ନୂଆଦିଲ୍ଲୀ: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିଲ୍ଲୀରେ ‘୫-ଟି’ ସମୀକ୍ଷା କରିଛନ୍ତି। ନବୀନ ବିଭିନ୍ନ କେନ୍ଦ୍ରୀୟ ଅନୁଦିତ ଯୋଜନା (ସିଏସଏସ୍) ଏବଂ କେନ୍ଦ୍ରୀୟ ପାଣ୍ଠିର ସ୍ଥିତି ସମ୍ପର୍କରେ ସମୀକ୍ଷା କରିଛନ୍ତି। ଓଡ଼ିଶା ଭବନ ଠାରେ ହୋଇଥିବା ବୈଠକରେ ‘୫-ଟି’କୁ ଗୁରୁତ୍ୱ ଦେଇ କେନ୍ଦ୍ରର ବିଭିନ୍ନ ଯୋଜନାରେ ରାଜ୍ୟରେ ଆବଶ୍ୟକୀୟ ହେଉଥିବା ଅନେକ ପ୍ରକଳ୍ପ ପାଇଁ ପାଣ୍ଠିର ପୂରା ହିସାବ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ନବୀନ ଏହି ବୈଠକରେ କେନ୍ଦ୍ରୀୟ ଅନୁଦିତ ଯୋଜନା ମଧ୍ୟରେ ବକେୟାଥିବା ଅର୍ଥ ୭ ହଜାର ୫ଶହ ୪୪କୋଟି ଟଙ୍କା ମଞ୍ଜୁର କରିବାକୁ କେନ୍ଦ୍ରୀୟ ଅଧିକାରୀଙ୍କୁ ଅବଗତ କରାଇଥିଲେ। ତେବେ ମନରେଗା, ପିଏମଏୱାଇ, ଏନ.ଏସ.ଏପି, ପିଏମଜିଏସୱାଇ ଭଳି ଲୋକାଭିମୁଖୀ ଯୋଜନା ପାଇଁ ପାଖାପାଖି ୬ ହଜାର କୋଟି ଟଙ୍କା ଆବଶ୍ୟକ ରହିଛି ବୋଲି କେନ୍ଦ୍ରର ବିଭିନ୍ନ ଅଧିକାରୀଙ୍କୁ ବୈଠକରେ ଜଣାଇଛନ୍ତି।
ଏହା ସହ ନବୀନ ‘୫-ଟି’ କାର୍ଯ୍ୟକ୍ରମର ସଫଳ ରୂପାୟନ ନେଇ ପ୍ରଥମିକତା ଦେଇଛନ୍ତି। ତେଣୁ ଏ ଦିଗରେ ଅଧିକ ଧ୍ୟାନ ଦେବାକୁ ଦିଲ୍ଲୀ ଆବାସିକ କମିସନର, ସ୍ପେଶାଲ କମିସନରଙ୍କ ସହ ଅନ୍ୟାନ୍ୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି । ଦିଲ୍ଲୀରେ ପ୍ରସ୍ତାବିତ ଓଡ଼ିଶା ସଂସ୍କୃତି କେନ୍ଦ୍ର ପାଇଁ ଜାଗା ଆବଣ୍ଟନ କାର୍ଯ୍ୟ ଉପରେ ମଧ୍ୟ ଗୁରୁତ୍ୱ ଦେଇ ଏଦିଗରେ ଉଚିତ୍ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଛନ୍ତି । ଅନ୍ୟପଟେ ଦିଲ୍ଲୀ ଓଡ଼ିଶା ଭବନରେ ହୋଇଥିବା ଏହି ସମୀକ୍ଷା ବୈଠକରେ ୫-ଟି ସଚିବ ଭି.କେ ପାଣ୍ଡିଆନଙ୍କ ସମେତ ଆବାସିକ କମିସନର ସହ ବିଭିନ୍ନ ବିଭାଗର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।