ପାଇକ ସ୍ମାରକୀ କାର୍ଯ୍ୟ ତ୍ୱରାନ୍ୱିତ କରିବାକୁ ଜିଲ୍ଲାପାଳଙ୍କ ଭେଟିଲେ ନାଗରିକ ପ୍ରତିନିଧି
ଖୋର୍ଦ୍ଧା: ଖୋର୍ଦ୍ଧା ଉପକଣ୍ଠ ଐତିହାସିକ ବରୁଣେଇ ପାହାଡ଼ ତଳେ ପ୍ରତିଷ୍ଠା ହେବାକୁ ଥିବା ପାଇକ ସ୍ମାରକୀ ନିର୍ମାଣ କାର୍ଯ୍ୟ ତ୍ୱରାନ୍ୱିତ କରିବାକୁ ଆଜି ଖୋର୍ଦ୍ଧା ସହରର ବିଭିନ୍ନ ନାଗରିକ କମିଟି, ସଂଗଠନର ପ୍ରତିନିଧିମାନେ ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ରଙ୍କୁ ଭେଟି ଆଲୋଚନା କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଆଜି ଅପରାହ୍ଣ ପ୍ରାୟ ୫ଟା ବେଳେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ହୋଇଥିବା ଏହି ଆଲୋଚନାରେ ଜଟଣୀ ବିଧାୟକ ସୁରେଶ କୁମାର ରାଉତରାୟ, ଖୋର୍ଦ୍ଧା ବିଧାୟକ ଜ୍ୟୋତିରିନ୍ଦ୍ର ନାଥ ମିତ୍ର, ପୂର୍ବତନ ବିଧାୟକ ଡ ଦିଲିପ ଶ୍ରୀଚନ୍ଦନ, ନ୍ୟୁଥିଂକିଂ ଫୋରମ୍ର ସଭାପତି ନରେନ୍ଦ୍ର ପୃଷ୍ଟି, ସମ୍ପାଦକ ସଂଜୟ ପଟ୍ଟନାୟକ, ଆରକ୍ଷୀ ଅଧୀକ୍ଷକ ରାଜ କିଶୋର ଦୋରା, ଡିଏଫ୍ଓ ପୂର୍ଣ୍ଣିମା ପାଣ୍ଡିଆନ, ଉପଜିଲ୍ଲାପାଳ ଆଇ ଗୌରବ ଶିବାଜୀ, ତହସିଲଦାର ପ୍ରମୁଖ ଉପସ୍ଥିତ ଥିଲେ ।
ଆଲୋଚନା ସମ୍ପର୍କରେ ସୂଚନା ଦେଇ ଶ୍ରୀ ପୃଷ୍ଟି କହିଛନ୍ତି ଯେ ପୂର୍ବ ଜିଲ୍ଲାପାଳ ପାଇକ ସ୍ମାରକୀର ସ୍ଥାନକୁ ରାଜ୍ୟ ସଂସ୍କୃତି ବିଭାଗକୁ ହସ୍ତାନ୍ତର କରିବାକୁ ରାଜସ୍ୱ ବିଭାଗକୁ କହିଥିଲେ । ଏହାପରେ ରାଜସ୍ୱ ବିଭାଗ କହିଥିଲେ ଯେ ଏହି ସ୍ଥାନକୁ ନେବା ପାଇଁ କେନ୍ଦ୍ର ସଂସ୍କୃତି ବିଭାଗ ଆବେଦନ କରିବା ଆବଶ୍ୟକ । ତେବେ ସ୍ଥାନର ମୂଲ୍ୟ ୩୦ କୋଟି ଟଙ୍କା ହୋଇଥିବାରୁ ଏହାକୁ ବିନାମୂଲ୍ୟରେ କେନ୍ଦ୍ର ସଂସ୍କୃତି ବିଭାଗକୁ କିଭଳି ଦିଆଯିବ ସେନେଇ ବୈଠକରେ ଆଲୋଚନା ହୋଇଥିଲା । ତେବେ ପ୍ରସ୍ତାବିତ ପ୍ରାୟ ୯ ଏକର ୬ଶହ ଡେସିମଲ ସ୍ଥାନ ମଧ୍ୟରୁ କେତେକ ଅଂଶରେ ବନ ବିଭାଗର ଅଧୀନ ଥିବା ଓ ସେଠାରେ ବୃକ୍ଷରୋପଣ କରାଯାଇଥିବାରୁ ଏହାର ମୂଲ୍ୟାୟନ ପାଇଁ ଜିଲ୍ଲାପାଳ ଡିଏଫ୍ଓଙ୍କୁ କହିଥିଲେ । ଆଲୋଚନା ଫଳପ୍ରସୂ ରହିଥିଲା, ଖୋର୍ଦ୍ଧାର ଏକ ପ୍ରତିନିଧି ଦଳ ଖୁବଶୀଘ୍ର ରାଜ୍ୟ ରାଜସ୍ୱ ସଚିବ ବିଷ୍ଣୁପଦ ସେଠୀଙ୍କୁ ସାକ୍ଷାତ କରି ଏନେଇ ଆଲୋଚନା କରିବେ ବୋଲି ଶ୍ରୀ ପୃଷ୍ଟି କହିଛନ୍ତି ।