ବିଡିଓଙ୍କୁ ଦୁର୍ବ୍ୟବହାର, କିରାଣି ନିଲମ୍ବିତ
କାଳିଆପାଣି : ସୁକିନ୍ଦା ବ୍ଲକ ଚିଙ୍ଗୁଡ଼ିପାଳ ସୌରିକ ହାଇସ୍କୁଲ ପରିସରରେ ବିଡିଓ ତାପସ କୁମାର ସେଠୀଙ୍କୁ ଦୁର୍ବ୍ୟବହାର ଅଭିଯୋଗରେ ସଂପୃକ୍ତ ହାଇସ୍କୁଲର କିରାଣି ଖଗେଶ୍ବର ମହାନ୍ତ ଓ ପ୍ରଧାନଶିକ୍ଷକ ଶରତ କୁମାର ମହାନ୍ତଙ୍କ ଉପରେ ବିଭାଗୀୟ କାର୍ଯ୍ୟାନୁଷ୍ଠାନ ହୋଇଛି। ଜିଲ୍ଲା ଶିକ୍ଷା ଅଧିକାରୀ(ଡିଇଓ) ରଞ୍ଜନ କୁମାର ଗିରିଙ୍କ ନିର୍ଦେଶନାମା ବିଜ୍ଞପ୍ତି ନଂ ୫୨୦୩/୨୩-୦୫-୨୦୨୨ ଆଧାରରେ କନିଷ୍ଠ କିରାଣି ଖଗେଶ୍ବର ମହାନ୍ତଙ୍କୁ ନିଲମ୍ବିତ କରାଯାଇଛି। ସେହିପରି ଡିଇଓ ଅଫିସ ନିର୍ଦେଶନାମା ୫୨୧୦/୨୩-୦୫-୨୦୨୨ ଆଧାରରେ ପ୍ରଧାନଶିକ୍ଷକ ଶରତ କୁମାର ମହାନ୍ତଙ୍କୁ କାରଣ ଦର୍ଶାଅ ନୋଟିସ୍ ଜାରି କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଚିଠିରେ ଦର୍ଶାଯାଇଛି ଯେ, ଗତ ୧୮ ତାରିଖ ଦିନ ସ୍କୁଲରେ ଜାରି ରହିଥିବା ୫-ଟି ରୂପାନ୍ତରଣ କାର୍ଯ୍ୟ ତଦାରଖ ପାଇଁ ବିଡିଓ ଶ୍ରୀ ସେଠୀ ଓ ସହକାରୀ ଯନ୍ତ୍ରୀ ସ୍କୁଲ୍ ପରିଦର୍ଶନରେ ଯାଇଥିବା ସମୟରେ ଗଣମାଧ୍ୟମ ପ୍ରତିନିଧି ଓ ସ୍ଥାନୀୟ ବ୍ୟକ୍ତିଙ୍କ ସମ୍ମୁଖରେ କିରାଣି ଶ୍ରୀ ମହାନ୍ତ ବିଡିଓଙ୍କ ପ୍ରତି କୁଭାଷା ପ୍ରୟୋଗ କରିବା ସହ ବଡ଼ପାଟିରେ ଯୁକ୍ତିତର୍କ କରିଥିଲେ । ପ୍ରଧାନଶିକ୍ଷକ ଓ କିରାଣି ଦ୍ବୟ ଗଣମାଧ୍ୟମ ପ୍ରତିନିଧି ଓ ସ୍ଥାନୀୟ ଲୋକଙ୍କୁ ଉସୁକାଇ ସ୍କୁଲର ଉନ୍ନତିମୂଳକ କାର୍ଯ୍ୟରେ ବାଧା ପହଞ୍ଚାଇଥିବା ଚିଠିରେ ଉଲ୍ଲେଖ ରହିଛି। ସରକାରୀ ବେତନ ଭୋଗୀ କର୍ମଚାରୀ ଭାବେ କର୍ତ୍ତବ୍ୟରତ ବିଡିଓ ଓ ସହକାରୀ ଯନ୍ତ୍ରୀଙ୍କୁ ଦୁର୍ବ୍ୟବହାର ଓଡ଼ିଶା ସରକାର କର୍ମଚାରୀ ଅନୁଶାସନ ଆଇନ-୧୯୫୯କୁ ଉଲଂଘନ କରୁଥିବା ଚିଠିରେ ଦର୍ଶାଯାଇଛି। ସରକାରୀ କର୍ମଚାରୀ ଅନୁଶାସନ ଆଇନ-୧୯୫୯ର ଧାରା-୪ ଆଧାରରେ କିରାଣି ଶ୍ରୀ ମହାନ୍ତଙ୍କୁ ନିଲମ୍ବିତ କରାଯାଇଥିବା ଦର୍ଶାଯାଇଛି। ସୌରିକ ହାଇସ୍କୁଲ ତାଙ୍କ ହେଡ୍ କ୍ବାର୍ଟର୍ସ ରହିବ ଏବଂ ସରକାରୀ ନିୟମାନୁଯାୟୀ ସେ ଭତ୍ତା ପାଇବେ ବୋଲି ଚିଠିରେ ନିର୍ଦେଶ ରହିଛି।
ଏ ସଂପର୍କରେ ବିଡିଓ ଶ୍ରୀ ସେଠୀଙ୍କୁ ଯୋଗାଯୋଗ କରାଯିବାରେ ସୌରିକ ହାଇସ୍କୁଲ କିରାଣିଙ୍କୁ ନିଲମ୍ବନ ଓ ପ୍ରଧାନଶିକ୍ଷକଙ୍କୁ କାରଣ ଦର୍ଶାଅ ନୋଟିସ୍ ଜାରି ହୋଇଥିବା ସେ କହିଥିଲେ। ଅନ୍ୟପକ୍ଷରେ ସଂପୃକ୍ତ କନିଷ୍ଠ କିରାଣି ଓ ପ୍ରଧାନଶିକ୍ଷକଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ କୌଣସି ପ୍ରତିକ୍ରିୟା ମିଳି ପାରିନଥିଲା।