ଟମକା/କାଳିଆପାଣି: ଡ୍ରାଇଭରକୁ ମାଡ଼ମାରି କୋଇଲା ବୋଝେଇ ଟ୍ରକ୍ ଲୁଟିନେଇ ପଳାଉଥିବା ବେଳେ ଟମକା ପୁଲିସ ଏହାକୁ ପାଣିକୋଇଲିରୁ ଜବତ କରିଛି। ଏହି ଟ୍ରକ୍(ଓଡି-୩୪ଇ-୧୪୭୨)ରେ ୨୬ ରୁ ୨୮ ଟନ୍ କୋଇଲା ବୋଝେଇ ହୋଇଥିଲା। ଏହାର ମୂଲ୍ୟ ଅଢ଼େଇ ଲକ୍ଷ ଟଙ୍କାରୁ ଅଧିକ ହେବ। ତାଳଚେର କୋଇଲା ଖଣି ଅଞ୍ଚଳରୁ ଟମକା ରେଳବାଇ ପ୍ଲଟ୍କୁ ଆସିଥିବା ଏହି ଟ୍ରକ୍କୁ ଲୁଟେରା ଗ୍ୟାଙ୍ଗ୍ ପିଛା କରିଥିଲେ। ଗନ୍ତବ୍ୟ ସ୍ଥଳରେ ପହଞ୍ଚିବା ପୂର୍ବରୁ ୪ ଜଣ ଲୁଟେରା ତାଙ୍କୁ ମାଡ଼ମାରି ଚାବି ଛଡ଼ାଇ ନେଇ ଟ୍ରକ୍କୁ ଭଦ୍ରକ ଅଭିମୁଖେ ଧରି ପଳାଉଥିଲେ ବୋଲି ଡ୍ରାଇଭର ଅଭିଯୋଗ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ବିଶେଷ ସୂତ୍ରରୁ ଖବରପାଇ ଥାନା ଅଧିକାରୀ ସୁକାନ୍ତ କୁମାର ପାତ୍ର ପାଣିକୋଇଲିରେ ଉକ୍ତ ଟ୍ରକ୍କୁ ଗୋଡ଼ାଇ ଧରିଥିଲେ। ୨ ଜଣ ଅଭିଯୁକ୍ତ ପୁଲିସ ପଞ୍ଝାରେ ପଡ଼ିଥିବା ବେଳେ ଅନ୍ୟ ୨ ଜଣ ବାଇକ୍ ନମ୍ବର ଓଡି-୩୪ଏଲ୍-୧୧୮୯ରେ ଘଟଣାସ୍ଥଳରୁ ଚମ୍ପଟ୍ ମାରିଥିଲେ। ଅଭିଯୁକ୍ତମାନେ ନିଜକୁ ଏକ ଫାଇନାନ୍ସ କମ୍ପାନିର କର୍ମଚାରୀ ବୋଲି ସଫେଇ ଦେଉଥିବା ସ୍ଥଳେ ଡ୍ରାଇଭର ଓ ଅଭିଯୁକ୍ତମାନଙ୍କ ମଧ୍ୟରେ ତାଳମେଳ ରହୁନଥିବା ପୁଲିସ କହିଛି। ଏହାକୁ ନେଇ ଥାନାରେ ଅଭିଯୋଗ ହେବା ପରେ ନମ୍ବର ୮୫/୨୨ରେ ଏକ ମାମଲା ରୁଜୁ ହୋଇଛି ବୋଲି ଥାନା ଅଧିକାରୀ ଶ୍ରୀ ପାତ୍ର କହିଛନ୍ତି। ଟମକା କୋଇଲା ପ୍ଲଟ୍ରେ ଚୋରା କୋଇଲା କାରବାର ହୋଇଆସୁଥିବା ନେଇ ସ୍ଥାନୀୟ ଅଞ୍ଚଳବାସୀ ଅଭିଯୋଗ କରନ୍ତି।