ଏ ବର୍ଷ ଭବାନୀପାଟଣାରେ ଭକ୍ତଙ୍କ ବିନା ଆୟୋଜନ ହେବ ଛତରଯାତ୍ରା; ପଶୁବଳି ନିଷେଧ
ଭବାନୀପାଟଣା: ଚଳିତ ବର୍ଷ ପାଳନ ହେବ କଳାହାଣ୍ଡି ଜିଲ୍ଲାର ପ୍ରସିଦ୍ଧ ଛତର ଯାତ୍ରା। କଳାହାଣ୍ଡି ଜିଲ୍ଲା ପ୍ରଶାସନ କୋଭିଡ୍ କଟକଣା ମଧ୍ୟରେ ପ୍ରସିଦ୍ଧ ଛତରଯାତ୍ରା ଆୟୋଜନ କରିବାକୁ ନିଷ୍ପତ୍ତି ଗ୍ରହଣ କରିଛି। ଏ ସଂକ୍ରାନ୍ତରେ ଆଜି ଅନୁଷ୍ଠିତ ବୈଠକରେ ସ୍ଥିର ହୋଇଛି ଯେ, କୋଭିଡ୍-୧୯ ମହାମାରୀ କାରଣରୁ ଏ ବର୍ଷ ଦେବୀ ମାଣିକେଶ୍ବରୀଙ୍କ ଉତ୍ସବ ଭକ୍ତଙ୍କ ବିନା ଆୟୋଜନ କରାଯିବ। ଏଥର ଅକ୍ଟୋବର ୨୪ ତାରିଖରେ ଛତରଯାତ୍ରା ପଡୁଛି।
Sambad is now on WhatsApp
Join and get latest news updates delivered to you via WhatsApp
ନିଷ୍ପତ୍ତି ଅନୁସାରେ, ମନ୍ଦିର ଭିତରକୁ ପ୍ରବେଶ କରିବାକୁ କି, ଯାତ୍ରାରେ ଭାଗ ନେବାକୁ କୌଣସି ଭକ୍ତଙ୍କୁ ଅନୁମତି ଦିଆଯିବ ନାହିଁ। ଯାତ୍ରା ଉପଲକ୍ଷେ ମାଣିକେଶ୍ବରୀ ମନ୍ଦିରରେ ଦିଆଯାଉଥିବା ପଶୁବଳି ମଧ୍ୟ ନିଷେଧ ହୋଇଛି।
ଏଠାରେ ସ୍ମରଣ କରାଇ ଦିଆଯାଇ ପାରେ ଯେ, ପ୍ରତିବର୍ଷ ଦେବୀ ମାଣିକେଶ୍ବରୀଙ୍କ ଛତରଯାତ୍ରା ବେଳେ ଜିଲ୍ଲା ପ୍ରଶାସନ ପଶୁବଳି ନିଷିଦ୍ଧ କରେ। ନିଷେଧାଦେଶ ସତ୍ତ୍ବେ ଆପଣା ମନସ୍କାମନା ପୂର୍ଣ୍ଣ ହେବା ଉଦ୍ଦେଶ୍ୟରେ ଭକ୍ତମାନେ ଶହ ଶହ ନିରୀହ ପ୍ରାଣୀଙ୍କୁ ବଳି ପକାନ୍ତି।
ଏହି ଧାର୍ମିକ ଅନୁଷ୍ଠାନରେ, ସକାଳୁ ଗୁପ୍ତ ନୀତି ସମାପନ ପରେ ମନ୍ଦିର ମଧ୍ୟରୁ ଦେବୀ ମାଣିକେଶ୍ବରୀଙ୍କର ଏକ ସୁସଜ୍ଜିତ ଛତର ଭବାନୀପାଟଣା ଉପକଣ୍ଠକୁ ନିଆଯାଏ। ସେଠାରୁ ମନ୍ଦିରକୁ ଏହି ଛତର ବାହୁଡ଼ାଇ ଆଣିବାକୁ ଛତରଯାତ୍ରା କହନ୍ତି। ଏଥିରେ ପ୍ରବଳ ଜନସମାଗମ ହୋଇଥାଏ। ମାତ୍ର ଚଳିତ ବର୍ଷ ଯାତ୍ରାସ୍ଥଳକୁ ଭକ୍ତଙ୍କୁ ଆସିବା ଲାଗି ଅନୁମତି ଦିଆଯିବ ନାହିଁ।