ଉଦଯାପିତ ହେଲା ରାଜ୍ୟସ୍ତରୀୟ ଆମ୍ବ ମେଳା : ଭୁବନେଶ୍ୱରରେ ଆୟୋଜିତ ହୋଇଥିବା ରାଜ୍ୟସ୍ତରୀୟ ଆମ୍ବ ମେଳାରେ ୫ ଦିନରେ ବିକ୍ରି ହେଲା ୩୬ ମେଟ୍ରିକ୍ ଟନ୍ ଆମ୍ବ
ଭୁବନେଶ୍ୱର : ଉଦଯାପିତ ହେଲା ରାଜ୍ୟସ୍ତରୀୟ ଆମ୍ବ ମେଳା । ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଏବଂ ଓରମାସ ତରଫରୁ ଭୁବନେଶ୍ୱରରେ ଆୟୋଜିତ ହୋଇଥିବା ରାଜ୍ୟସ୍ତରୀୟ ଆମ୍ବ ମେଳା ବୁଧବାର ଉଦଯାପିତ ହୋଇଛି । ଏହି ମେଳାକୁ ସଫଳ କରିଥିବାରୁ ଆମ୍ବ ଚାଷୀ ତଥା ଆମ୍ବ ଉତ୍ପାଦକ ଗୋଷ୍ଠୀଙ୍କୁ ଧନ୍ୟବାଦ ଜଣାଇଥିଲା ଓରମାସ।
Sambad is now on WhatsApp
Join and get latest news updates delivered to you via WhatsApp
କେବଳ ଆମ୍ବ ନୁହେଁ ଆଗାମୀ ଦିନରେ ସପୁରୀ ଓ ପିଜୁଳି ଆଦି ଫଳକୁ ନେଇ ଏଭଳି ମେଳା ଆୟୋଜନ କରିବାକୁ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ପକ୍ଷରୁ ଚାଷୀମାନଙ୍କୁ ପରାମର୍ଶ ଦିଆଯାଇଥିଲା। ଭୁବନେଶ୍ୱରରେ ଆୟୋଜିତ ହୋଇଥିବା ଏହି ଆମ୍ବ ମେଳା ସ୍ମାର୍ଟସିଟିବାସୀଙ୍କ ମଧ୍ୟରେ ବେଶ ଆଦୃତ ହୋଇପାରିଥିଲା।
ଗତ ୧ ତାରିଖରୁ ଆରମ୍ଭ ହୋଇଥିବା ଏହି ଆମ୍ବ ମେଳାରେ ବିଭିନ୍ନ କିସମର ଆମ୍ବ ଦେଖିବାକୁ ମିଳିଥିଲା । ଏହି ଆମ୍ବ ମେଳାରେ ୯ ଜିଲ୍ଲାରୁ ଆମ୍ବ ଚାଷୀ ଓ ଉତ୍ପାଦକ ଗୋଷ୍ଠୀ ସାମିଲ ହୋଇଥିଲେ । ପୂର୍ବରୁ ଏହି ଆମ୍ବ ମେଳାକୁ ପଞ୍ଚାୟତିରାଜ ଓ ପାନୀୟ ଜଳ ମନ୍ତ୍ରୀ ଉଦଘାଟନ କରିବା ସହ ଆମ୍ବ ଷ୍ଟଲ ବୁଲି ଦେଖିଥିଲେ । ଏପରିକି ଚାଷୀ ମାନଙ୍କ ସହ ଆଲୋଚନା ପରେ ରାଜ୍ୟର ଫଳ ଚାଷୀ ଓ ଉତ୍ପାଦକ ଗୋଷ୍ଠୀ ଦ୍ୱାରା ପ୍ରସ୍ତୁତ ସାମଗ୍ରୀ ଗୁଡିକର ଉପଯୁକ୍ତ ବଜାର ସୁବିଧା ଯୋଗାଇଦେବା ପାଇଁ ଓରମାସ୍ ତରଫରୁ ସବୁ ଜିଲ୍ଲା ମୁଖ୍ୟାଳୟରେ ଅତ୍ୟାଧୁନିକ ବିକ୍ରୟ କେନ୍ଦ୍ର ଖୋଲିବାକୁ ନିର୍ଦ୍ଦେଶ ଦେଇଥିଲେ। ଏହି ୫ ଦିନିଆ ଆମ୍ବ ମେଳାରେ ପ୍ରାୟ ୩୬ ମେଟ୍ରିକ ଟନ୍ ଆମ୍ବ ବିକ୍ରି କରିଥିଲେ ଚାଷୀ।