ଭୁବନେଶ୍ୱର : ଅକ୍ଟୋବର ୪ ତଥା ଆସନ୍ତାକାଲି ସିଭିଲ୍‌ ସର୍ଭିସ(ପ୍ରିଲିମ) ପରୀକ୍ଷା ଅନୁଷ୍ଠିତ ହେବ। ଚଳିତବର୍ଷ ୮ ଲକ୍ଷରୁ ଅଧିକ ଛାତ୍ରଛାତ୍ରୀ ଏହି ପରୀକ୍ଷା ଦେବେ। ପୂର୍ବାହ୍ନ ୯ଟା ୩୦ରେ ପ୍ରଥମ ସିଟିଂ ପରୀକ୍ଷା ହେବାକୁ ଥିବା ବେଳେ ଅପରାହ୍‌ଣ ସାଢ଼େ ୨ଟା‌ରେ ଦ୍ବିତୀୟ ସିଟିଂ ପରୀକ୍ଷା କରାଯିବ। ପରୀକ୍ଷାର ୧୦ ମିନିଟ୍‌ ପୂର୍ବରୁ ପରୀକ୍ଷାର୍ଥୀଙ୍କୁ ପ୍ରବେଶ ଲାଗି ଅନୁମତି ମିଳିବ ନାହିଁ। ପରୀକ୍ଷାର୍ଥୀଙ୍କୁ ଇ-ଆଡମିଟ୍‌ କାର୍ଡ ପ୍ରଦାନ କରାଯାଇଛି। ସେମା‌ନେ ତାହାର ପ୍ରିଣ୍ଟକୁ ସାଙ୍ଗରେ ନେଇ ପରୀକ୍ଷା କେନ୍ଦ୍ରକୁ ଯିବେ। ମାସ୍କ/ଫେସ୍‌ କଭର୍‌ ପିନ୍ଧିବା ବାଧ୍ୟତାମୂଳକ ହୋଇଛି। ପରୀକ୍ଷା ସମୟରେ ସାମାଜିକ ଦୂରତା ରଖିବେ। ପରୀକ୍ଷା କେନ୍ଦ୍ର ହୋଇଥିବା ସହରଗୁଡ଼ିକୁ ପୂର୍ବତଟ ରେଳପଥ ପକ୍ଷରୁ ୯ଟି ସ୍ୱତନ୍ତ୍ର ଟ୍ରେନ୍ ଚାଲିଛି। ବ୍ରହ୍ମପୁର, କେନ୍ଦୁଝରଗଡ଼, ଖରିଆର ରୋଡ୍‌, ଇଚ୍ଛାପୁରମ୍‌, କୋରାପୁଟ, ରାଉରକେଲା, ବାରିପଦା ଓ ବିଜୟୱାଡାରୁ ଛାଡ଼ିଥିବା ଟ୍ରେନ୍‌ଗୁଡ଼ିକ ସନ୍ଧ୍ୟା ସୁଦ୍ଧା ପରୀକ୍ଷା କେନ୍ଦ୍ର ହୋଇଥିବା ସହରରେ ପହଞ୍ଚି ଯାଇଥିବା ପୂର୍ବତଟ ରେଳପଥ ପକ୍ଷରୁ ସୂଚନା ଦିଆଯାଇଛି। ପରୀକ୍ଷା ସରିବା ପରେ ଏହି ଟ୍ରେନ୍‌ଗୁଡ଼ିକ ରବିବାର ପ୍ରତ୍ୟାବର୍ତନ କରିବ। କଟକ-ବ୍ରହ୍ମପୁର ମେମୁ ରାତି ୭ଟାରେ ଛାଡ଼ିବାକୁ ଥିବା ବେଳେ କଟକ-କେନ୍ଦୁଝରଗଡ଼ ରାତି ୮ଟା, ସମ୍ବଲପୁର-ଖରିଆର ରୋଡ ରାତି ୧୧ଟା, ବିଶାଖାପାଟଣା-ଇଚ୍ଛାପୁରମ୍‌ ରାତି ୭ଟା ୩୦, କଟକ-କୋରାପୁଟ ଭୟା ସମ୍ବଲପୁର ରାତି ୮ଟା ୧୫, ବିଶାଖାପାଟଣା-କୋରାପୁଟ ରାତି ୯ଟା ୪୦, କଟକ-ରାଉରକେଲା ରାତି ୮ଟା ୫୫, କଟକ-ବାରିପଦା ସନ୍ଧ୍ୟା ୬ଟା ୪୦, ବିଶାଖାପାଟଣା-ବିଜୟୱାଡା ରାତି ୮ଟା ୩୦ରେ ନିର୍ଦ୍ଧାରିତ ଷ୍ଟେସନ୍‌ରୁ ଛାଡ଼ିବ।

Advertisment