ଘୁ.ଉଦୟଗିରି/ସାରଙ୍ଗଗଡ଼: ଉତ୍ତମ ସ୍ବାସ୍ଥ୍ୟସେବାକୁ ସର୍ବାଧିକ ଗୁରୁତ୍ବ ଦେଉଛନ୍ତି ସରକାର। ଡାକ୍ତରଖାନା ଭିତ୍ତିଭୂମି ବିକାଶକୁ ପ୍ରାଥମିକତା ଦିଆଯାଇ କୋଟି କୋଟି ଟଙ୍କା ବ୍ୟୟ ହେଉଛି। ତଥାପି କନ୍ଧମାଳ ଭଳି ଆଦିବାସୀ ଅଧ୍ୟୁଷିତ ଜିଲ୍ଲାରେ ସ୍ବାସ୍ଥ୍ୟସେବାର ବିକଳ ଚିତ୍ର ନିତିଦିନିଆ ଘଟଣା ହୋଇଛି। କ.ନୂଆଗାଁ ବ୍ଲକ୍‌ ସାରଙ୍ଗଗଡ଼ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରୋଗୀ ଦୁଇଦିନ ଅନ୍ଧାରରେ ରହି ଛଟପଟ ହୋଇଥିଲେ। ଡାକ୍ତର ଟର୍ଚ୍ଚ ଆ‌ଲୁଅରେ ରୋଗୀ ଦେଖୁଥିଲେ। ଏଭଳି ଅବ୍ୟବସ୍ଥା ଗତ ମଙ୍ଗଳବାର ସନ୍ଧ୍ୟା ୮ଟାରୁ ଦେଖା ଦେଇଥିବା ବେଳେ ଆଜି ସକାଳେ ବିଦ୍ୟୁତ୍‌ ସରବରାହ ସ୍ବାଭାବିକ ହୋଇଛି। ଆଲୁଆ ଚାଲିଯିବାରୁ ଜେନେରେଟର ମାତ୍ର ଘଣ୍ଟାଏ ଚାଲି ବନ୍ଦ ହୋଇ ଯାଇଥିଲା। ଫଳରେ ହସ୍‌ପିଟାଲ ଅନ୍ତଃବିଭାଗରେ ଚିକିତ୍ସାଧୀନ ୧୫ରୋଗୀ ଓ ସେମ‌ାନଙ୍କ ସମ୍ପର୍କୀୟ ଅନ୍ଧାରରେ ଛଟପଟ ହୋଇଥିବା କହିଛନ୍ତି। ଏପରିକି ଜଣେ ଗୁରୁତର ରୋଗୀଙ୍କୁ ଅକ୍ସିଜେନ୍‌ର ଆବଶ୍ୟକତା ଥିବା ବେଳେ ବିଦ୍ୟୁତ୍‌ ନଥିବାରୁ ଡାକ୍ତର ହଇରାଣ ହୋଇଥିଲେ। 

Advertisment

ଅନ୍ଧାର ସାଙ୍ଗକୁ ମଶା ଓ ଗରମରେ ଦୁଇଦିନ ଦିନ ଧରି ରୋଗୀ ଓ ସମ୍ପର୍କୀୟ ନୟାନ୍ତ ହେବା ପରେ ଆଜି ବିଦ୍ୟୁତ୍‌ ସେବା ସ୍ବାଭାବିକ ହେବା ପରେ ଆଶ୍ବସ୍ତ ହୋଇଥିବା କହିଛନ୍ତି। ସନ୍ଧ୍ୟାରେ କାଜୁଆଲ୍‌ଟିକୁ ଆସିଥିବା ରୋଗୀଙ୍କୁ ବହୁ ସମୟ ଧରି ଅପେକ୍ଷା କରିବାକୁ ପଡ଼ିଥିଲା  ବୋଲି ରୋଗୀଙ୍କ ସମ୍ପର୍କୀୟ କର୍ଣ୍ଣ ଦିଗ‌ାଲ କହିଛନ୍ତି। ରୋଗୀଙ୍କୁ ବିନା ଆଲୁଅ ଯନ୍ତ୍ରଣା ଆହୁରି କଷ୍ଟଦାୟକ ହୋଇଥିଲା। ଏପରକି ବିଜୁଳି ନଥିବାରୁ ପିଇବା ପାଣି ଓ ଶୌଚ ପାଇଁ ମଧ୍ୟ ପାଣି ଟୋପେ ମିଳିନଥିଲା। ରୋଗୀଙ୍କ ସମ୍ପର୍କୀୟ ଯେନତେନ ପ୍ରକାରେ ବ୍ୟବହାର ପାଇଁ ପିଇବା ପାଣି ଯୋଗାଡ଼ କରିଥିଲେ। ଏଭଳି ଅବ୍ୟବସ୍ଥା ସମ୍ପର୍କରେ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଡାକ୍ତର ସୌଭାଗ୍ୟ କୁମାର ନାୟକଙ୍କୁ ପଚାରିବାରୁ ସ୍ବାସ୍ଥ୍ୟକେନ୍ଦ୍ରର ସମସ୍ୟା ସମ୍ପର୍କରେ ଉଚ୍ଚ କର୍ତ୍ତୃପକ୍ଷଙ୍କୁ ବାରମ୍ବାର ଅବଗତ କରାଯାଉଛି। ହେଲେ କିଛି ସୁଫଳ ମିଳୁନି। ବିଜୁଳି ଚାଲିଯିବା ସମ୍ପର୍କରେ ବିଭାଗୀୟ ଅଧିକାରୀଙ୍କ ସମେତ ବିଦ୍ୟୁତ୍‌ ବିଭାଗକୁ ମଧ୍ୟ ଅବଗତ କରାଯାଇଥିଲା  ବୋଲି ସେ କହିଛନ୍ତି। ତେବେ ଏଭଳି ଅବ୍ୟବସ୍ଥା‌ ପ୍ରତି ପ୍ରଶାସନ ଧ୍ୟାନ ଦେବା ସହ ସ୍ବାସ୍ଥ୍ୟକେନ୍ଦ୍ରରେ ୨୪ ଘଣ୍ଟିଆ ବିଦ୍ୟୁତ୍‌ସେବା ଯୋଗାଇ ଦେବାକୁ ଦାବି ହୋଇଛି।  ଉଲ୍ଲେଖଯୋଗ୍ୟ ଯେ ଦୁଇଦିନ ତଳେ ‘ସମ୍ବାଦ’ରେ ସାରଙ୍ଗଗଡ଼ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଅବ୍ୟବସ୍ଥା ସମ୍ପର୍କରେ ଖବର ପ୍ରକାଶ ପାଇଥିଲା।