ପୁରୀ : ପୁରୀ-ଭୁବନେଶ୍ବର ୩୧୬ ନମ୍ବର ଜାତୀୟ ରାଜପଥର କାଠପୋଲସ୍ଥିତ ବ୍ରିଜ୍ ବର୍ଷେ ତଳୁ ବିପଦସଂକୁଳ ଘୋଷଣା ସରିଲାଣି। ତଥାପି ଏନ୍ଏଚ୍ଏଆଇ (ଭାରତୀୟ ଜାତୀୟ ରାଜପଥ ସଂସ୍ଥା) ଚୁପ୍ ହୋଇ ବସିଛି। ବର୍ଷେ ତଳେ ‘ସମ୍ବାଦ’ରେ ଏହି ଖବର ପ୍ରକାଶ ପାଇଥିଲା। ସେ ସମୟରେ ବିପଦସଂକୁଳ ସୂଚନା ଫଳକକୁ ହଟାଇ ଏନ୍ଏଚ୍ଏଆଇ ନିଜ ଦୋଷ ଦୁର୍ବଳତାକୁ ଲୁଚାଇବାକୁ ଚେଷ୍ଟା କରିଥିଲା। ଏ ଭିତରେ ସତକୁ ସତ ଏହି ପୋଲ ଭୁଶୁଡ଼ିବାକୁ ବସିଲାଣି। ଏ ସଂପର୍କରେ ‘ସମ୍ବାଦ’ରେ ବାରମ୍ବାର ଖବର ପ୍ରକାଶ ପରେ ଚାପଗ୍ରସ୍ତ ଏନ୍ଏଚ୍ଏଆଇ କର୍ତ୍ତୃପକ୍ଷ ଏବେ ଏହି ବିପଦସଂକୁଳ ପୋଲ ଉପରେ ଯାତାୟାତ ବନ୍ଦ କରିବା ପାଇଁ ଇଟାର ପାଚେରି ଠିଆ କରିଛନ୍ତି। ମରାମତି ବଦଳରେ ଏନ୍ଏଚ୍ଏଆଇର ଏଭଳି ଅଜବ ବ୍ୟବସ୍ଥାକୁ ବିଭିନ୍ନ ମହଲରେ ସମାଲୋଚନା କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ପୁରୀ ସଦର ବ୍ଲକ୍ ମାଳତୀପାଟପୁର ବସଷ୍ଟାଣ୍ଡ ନିକଟ କାଠପୋଲର ଏହି ବ୍ରିଜ୍ ବହୁ ପୁରୁଣା। ବର୍ଷେ ତଳେ ଏହି ପୁରାତନ ବ୍ରିଜ୍କୁ ଏନ୍ଏଚ୍ଏଆଇ ଦୁର୍ବଳ ବୋଲି ଘୋଷଣା କରି ସତର୍କ ସୂଚନା ଫଳକ ବି ଲଗାଯାଇଥିଲା। ଏହି ଫଳକ ଓ ବ୍ରିଜ୍ର ସ୍ଥିତିକୁ ନେଇ ସେ ସମୟରେ ‘ସମ୍ବାଦ’ରେ ବିସ୍ତୃତ ଖବର ପ୍ରକାଶ ପାଇଥିଲା। ସଫେଇରେ ପୋଲ ଅବସ୍ଥା ଠିକ୍ ଥିବା କହି ଏନ୍ଏଚ୍ଏଆଇ ଏଭଳି ଏକ ସମ୍ବେଦନଶୀଳ ଘଟଣାକୁ ଏଡ଼ାଇ ଯାଇଥିଲା। ଏବେ ଏହି ପୋଲ ଭୁଶୁଡ଼ିବା ଅବସ୍ଥାକୁ ଗଲାଣି। ପୋଲ ତଳେ ଲାଗିଥିବା ଗୋଟିଏ ପାର୍ଶ୍ବ ବେରିଂ ଭାଙ୍ଗି ଗୁଣ୍ଡ ହୋଇଯାଇଛି। ଯେଉଁଥିପାଇଁ ପୋଲଟି ଗୋଟିଏ ପାର୍ଶ୍ବକୁ ଦବିଯାଇଛି। ସ୍ଥାନୀୟ ଲୋକେ ଏ ସମ୍ପର୍କରେ ଖବର ଦେବା ପରେ ଏନ୍ଏଚ୍ଏଆଇ ବାଉଁଶର ବାଡ଼ ପକାଇ ପ୍ରଥମେ ଏହି ରାସ୍ତା ଦେଇ ଯାତାୟାତ ରୋକିବାକୁ ଚେଷ୍ଟା କରିଥିଲା। କ୍ରମେ ଏହି ବାଉଁଶ ବାଡ଼କୁ ହଟାଇ ଲୋକେ ବିପଦସଂକୁଳ ବ୍ରିଜ୍ରେ ଯାତାୟାତ କଲେ। ଗତ ତିନି ମାସ ହେଲାଣି ପୋଲଟି ଏହିଭଳି ବିପଦପୂର୍ଣ୍ଣ ଅବସ୍ଥାରେ ରହିଛି। ଏବେ ଯେତେବେଳେ ଚାପ ପଡ଼ିଲା ଏନ୍ଏଚ୍ଏଆଇ ଏହି ବ୍ରିଜ୍ର ଗୋଟିଏ ପାର୍ଶ୍ବରେ ଇଟାର ପ୍ରାଚୀର ଠିଆ କରି ଯାତାୟାତକୁ ବନ୍ଦ କରିବାକୁ ଚେଷ୍ଟା କରିଛି।