ରେଳଲାଇନ୍‌ ନିର୍ମାଣରୁ ଖଣ୍ଡଯୁଦ୍ଧ ଘଟଣା: ସଂଶୋଧନ ହେଲା ଲିଖିତ ପ୍ରତିଶ୍ରୁତି

ରାଉରକେଲା/ବନ୍ଧମୁଣ୍ଡା: ରବିବାର ରାତି ପ୍ରାୟ ୧୧ଟାରେ ଲିଖିତ ପ୍ରତିଶ୍ରୁତି ମିଳିବା ପରେ ଜେସିବି ଧକ୍କାରେ ପ୍ରାଣ ହରାଇଥିବା ଏତୋ ଏକ୍କାଙ୍କ ଶବ ଉଠିଥିଲା। ଜିଲ୍ଲା ପ୍ରାଶାସନିକ ଅଧିକାରୀଙ୍କ ଉପସ୍ଥିତିରେ ଆର୍‌ଏସ୍‌ପି ପକ୍ଷରୁ ମୃତକଙ୍କ ପରିବାରକୁ ଲିଖିତ ପ୍ରତିଶ୍ରୁତି ଦିଆଯାଇଥିଲା। ଯେଉଁ ଲିଖିତ ପ୍ରତିଶ୍ରୁତି ଚିଠି ଦିଆଯାଇଥିଲା, ସେଥିରେ ଆର୍‌ଏସ୍‌ପି କର୍ତ୍ତୃପକ୍ଷଙ୍କ ନାଁ କିମ୍ବା ଷ୍ଟାମ୍ପ ରହିନଥିଲା। ଯାହାକୁ ନେଇ ପ୍ରଶ୍ନ ଉଠାଇଥିଲେ ମୃତକଙ୍କ ପରିବାର ଓ ତାଙ୍କ ସମ୍ପର୍କୀୟ। ଲିଖିତ ପ୍ରତିଶ୍ରୁତି ଚିଠି ସଂଶୋଧନ ନ ହେବା ପର୍ଯ୍ୟନ୍ତ ଶବ ବ୍ୟବଚ୍ଛେଦ କରାଯାଇପାରିବ ନାହିଁ ବୋଲି ପରିବାର ଲୋକ ଜିଦ୍‌ ଧରିବାରୁ ପୁଲିସ ପାଇଁ ଅଡୁଆ ପରିସ୍ଥିତି ସୃଷ୍ଟି ହୋଇଥିଲା। ପରେ ଆର୍‌ଏସ୍‌ପି କର୍ତ୍ତୃପକ୍ଷ ଲିଖିତ ପ୍ରତିଶ୍ରୁତି ଚିଠିକୁ ସଂଶୋଧନ କରିଥିଲେ। 

