କୁହୁଡ଼ି ଯୋଗୁଁ ବଢ଼ୁନି ଥଣ୍ଡା
ଭୁବନେଶ୍ୱର : ରାଜ୍ୟର ଅନେକ ସ୍ଥାନରେ ଗତ ଦୁଇଦିନ ହେଲା କୁହୁଡ଼ି ସୃଷ୍ଟି ହେଉଛି। ତାପମାନରେ ତାରତମ୍ୟ ଯୋଗୁଁ ଦେଖାଦେଉଛି ଏଭଳି କୁହୁଡ଼ି। ଏହାର ପ୍ରଭାବରେ ପାରଦ ଆଉ ତଳକୁ ଖସୁନାହିଁ। ବରଂ ୧ରୁ ୨° ଯାଏଁ ବଢ଼ିଛି। ଏହା ସତ୍ତ୍ୱେ ଥଣ୍ଡାର ଅନୁଭୂତି ଏକପ୍ରକାର ସ୍ଥିର। ୧୯ ତାରିଖରେ ଫୁଲବାଣୀ ଥିଲା ରାଜ୍ୟର ଶୀତଳତମ ସ୍ଥାନ। ସେଦିନ ସର୍ବନିମ୍ନ ତାପମାତ୍ରା ଥିଲା ୪.୫°, ଏହି ଶୀତ ଋତୁର ସବୁଠାରୁ କମ୍ ତାପମାତ୍ରା। କିନ୍ତୁ ଗତକାଲି ସେଠାରେ ଥିଲା ୫° ଏବଂ ଆଜି ରେକର୍ଡ ହୋଇଛି ୫.୭° ସେଲ୍ସିୟସ। ପାଣିପାଗ କେନ୍ଦ୍ର ସୂଚନା ଅନୁଯାୟୀ ଆଜି ରାଜ୍ୟରେ ହାରାହାରି ସର୍ବନିମ୍ନ ତାପମାତ୍ରା ୯° ଏବଂ ସର୍ବୋଚ୍ଚ ୨୭°। ଏଭଳି ଥଣ୍ଡା(କମ୍ ବେଶି) ଆସନ୍ତା ୨୭ ତାରିଖ ଯାଏଁ ଜାରି ରହିବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ ଫୁଲବାଣୀରେ ବର୍ତମାନ ସ୍ୱାଭାବିକ ସର୍ବନିମ୍ନ ତାପମାତ୍ରା ୭° ରହିବା କଥା। କିନ୍ତୁ ଏହାଠାରୁ କମ୍ ରହିଛି। ଜିଲ୍ଲାର କିଛି ଏପରି ସ୍ଥାନ ରହିଛି ଯେଉଁଠି ଥଣ୍ଡା ପ୍ରଭାବରେ କାକରରେ ଧଳା ଆସ୍ତରଣ(ଫ୍ରଷ୍ଟ୍) ଦେଖିବାକୁ ମିଳୁଛି। ସେସବୁ ସ୍ଥାନରେ ପାରଦ ୪ରୁ ୫° ହେଲେ ଏପରି ଦୃଶ୍ୟ ଦେଖିବାକୁ ମିଳିଥାଏ। କେନ୍ଦ୍ର ନିର୍ଦେଶକ ଡ. ଶରତ ଚନ୍ଦ୍ର ସାହୁଙ୍କ କହିବାନୁଯାୟୀ ଆସନ୍ତା ୨୮ ତାରିଖ ବେଳକୁ ଉତ୍ତର ପୁର୍ବ ଦିଗରୁ ପବନ ବହିବାର ସମ୍ଭାବନା ରହିଛି।
ଆଜି ୧୦° କିମ୍ବା ତା’ ତଳେ ରହିଥିବା ସ୍ଥାନଗୁଡ଼ିକ ହେଉଛି ଦାରିଙ୍ଗିବାଡ଼ି(୬°), କେନ୍ଦୁଝର(୯°), ଭବାନୀପାଟଣା(୯.୫°), ସୁନ୍ଦରଗଡ଼, କୋରାପୁଟ(୧୦°)। ଏହି ସ୍ଥାନଗୁଡ଼ିକ ଛାଡ଼ିଦେଲେ ଅନୁଗୁଳରେ ୧୦.୬°, ବଲାଙ୍ଗୀରରେ ୧୧.୨°, ଝାରସୁଗୁଡ଼ା, ସମ୍ବଲପୁରରେ ୧୧.୫°, ସୋନପୁରରେ ୧୧.୬°, ବାଲେଶ୍ୱରରେ ୧୧.୯°, ଟିଟିଲାଗଡ଼ରେ ୧୨°, ମାଲକାନଗିରିରେ ୧୨.୪°, କଟକରେ ୧୩.୪°, ଭୁବନେଶ୍ୱରରେ ୧୪.୨°, ବାରିପଦାରେ ୧୪.୨° ରେକର୍ଡ ହୋଇଛି।