ଝାନ୍ସୀ: ସେନାର ଯୁବ ଡାକ୍ତର ମେଜର ରୋହିତ ବଚୱାଲା ଏବେ ଚର୍ଚ୍ଚାରେ। ରେଳ ଷ୍ଟେସନରେ ଯନ୍ତ୍ରଣାରେ ଛଟପଟ ହେଉଥିବା ଜଣେ ମହିଳାଙ୍କର ପ୍ରସବ କାର୍ଯ୍ୟ ସେ ସର୍ବନିମ୍ନ ଉପକରଣ ସାହାଯ୍ୟରେ କରିଛନ୍ତି। ଜରୁରୀକାଳୀନ ପ୍ରସବ ସମୟରେ ସେ ଏକ ହେୟାର କ୍ଲିପ୍ ଓ ଏକ ପକେଟ୍ ଛୁରି ବ୍ୟବହାର କରିଥିଲେ। ଡାକ୍ତର ବଚୱାଲାଙ୍କ ଦ୍ୱାରା ସର୍ବନିମ୍ନ ଉପକରଣ ବ୍ୟବହାର କରି ଶିଶୁର ସୁରକ୍ଷିତ ଜନ୍ମକୁ ସୁନିଶ୍ଚିତ କରାଯାଇଛି। ପିତାମାତା ଓ ଦର୍ଶକମାନେ ଏହା ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। ସୋମବାର ସେନାମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ ମେଜର ବଚୱାଲାଙ୍କୁ ତାଙ୍କର ଏହି କାର୍ଯ୍ୟ ପାଇଁ ପ୍ରଶଂସା କରିଛନ୍ତି। ଉତ୍ତର କେନ୍ଦ୍ରୀୟ ରେଳବାଇର ଝାନ୍ସୀ ଡିଭିଜନ୍ ଜନସମ୍ପର୍କ ଅଧିକାରୀ ମନୋଜ କୁମାର ସିଂହଙ୍କ କହିବା ଅନୁଯାୟୀ, ପାନଭେଲ-ଗୋରଖପୁର ଏକ୍ସପ୍ରେସରେ ଯାତ୍ରା କରୁଥିବା ଜଣେ ଗର୍ଭବତୀ ମହିଳା ପ୍ରସବ ଯନ୍ତ୍ରଣା ଅନୁଭବ କରିଥିଲେ ଏବଂ ଶନିବାର ଅପରାହ୍ଣରେ ତାଙ୍କୁ ଝାନ୍ସୀ ଷ୍ଟେସନରେ ଓହ୍ଲାଇ ଦିଆଯାଇଥିଲା। ମହିଳାଙ୍କ ଗୁରୁତର ଅବସ୍ଥା ଦେଖି ନିକଟରେ ମୁତୟନ ଥିବା ଜଣେ ମହିଳା ଟିକେଟ୍ ଚେକିଂ କର୍ମଚାରୀ ଓ ଜଣେ ସେନା ଅଧିକାରୀ ସାହାଯ୍ୟ କରିବାକୁ ଆଗେଇ ଆସିଥିଲେ। ଆର୍ମି ମେଡିକାଲ କର୍ପସର ମେଡିକାଲ ଅଫିସର ମେଜର ବଚୱାଲା (୩୧) ଟ୍ରେନ୍କୁ ଅପେକ୍ଷା କରିଥିବା ବେଳେ ଜଣେ ରେଳ କର୍ମଚାରୀ ପ୍ରସୂତୀଙ୍କୁ ହ୍ୱିଲ ଚେୟାରରେ ନେଉଥିବା ଦେଖିଥିଲେ। ମେଜର ବଚୱାଲା ରେଳ କର୍ମଚାରୀଙ୍କ ସହାୟତାରେ ମହିଳାଙ୍କୁ ପ୍ଲାଟଫର୍ମରେ ହିଁ ସନ୍ତାନ ପ୍ରସବ କରିବାରେ ସାହାଯ୍ୟ କରିବାକୁ ନିଷ୍ପତ୍ତି ନେଇଥିଲେ। ମା’ ଓ ଶିଶୁଙ୍କ ଅବସ୍ଥା ସଂକଟାପନ୍ନ ଥିଲା ଏବଂ ପ୍ରତ୍ୟେକ ସେକେଣ୍ଡ ଗୁରୁତ୍ୱପୂର୍ଣ୍ଣ ଥିଲା। ଈଶ୍ୱରୀୟ ହସ୍ତକ୍ଷେପ ଯୋଗୁ ହିଁ ମୁଁ ସେହି ମୁହୂର୍ତ୍ତରେ ଉପସ୍ଥିତ ଥିଲି ବୋଲି ସେ କହିଛନ୍ତି। ପ୍ରସବ ପରେ ଉଭୟ ମା’ ଓ ଶିଶୁଙ୍କୁ ଆମ୍ବୁଲାନ୍ସ ଯୋଗେ ସ୍ଥାନୀୟ ଡାକ୍ତରଖାନାକୁ ନିଆଯାଇଥିଲା। ରେଳ କର୍ମଚାରୀମାନେ ଏହାର ବ୍ୟବସ୍ଥା କରିଥିଲେ। ପରେ ଉଭୟଙ୍କ ଅବସ୍ଥା ସ୍ଥିର ଥିବା ଡାକ୍ତର ସୂଚନା ଦେଇଛନ୍ତି। ଜରୁରିକାଳୀନ ପରିସ୍ଥିତିର ସଫଳ ମୁକାବିଲା କରିବା ପରେ ମେଜର ବଚୱାଲା ଠିକ୍ ସମୟରେ ହାଇଦ୍ରାବାଦ ଅଭିମୁଖେ ଟ୍ରେନ୍ରେ ଚଢ଼ିଥିଲେ।
ହେୟାର କ୍ଲିପ୍, ପକେଟ୍ ଛୁରି ସାହାଯ୍ୟରେ ସନ୍ତାନ ପ୍ରସବ
ସେନାର ଯୁବ ଡାକ୍ତର ମେଜର ରୋହିତ ବଚୱାଲା ଏବେ ଚର୍ଚ୍ଚାରେ। ରେଳ ଷ୍ଟେସନରେ ଯନ୍ତ୍ରଣାରେ ଛଟପଟ ହେଉଥିବା ଜଣେ ମହିଳାଙ୍କର ପ୍ରସବ କାର୍ଯ୍ୟ ସେ ସର୍ବନିମ୍ନ ଉପକରଣ ସାହାଯ୍ୟରେ କରିଛନ୍ତି। ଜରୁରୀକାଳୀନ ପ୍ରସବ ସମୟରେ ସେ ଏକ ହେୟାର କ୍ଲିପ୍...
/sambad/media/media_files/2025/07/08/ddd-2025-07-08-10-29-35.jpg)