ପୂର୍ବ ଶତ୍ରୁତାକୁ କେନ୍ଦ୍ର କରି ୨ ପରିବାର ମଧ୍ୟରେ ସଂଘର୍ଷ; ୪ ଆହତ, ୧ ଗୁରୁତର
କଣ୍ଟାମାଳ : ବୌଦ୍ଧ ଜିଲ୍ଲା ମନମୁଣ୍ଡା ଥାନା ପଲସାଗୋରା ପଞ୍ଚାୟତ କୁଣ୍ଡାମାଲ ଗ୍ରାମରେ ପାଣି ନେବାକୁ କେନ୍ଦ୍ର କରି ଗୋଷ୍ଠୀ ସଂଘର୍ଷ ଘଟିଛି। ଏହି ସଂଘର୍ଷରେ ଉଭୟ ପକ୍ଷରୁ ୪ ଜଣ ଆହତ ହୋଇଛନ୍ତି। ତନ୍ମଧ୍ୟରୁ ଜଣେ ଗୁରୁତର ଆହତ ହୋଇ ସୋନପୁର ଡାକ୍ତରଖାନାରେ ଚିକିତ୍ସିତ ହେଉଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ପୁଲିସ ସୂତ୍ରରୁ ପ୍ରକାଶ ଯେ, ଅନେକ ଦିନରୁ ଶ୍ରୀଦେବୀ ସୁନାଙ୍କ ପରିବାର ଓ ଅଜୁ ସୁନାଙ୍କ ପରିବାର ମଧ୍ୟରେ ତିକ୍ତତା ଲାଗି ରହି ଆସିଛି। ଗୁରୁବାର ଅପରାହ୍ଣ ୪ଟାରେ ପାନୀୟ ଜଳ ପ୍ରକଳ୍ପରୁ ପାଣି ନେବାକୁ କେନ୍ଦ୍ର କରି ଉଭୟ ପରିବାର ମଧ୍ୟରେ ଘମାଘୋଟ ଲଢେ଼ଇ ହୋଇଛି। ଉଭୟ ପରିବାର ପକ୍ଷରୁ କ୍ରିକେଟ ବ୍ୟାଟ ଓ ବାଡ଼ିରେ ମାଡ଼ ମାରିଥିବା ମନମୁଣ୍ଡା ଥାନାରେ ଅଭିଯୋଗ ହୋଇଛି। ଶ୍ରୀଦେବୀ ୧୦୦ ନମ୍ବରକୁ ଫୋନ କରି ଜଣାଇଲା ପରେ ମନମୁଣ୍ଡା ପୁଲିସ ଘଟଣାସ୍ଥଳକୁ ଯାଇ ଆହତଙ୍କୁ ଉଦ୍ଧାର କରିଛି। ଏହି ଗ୍ରାମର ଅଜୁ ସୁନା(୩୨) ଓ ତା’ ଭାଇ ରଜୁ ସୁନା(୩୬) ମିଶି ତାଙ୍କ ପରିବାର ଲୋକଙ୍କୁ ମାଡ଼ ମାରି ଲହୁଲୁହାଣ କରିଥିବା ଶ୍ରୀଦେବୀ ମନମୁଣ୍ଡା ଥାନାରେ ଅଭିଯୋଗ କରିଛନ୍ତି। ଏହି ଅଭିଯୋଗକୁ ଭିତ୍ତିକରି ମନମୁଣ୍ଡା ଥାନାରେ କେସ ନମ୍ବର ୧୦୮/୨୦୨୧ରେ ଏକ ମାମଲା ରୁଜୁ କରାଯାଇଛି।
ଅନ୍ୟ ପକ୍ଷରେ ଏହି ଗ୍ରାମର କପିଳେଶ୍ୱର ସୁନା, ରିକେଶ ସୁନା ଓ ରଶ୍ମିତା ସୁନା ମିଶି ଗ୍ରାମର ଅଜୁ ଓ ରଜୁଙ୍କୁ ମରଣାନ୍ତକ ଆକ୍ରମଣ କରିଥିବା ଅଜୁ ଅଭିଯୋଗ କରିଛନ୍ତି। ଏହି ଅଭିଯୋଗକୁ ଆଧାର କରି ୧୦୯/୨୦୨୧ରେ ଏକ ମାମଲା ରୁଜୁ କରାଯାଇଛି। ଏହି ସଂଘର୍ଷରେ ରାଜୁ, କପିଳେଶ୍ୱର ଓ ରିକେଶ ଆହତ ହୋଇଥିବା ବେଳେ ଅଜୁ ଗୁରୁତର ଆହତ ହୋଇ ପ୍ରଥମେ ମନମୁଣ୍ଡା ଓ ପରେ ଆମ୍ବୁଲାନ୍ସ ଯୋଗେ ସୋନପୁରକୁ ନେଇ ଡାକ୍ତରଖାନାରେ ଚିକିତ୍ସିତ ହେଉଥିବା ଜଣାପଡ଼ିଛି। ଘଟଣାର ତଦନ୍ତ ଚାଲିଥିବା ତଦନ୍ତକାରୀ ପୁଲିସ ଅଧିକାରୀ ସନ୍ତୋଷ ମହାକୁଡ଼ କହିଛନ୍ତି।