ଦୁର୍ନୀତିଗ୍ରସ୍ତ ବନ ଅଧିକାରୀଙ୍କୁ ମୁଖ୍ୟମନ୍ତ୍ରୀଙ୍କ ତାଗିଦ: ‘ଏବେଠୁ ସୁଧୁରିଯାଅ

ଭୁବନେଶ୍ୱର: ଦୁର୍ନୀତି ବିରୋଧରେ ରାଜ୍ୟ ସରକାର କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ଯେ କେହି ବି ହୁଅନ୍ତୁ ନା କାହିଁକି ଛଡ଼ାଯିବ ନାହିଁ। ତେଣୁ ନିଜ ଚିନ୍ତାଧାରାରେ ପରିବର୍ତ୍ତନ କରି ନିଅ। ଭଲ କାମ କରି ନାଁ କମାଅ। ସୁନାମ ଅର୍ଜନ କର। ଭଲ କାମ କରୁଥିବା ଅଧିକାରୀଙ୍କୁ ରାଜ୍ୟ ସରକାର ସମ୍ମାନିତ, ପୁରସ୍କୃତ କରୁଛନ୍ତି। ମାତ୍ର କିଛି ଜଣଙ୍କ ପାଇଁ ଜଙ୍ଗଲ ବିଭାଗ ଆଜି ବଦନାମ ହେଉଛି। ଆଉ ବଦନାମ କର ନାହିଁ। ‌ଯଦି କେହି ଦୁର୍ନୀତି କରୁଛ, ତେବେ ଏବେଠୁ ସୁଧୁରି ଯାଅ। ଜଙ୍ଗଲ, ପରିବେଶ ଓ ଜଳବାୟୁ ବିଭାଗ ଅଧୀନରେ କାର୍ଯ୍ୟରତ ବନ ଅଧିକାରୀମାନଙ୍କୁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏଭଳି ଚେତାବନୀ ଶୁଣାଇଛନ୍ତି।

ଲୋକସେବା ଭବନରେ ଅନୁଷ୍ଠିତ ରାଜ୍ୟସ୍ତରୀୟ ବନ ଅଧିକାରୀ ସମ୍ମିଳନୀରେ ମୁଖ୍ୟଅତିଥି ଭାବେ ଯୋଗ ଦେଇ ମୁଖ୍ୟମନ୍ତ୍ରୀ କହିଲେ, ବର୍ତ୍ତମାନର 

ସରକାର ଦୁର୍ନୀତି ବିରୋଧରେ ଶୂନ୍ୟସହନଶୀଳତା ନୀତି ଅବଲମ୍ବନ କରୁଛନ୍ତି। ତେଣୁ ଅଧିକାରୀମାନେ ଦୁର୍ନୀତିଠାରୁ ଦୂରରେ ରୁହନ୍ତୁ। ସାଧାରଣ ଲୋକଙ୍କୁ ଭଲ ବ୍ୟବହାର ସହ ସେମାନଙ୍କ ସହ ମିଳିମିଶି ଜଙ୍ଗଲ ସୁରକ୍ଷା ଦିଗରେ ପଦକ୍ଷେପ ନିଅନ୍ତୁ। ଆମ ରାଜ୍ୟର ଏକ-ଚତୁର୍ଥାଂଶ ଲୋକ ହେଉଛନ୍ତି ଆଦିବାସୀ ସଂପ୍ରଦାୟର। ସେମାନେ ମୁଖ୍ୟତଃ ବଣ ଜଙ୍ଗଲ ଓ ଏହାର ଆଖପାଖ ଅଞ୍ଚଳରେ ବସବାସ କରନ୍ତି। ସେମାନଙ୍କ ପାଇଁ ସଂଘର୍ଷହୀନ ସହାବସ୍ଥାନ ସୃଷ୍ଟି ଏବଂ ସୁରକ୍ଷା ହେଉଛି ସରକାରଙ୍କ ନୈତିକ ଦାୟିତ୍ୱ। ବନ ଅଧିକାରୀମାନେ ମୁଖ୍ୟତଃ ଗରିବ, ଆଦିବାସୀ, ଦଳିତବର୍ଗ ଲୋକଙ୍କ ସହିତ ମିଳାମିଶା କରୁଛନ୍ତି। ତେଣୁ ଜଙ୍ଗଲ ସୁରକ୍ଷା ନିୟମ ପାଳନ ସମୟରେ ସେମାନଙ୍କ ପ୍ରତି ସମ୍ବେଦନଶୀଳତା ସହ ଭଲ ବ୍ୟବହାର କରିବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ।