ତାପମାତ୍ରା ୧.୫° ଯାଏଁ ବଢ଼ିଲା : ତଥାପି ଥରୁଛି ରାଜ୍ୟ
ଦାରିଙ୍ଗିବାଡ଼ିରେ ୫°, ଫୁଲବାଣୀରେ ୭.୫°
ଭୁବନେଶ୍ୱର : ଗତ ଦୁଇଦିନ ହେଲା ହାରାହାରି ସର୍ବନିମ୍ନ ତାପମାତ୍ରା ବଢ଼ିଚାଲିଛି। କୁହୁଡ଼ି, ବାୟୁମଣ୍ଡଳରେ ଜଳୀୟବାଷ୍ପର ପରିମାଣ, କେତେକାଂଶରେ ସାମୁଦ୍ରିକ ବାୟୁ ପ୍ରବାହ ଆଦି କାରଣରୁ ବୃଦ୍ଧି ପାଉଛି ସର୍ବନିମ୍ନ ତାପମାତ୍ରା। ଗତକାଲି ତୁଳନାରେ ୦.୫ରୁ ୧.୫° ଯାଏଁ ବଢ଼ିଛି ଆଜିର ପାରଦ। ଏହାର ପ୍ରଭାବରେ ଭୀଷଣ ଜାଡ଼ ଅନୁଭୂତ ହେଉନାହିଁ ସତ, କିନ୍ତୁ ତା’ର ପ୍ରକୋପ ଲାଗି ରହିଛି। ଆଜି ୧୦° ସେଲ୍ସିୟସ ବା ତା’ ତଳେ ରହିଛି ୪ଟି ସ୍ଥାନ।
Sambad is now on WhatsApp
Join and get latest news updates delivered to you via WhatsApp
ପାଣିପାଗ କେନ୍ଦ୍ର ସୂଚନା ଅନୁଯାୟୀ ଦିନର ତାପମାତ୍ରା ପ୍ରାୟତଃ ଅପରିବର୍ତିତ ଥିବା ବେଳେ ରାତିର ତାପମାତ୍ରା ବଢ଼ିବାକୁ ଲାଗିଛି। ଆଜି ବାୟୁମଣ୍ଡଳରେ ଜଳୀୟବାଷ୍ପ ପରିମାଣ ୪୦ରୁ ପ୍ରାୟ ୫୦ ପ୍ରତିଶତ ଯାଏଁ ବୃଦ୍ଧି ପାଇଛି। ଗତ କିଛି ଦିନ ହେଲା ଉତ୍ତର ପୂର୍ବ ଏବଂ ଦକ୍ଷିଣ ପଶ୍ଚିମ ଦିଗରୁ ସାମୁଦ୍ରିକ ପବନ ବହୁଛି। ଉତ୍ତର ଦିଗରୁ ବହୁଥିବା କାଲୁଆ ପବନ ତା’ର ଗତିପଥ ବଦଳାଇ କେନ୍ଦ୍ରୀୟ ଭାରତ ଦେଇ ପ୍ରବେଶ କରୁଛି ଓଡ଼ିଶାକୁ। ଏସବୁ କାରଣ ଯୋଗୁଁ ସର୍ବନିମ୍ନ ତାପମାତ୍ରା ବଢ଼ିବାକୁ ଲାଗିଛି। ତଥାପି ଅନୁଭୂତ ହେଉଛି ଥଣ୍ଡାର ପ୍ରକୋପ। ସାମୁଦ୍ରିକ ପବନ ବହୁଥିବାରୁ ରାଜ୍ୟରେ ବିଶେଷ କରି ଉପକୂଳବର୍ତୀ ଅଞ୍ଚଳରେ ତାପମାତ୍ରା ବଢ଼ିଥିବା ପରିଲକ୍ଷିତ ହୋଇଛି। ପଶ୍ଚିମ ଅଞ୍ଚଳରେ ଆପାତତଃ ଅପରିବର୍ତିତ ରହିଛି ଥଣ୍ଡା ପରିସ୍ଥିତି। ପାଣିପାଗ କେନ୍ଦ୍ର ନିର୍ଦେଶକ ଡ. ଶରତ ଚନ୍ଦ୍ର ସାହୁଙ୍କ କହିବାନୁସାରେ ସର୍ବନିମ୍ନ ତାପମାତ୍ରା ବଢ଼ିଥିଲେ ବି ଥଣ୍ଡା କମିନାହିଁ। ତାପମାତ୍ରାରେ ତାରତମ୍ୟ ଦେଖାଦେଇପାରେ। ତଥାପି ଆଗାମୀ ୨୭/୨୮ ତାରିଖ ପର୍ଯ୍ୟନ୍ତ ଏଭଳି ଥଣ୍ଡା ବଜାୟ ରହିବ ବୋଲି ସେ ପୂର୍ବାନୁମାନ କରିଛନ୍ତି।
ଆଜି ୧୦° ବା ତା’ ତଳେ ରହିଛି ଦାରିଙ୍ଗିବାଡ଼ି(୫°), ଫୁଲବାଣୀ(୭.୫°), ହୀରାକୁଦରେ ୯.୯°, କୋରାପୁଟରେ ୧୦°। ସେହିପରି ଭବାନୀପାଟଣାରେ ୧୦.୫°, ସୁନ୍ଦରଗଡ଼ରେ ୧୧°, ମାଲକାନଗିରି, ସୋନପୁରରେ ୧୨.୨°, କେନ୍ଦୁଝରରେ ୧୨.୪°, ଅନୁଗୁଳରେ ୧୨.୬°, ବଲାଙ୍ଗୀରରେ ୧୨.୭°, ସମ୍ବଲପୁର, ଝାରସୁଗୁଡ଼ାରେ ୧୨.୮°, ଟିଟିଲାଗଡ଼, ତାଳଚେରରେ ୧୩°, ଢେଙ୍କାନାଳରେ ୧୩.୫°, ବାଲେଶ୍ୱରରେ ୧୪.୩°, କଟକ, ବାରିପଦାରେ ୧୪.୪°, ଭୁବନେଶ୍ୱରରେ ୧୫.୨° ରେକର୍ଡ ହୋଇଛି।