ସଂସ୍କୃତି ବିଭାଗର ୪ ଏକାଡେମି କର୍ମକର୍ତ୍ତା ଚୟନ ପାଇଁ କମିଟି
ଉନ୍ନୟନ କମିସନର୍ଙ୍କ ଅଧ୍ୟକ୍ଷତାରେ ୭ ଜଣିଆ କମିଟି, ୮ ପଦବି ପାଇଁ ଆସିଛି ୨୨୭ ଆବେଦନ
ଭୁବନେଶ୍ବର: ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଅଧୀନସ୍ଥ ଚାରିଟି ଏକାଡେମିର ବିଭିନ୍ନ ପଦବି ପାଇଁ ଚୟନ କମିଟି ଗଠନ କରିଛନ୍ତି ସରକାର। ଉନ୍ନୟନ କମିସନରଙ୍କ ଅଧ୍ୟକ୍ଷତାରେ ଗଠିତ ଏହି କମିଟିରେ ୭ ଜଣ ସଦସ୍ୟ ଅଛନ୍ତି। ସଂସ୍କୃତି ବିଭାଗ ପକ୍ଷରୁ ପଠାଯାଇଥିବା ଏ ସଂକ୍ରାନ୍ତୀୟ ପ୍ରସ୍ତାବରେ ମୁଖ୍ୟମନ୍ତ୍ରୀ ମୋହର ମାରିଛନ୍ତି। ଚାରିଟି ଏକାଡେମିର ମୋଟ ୮ଟି ପଦବି ପାଇଁ ୨୨୭ ଜଣ ଆବେଦନ କରିଥିବା ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଉନ୍ନୟନ କମିସନର୍ଙ୍କ ଅଧ୍ୟକ୍ଷତାରେ ଗଠିତ କମିଟିରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ପ୍ରମୁଖ ସଚିବ ଓ ନିର୍ଦ୍ଦେଶକଙ୍କ ସମେତ ଅବସରପ୍ରାପ୍ତ ପ୍ରଶାସକ ଆର୍ ଏନ୍ ସେନାପତି, ପ୍ରିୟମ୍ବଦା ମହାନ୍ତି ହେଜମାଦି, ଡ. ରମେଶ ପ୍ରସାଦ ପାଣିଗ୍ରାହୀ ଓ ସଦାଶିବ ପ୍ରଧାନ ସଦସ୍ୟ ଅଛନ୍ତି। ଖୁବ୍ ଶୀଘ୍ର କମିଟିର ବୈଠକ ବସି ଚୟନ ପ୍ରକ୍ରିୟା ଆରମ୍ଭ ହେବ।
ସାହିତ୍ୟ ଏକାଡେମି ପାଇଁ ସର୍ବାଧିକ ଆବେଦନ ଆସିଥିବା ଜଣାପଡ଼ିଛି। ସଭାପତି ପଦବି ପାଇଁ ୩୦, ଉପସଭାପତି ପାଇଁ ୫୩ ଓ ସଚିବ ପାଇଁ ୪୧ ଜଣ ଆବେଦନ କରିଛନ୍ତି। ସଙ୍ଗୀତ ନାଟକ ଏକାଡେମିରେ ସଭାପତି ପଦବି ପାଇଁ ୩୪ ଓ ଉପସଭାପତି ପାଇଁ ୩୮ ଜଣ ଆବେଦନ କରିଛନ୍ତି। ସେହିପରି ଲଳିତ କଳା ଏକାଡେମିରେ ଉପସଭାପତି ଓ ସଚିବ ପଦବି ପାଇଁ ୧୩ ଜଣ ଲେଖାଏ ଆବେଦନ କରିଛନ୍ତି। ଉର୍ଦ୍ଦୁ ଏକାଡେମିର ସଚିବ ପଦବି ପାଇଁ ୫ ଜଣ ଆବେଦନ କରିଛନ୍ତି।
୨୦୨୦ ଅକ୍ଟୋବର ମାସରେ ଏହିସବୁ ପଦବି ପାଇଁ ସଂସ୍କୃତି ବିଭାଗ ପକ୍ଷରୁ ବିଜ୍ଞାପନ ପ୍ରକାଶ ପାଇଥିଲା। ଆବେଦନ କରିବାର େଶଷ ତାରିଖ ଥିଲା ନଭେମ୍ବର ୧୧। ଲଳିତ କଳା ଏକାଡେମିରେ ସଭାପତି ଓ ସଙ୍ଗୀତ ନାଟକ ଏକାଡେମିରେ ସଚିବ ପଦବି ଏବେ ଖାଲି ନ ଥିବାରୁ ଏହି ଦୁଇଟି ପଦବି ପାଇଁ ବିଜ୍ଞାପନ ପ୍ରକାଶ ପାଇ ନ ଥିଲା। ଏହା ବାଦ୍ ଉର୍ଦ୍ଦୁ ଏକାଡେମିର ସଭାପତି ମୁଖ୍ୟମନ୍ତ୍ରୀ ଓ ଉପସଭାପତି ବିଭାଗୀୟ ମନ୍ତ୍ରୀ ରହିଛନ୍ତି। ସୂଚନାଯୋଗ୍ୟ ଯେ ପ୍ରଥମ ଥର ପାଇଁ ଏକାଡେମିର ଏହିସବୁ ପଦପଦବି ପାଇଁ ଆବେଦନପତ୍ର ଆହ୍ବାନ କରାଯାଇଥିଲା। ପୂର୍ବରୁ ସରକାର ସିଧାସଳଖ ଚୟନ କରୁଥିଲେ।