ଆସନ୍ତା ୨ ଦିନ ଶୁଖିଲା ପାଗ, ୨୫ ଓ ୨୬ରେ ଉପକୂଳ ଓ ଆଭ୍ୟନ୍ତରରେ ବର୍ଷା
ଭୁବନେଶ୍ବର : ଅଗଷ୍ଟ ଆରମ୍ଭରୁ ରାଜ୍ୟରେ ମୌସୁମୀ-ବିରତି ସ୍ଥିତି ଜାରି ରହିଛି। ଫଳରେ ଅଗଷ୍ଟରେ ଯେତିକି ବର୍ଷ ହେବା କଥା ଏଯାଏ ଏହାର ଅଧା ବର୍ଷା ବି ହୋଇନାହିଁ। ଆସନ୍ତା ୨ ଦିନ ପର୍ଯ୍ୟନ୍ତ ରାଜ୍ୟରେ ଏହିଭଳି ସ୍ଥିତି ଜାରି ରହିବ। ପାଗ ଶୁଖିଲା ଓ ଖରାଟିଆ ରହିବ। ୨୫ ଓ ୨୬ ତାରିଖ ଆଡ଼କୁ ଉପକୂଳ ଓ ସଂଲଗ୍ନ ଆଭ୍ୟନ୍ତରୀଣ ଓଡ଼ିଶାରେ ବର୍ଷା ହେବାର ସମ୍ଭାବନା ରହିଛି।
Sambad is now on WhatsApp
Join and get latest news updates delivered to you via WhatsApp
ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ରର ସୂଚନା ମୁତାବକ, ମୌସୁମୀଜନିତ ନିମ୍ନ ଚାପରେଖା ରାଜସ୍ଥାନର ବିକାନେରରୁ ବାହାରି ଶିବପୁରୀ, ପାଟଣା ଓ ବାଲୁରଘାଟ ମଧ୍ୟ ଦେଇ ପୂର୍ବରେ ଏହା ନାଗାଲାଣ୍ଡ ଯାଏ ଲମ୍ବିଛି। ଏହି ନିମ୍ନ ଚାପରେଖାର ପୂର୍ବ ଭାଗ ଏହାର ସାଧାରଣ ଅବସ୍ଥାନଠାରୁ ଉତ୍ତରରେ ରହୁଥିବାରୁ ମୌସୁମୀ ପ୍ରବାହ ଓଡ଼ିଶା ଉପରେ ଦୁର୍ବଳ ରହିଛି। ଏହି ପରିସ୍ଥିତି ରାଜ୍ୟରେ ଆସନ୍ତା ୩ ଦିନ ପର୍ଯ୍ୟନ୍ତ ଲାଗି ରହିବ। ୨୫ ତାରିଖ ବେଳକୁ ଉପକୂଳ ଓଡ଼ିଶା ମଧ୍ୟ ଦେଇ ଏକ ଉତ୍ତର-ଦକ୍ଷିଣ ନିମ୍ନ ଚାପରେଖା ଉପକୂଳ ଅଞ୍ଚଳକୁ ଅତିକ୍ରମ କରିବାର ସମ୍ଭାବନା ରହୁଛି। ଏହାର ପ୍ରଭାବରେ ମୌସୁମୀଜନିତ ନିମ୍ନ ଚାପରେଖା ଧୀରେଧୀରେ ଦକ୍ଷିଣ ଆଡ଼କୁ ଗତି କରି ସାଧାରଣ ଅବସ୍ଥାନକୁ ଫେରିବାର ସମ୍ଭାବନା ଥିବାରୁ ୨୫ ଓ ୨୬ ତାରିଖରେ ଓଡ଼ିଶାର ଉପକୂଳ ଓ ସଂଲଗ୍ନ ଆଭ୍ୟନ୍ତରୀଣ ଅଞ୍ଚଳରେ ବିଜୁଳି, ଘଡ଼ଘଡ଼ି ସହ ବର୍ଷା ହେବ। ଏହାସହିତ ଉପକୂଳ ଅଞ୍ଚଳର କିଛି କିଛି ସ୍ଥାନରେ ପ୍ରବଳ ବର୍ଷାର ମଧ୍ୟ ସମ୍ଭାବନା ରହିଛି। ଏଣୁ ୨୫ ଓ ୨୬ ତାରିଖ ପାଇଁ ରାଜ୍ୟର ବିଭିନ୍ନ ସ୍ଥାନରେ ୟେଲୋ ୱାର୍ଣ୍ଣିଂ ଜାରି କରିଛି ପାଣିପାଗ କେନ୍ଦ୍ର।
୧ ଜୁନ୍ରୁ ୨୨ ଅଗଷ୍ଟ ମଧ୍ୟରେ ଓଡ଼ିଶାରେ ପାଖାପାଖି ୫୮୩.୭ ମିମି ବର୍ଷା ରେକର୍ଡ ହୋଇଯାଇଛି; ଯାହାକି ସ୍ବାଭାବିକ ବର୍ଷା ୮୩୬.୨ ମିମିଠାରୁ ୩୦% କମ୍ । ଅର୍ଥାତ ଏହା ନିଅଣ୍ଟିଆର ପରିସରଭୁକ୍ତ ରହିଛି। ଏହି ସମୟ ପରିଧି ମଧ୍ୟରେ ପାଖାପାଖି ୨୭ଟି ଜିଲ୍ଲାରେ ବର୍ତ୍ତମାନ ସୁଦ୍ଧା ନିଅଣ୍ଟିଆ ବର୍ଷା ରେକର୍ଡ କରାଯାଇଛି। ସର୍ବାଧିକ ପ୍ରଭାବିତ ଭାବେ ୫ ଜିଲ୍ଲାରେ ୪୦% କିମ୍ବା ଏହାଠାରୁ ଅଧିକ ନିଅଣ୍ଟିଆ ବର୍ଷା ରେକର୍ଡ ହୋଇଛି। ସବୁଠାରୁ ଅଧିକ ପ୍ରଭାବିତ ହୋଇଛି ଯାଜପୁର ଜିଲ୍ଲା। ଏଠାରେ ୫୪% କମ୍ ବର୍ଷା, ଭଦ୍ରକରେ ୫୦% ନିଅଣ୍ଟିଆ, ବଲାଙ୍ଗୀର ୪୩%, କେନ୍ଦୁଝର ୪୨% ଓ ଅନୁଗୁଳଠାରେ ୪୦% କମ୍ ବର୍ଷା ରେକର୍ଡ କରାଯାଇଛି। ଭୁବନେଶ୍ବର ଓ କଟକର ଆକାଶ ଆଜି ଆଂଶିକ ମେଘାଚ୍ଛନ୍ନ ରହିଥିଲା। ଏଥିସହ ଅପରାହ୍ନରେ ହାଲୁକା ବର୍ଷା ହୋଇଥିବା ରେକର୍ଡ ହୋଇଛି।