ଛତିଶଗଡର ଦାଦାଗିରି : ଓଡିଶା ରାସ୍ତାର ନାଳରେ ନିର୍ମାଣ କଲା ବ୍ରିଜ

ଖଡ଼ିଆଳ: ନୂଆପଡା ଜିଲ୍ଲାର ଜମି ଉପରେ ଏବେ ଛତିଶଗଡର ଆଖି ପଡିଛି । କେତେବେଳେ ନୂଆପଡା ସଦର ବ୍ଲକର ନଟେଇ ନାଳରେ ଚେକ୍ ଡ୍ୟାମ ନିର୍ମାଣ କରି ଜମି ଦଖଲ ପ୍ରୟାସ କରିଥିବା ବେଳେ ନୁଆଁମାଲପଡା ଗାଁ ପାଖରେ ଜମି ବିବାଦକୁ ନେଇ ଚର୍ଚ୍ଚାକୁ ଆସି ଥିଲା ଛତିଶଗଡ । ଏ ସମସ୍ୟାର ସମାଧାନ ଏ ଯାଏ ହୋଇ ନ ଥିବା ବେଳେ ଛତିଶଗଡ କିନ୍ତୁ ଚୁପ୍ ରହି ନାହିଁ । ଏବେ ଓଡିଶା ଜମିରେ ଥିବା ଓଡିଶାର ରାସ୍ତାର ନାଳରେ ଏକ ବ୍ରିଜ୍ ତିଆରି କରି ଜମିକୁ ନିଜର କରିବାକୁ ଉଦ୍ୟମ କରିଛି ଛତିଶଗଡ ।

ନୂଆପଡା ଜିଲ୍ଲା ସିନାପାଲି ତହସିଲ ଅନ୍ତର୍ଗତ କେନ୍ଦୁମୁଣ୍ତା ପଞ୍ଚାୟତର ଡଙ୍ଗରିପାଲି ଗାଁ । ଡଙ୍ଗରିପାଲି ଗାଁ ଓଡିଶାର ଶେଷ ସୀମାରେ ଥିବା ଗାଁ । କେନ୍ଦୁମୁଣ୍ତା ପଞ୍ଚାୟତରୁ ଡଙ୍ଗରିପାଲି ଗାଁକୁ ଯିବା ପାଇଁ ଏକ ପଞ୍ଚାୟତ ରାସ୍ତା ଅଛି । ଏ ରାସ୍ତାରେ ଓଡିଶା ସରକାର ଆଗରୁ ବିଭିନ୍ନ ଯୋଜନାରୁ ରାସ୍ତା କାମ ମଧ୍ୟ କରିଛନ୍ତି । ରାସ୍ତା ମଝିରେ ଧାଙ୍ଗରିନାଳ ନାମକ ଏକ ନାଳ ପଡେ । ଏହି ନାଳରେ ଛତିଶଗଡ ସରକାର ୧୦ ଲକ୍ଷ ଟଙ୍କା ଖର୍ଚ୍ଚ କରି ମନରେଗା ଯୋଜନାରେ ଏକ ବଡ ବ୍ରିଜ୍ ନିର୍ମାଣ କରି ଦେଇଛି । ଯାହାକି ଛତିଶଗଡ ସୀମାଠାରୁ ଓଡିଶା ଆଡକୁ ୫୦ ମିଟର ମାଡି ଆସିଛି।

ଓଡିଶା ଜମିରେ ଓଡିଶାର ରାସ୍ତାରେ ଛତିଶଗଡ ସରକାର ଏତେ ବଡ ବ୍ରିଜ ତିଆରି କଲା, ହେଲେ ରାଜ୍ୟ ସରକାର କିମ୍ୱା ଜିଲ୍ଲା ପ୍ରଶାସନ ସୂରାକ ବି ପାଇ ପାରିଲା ନାହିଁ । ଏହି ବିଷୟ ନେଇ ଉପଜିଲ୍ଲାପାଳ ତରଣୀସେନ ନାଏକଙ୍କ ସହ ଯୋଗାଯୋଗ କରିଥିଲୁ ଯେ, ଅଭିଯୋଗର ତଦନ୍ତ ପାଇଁ ସିନାପାଲି ତହସିଲଦାରଙ୍କୁ ନିର୍ଦ୍ଦେଶ ଦିଆଯାଇଛି । ଯଦି ସୀମା ବିବାଦ ଥିବ, ଦୁଇ ରାଜ୍ୟର ଅଧିକାରୀ ବସି ସମାଧାନ କରିବେ ବୋଲି ପ୍ରକାଶ କରିଛନ୍ତି ।