୁଟେଜ୍‌ ଅନ୍ୟମାନଙ୍କ ସହ ସେୟାର କରାଯିବ ନାହିଁ। ଆଇନଗତ ଆବଶ୍ୟକତା ଅନୁଯାୟୀ ଏହାକୁ ସୁରକ୍ଷିତ ରଖାଯିବ ବୋଲି ପରିଷଦ କହିଛି।