ଆଜି ହେବ ମୃତକଙ୍କ ଶବ ବ୍ୟବଚ୍ଛେଦ
ବିକ୍ଷୋଭକାରୀଙ୍କ ଧାରଣା ଜାରି

ସୋମବାର ପୂର୍ବାହ୍ନ ସାଢ଼େ ୧୨ଟାରେ ପରେ ବନ୍ଧମୁଣ୍ଡା ଥାନାରେ ରାଉରକେଲା ଏସ୍‌ପି ନିତେଶ ୱାଧୱାନୀଙ୍କ ଉପସ୍ଥିତିରେ ରାଉରକେଲା ତହସିଲଦାର ନିବେଦିତା ପ୍ରଧାନ ଓ ଆର୍‌ଏସ୍‌ପିର ସିଏସ୍‌ଆର୍‌ ଓ ଟାଉନ ବିଭାଗର ସିଜିଏମ୍‌ ପ୍ରତାପ ସ୍ୱାଇଁ ମୃତକଙ୍କ ପତ୍ନୀ ଅଞ୍ଜଳି ଏକ୍କାଙ୍କୁ ସଂଶୋଧିତ ଲିଖିତ ପ୍ରତିଶ୍ରୁତି ଚିଠି ପ୍ରଦାନ କରିଥିଲେ। ଚିଠିରେ ଉଲ୍ଲେଖ ରହିଛି ଯେ ରାଉରକେଲା ଇସ୍ପାତ କାରଖାନା ପକ୍ଷରୁ ମୃତକଙ୍କ ପତ୍ନୀ ଅଞ୍ଜଳି ଏକ୍କାଙ୍କୁ ୧୬ ଲକ୍ଷ ଟଙ୍କା ଓ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିରୁ ୪ ଲକ୍ଷ ଟଙ୍କା ପ୍ରଦାନ କରାଯିବ। ମୃତ ଏତୋଙ୍କ ଦୁଇପୁଅଙ୍କ ଶିକ୍ଷାଖର୍ଚ୍ଚ ଆର୍‌ଏସ୍‌ପି ବହନ କରିବ। ମୃତକଙ୍କ ପତ୍ନୀ ଅଞ୍ଜଳିଙ୍କୁ ଆର୍‌ଏସ୍‌ପିରେ ସ୍ଥାୟୀ ଚାକିରି ମିଳିବ। ରାଉରକେଲା ଆପୋଲୋ ହସ୍ପିଟାଲରେ ଚିକିତ୍ସାଧୀନ ସୁରା କୁଜୁରଙ୍କ ସମସ୍ତ ଚିକିତ୍ସା ଖର୍ଚ୍ଚ ଆର୍‌ଏସ୍‌ପି ବହନ କରିବ। 

ଅନ୍ୟପକ୍ଷରେ ରେଳ ଲାଇନ୍‌କୁ ବିରୋଧ କରି ଗତ ଅଢ଼େଇ ମାସ ଧରି ଚାଲିଥିବା ଧାରଣା ଜାରି ରହିଛି। ଯେ ପର୍ଯ୍ୟନ୍ତ ରେଳଲାଇନ୍‌ କାମ ବନ୍ଦ ନ ହୋଇଛି ଏବଂ ବିସ୍ଥାପିତ ପରିବାରକୁ ନିଯୁକ୍ତି ନ ମିଳିଛି, ସେ ପର୍ଯ୍ୟନ୍ତ ଧାରଣା ଜାରି ରହିବ ବୋଲି ବି‌କ୍ଷୋଭକାରୀ କହିଛନ୍ତି। ଉଲ୍ଲେଖଯୋଗ୍ୟ, ଗତ ଶନିବାର ରେଳଲାଇନ ନିର୍ମାଣବେଳେ ପୁଲିସ-ବରକାନିବାସୀଙ୍କ ମଧ୍ୟରେ ଖଣ୍ଡଯୁଦ୍ଧ ହୋଇଥିଲା। ଆନ୍ଦୋଳନକାରୀଙ୍କ ଉପରେ ଜେସିବି ଚଢ଼ିଯିବାରୁ ଘଟଣାସ୍ଥଳରେ ଏତୋ ଏକ୍କା (୩୭)ଙ୍କ ମୃତ୍ୟୁ ହୋଇଥିଲା। ଏତୋଙ୍କ ମୃତ୍ୟୁ ପରେ ଉତ୍ତ୍ୟକ୍ତ ଗ୍ରାମବାସୀ ପଥର ମାଡ଼ କରିବା ସହ ମାଜିଷ୍ଟ୍ରେଟ୍‌ ଭାବେ ଉପସ୍ଥିତ ଥିବା ଅତିରିକ୍ତ ତହସିଲଦାର, ସୁରକ୍ଷା ଦାୟିତ୍ବରେ ଥିବା ପୁଲିସକର୍ମୀ, ଆର୍‌ଏସ୍‌ପି ଅଧିକାରୀ ଏବଂ ଜେସିବି ଚାଳକଙ୍କୁ ନିସ୍ତୁକ ମାଡ଼ ମାରିଥିଲେ। ବହୁ ବୁଝାସୁଝା ପରେ ଗତକାଲି ରାତି ପ୍ରାୟ ୧୧ଟାରେ ପରିବାର ଲୋକ ଶବ ଉଠାଇଥିଲେ।