ଯୋଡ଼ାରେ ଥମୁନି ଉତ୍ତେଜନା: ବିଳମ୍ବିତ ରାତିରେ ଉଭୟ ପକ୍ଷ ମଧ୍ୟରେ ପଥର ମାଡ଼
ଯୋଡ଼ା: ରାମ ନବମୀ ଝଣ୍ଡା ଶୋଭାଯାତ୍ରାକୁ ନେଇ ଯୋଡ଼ାରେ ଦୁଇ ଗୋଷ୍ଠୀ ମଧ୍ୟରେ ଆରମ୍ଭ ହୋଇଥିବା ଉତ୍ତେଜନା ଥମିବାର ନାଁ ନେଉନାହିଁ | ଗତକାଲି ରାତିରେ ମଧ୍ୟ ଯୋଡ଼ାରେ ପରିସ୍ଥିତି ଅଣାୟତ୍ତ ହୋଇଛି । ଉଭୟ ଗୋଷ୍ଠୀ ପକ୍ଷରୁ ପରସ୍ପର ଉପରକୁ ପଥରଫିଙ୍ଗା ଯାଇଥିବା ଜଣାପଡ଼ିଛି । ଏହି ଘଟଣାରେ ଜଣେ ବାଳକ ଆହତ ହେବା ପରେ ଗତକାଲି ରାତିରେ ଯୋଡ଼ା- ବନେଇକଳା ରାସ୍ତାର ସହିଦନଗର ଛକଠାରେ ରାସ୍ତା ଅବରୋଧ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଉଭୟ ଗୋଷ୍ଠୀଙ୍କ ମଧ୍ୟରେ ଚାପା ଉତ୍ତେଜନା ଲାଗିରହିଥିବା ବେଳେ ପୁଲିସ, ଦମକଳ ବାହିନୀର ଗାଡି ଭଙ୍ଗାରୁଜା ହୋଇଥିବା ସୂଚନା ରହିଛି । ପରିସ୍ଥିତିକୁ ଦେଖି ଆଜି ସକାଳୁ ସହରସାରା ପୁଲିସ ଛାଉଣୀ ହୋଇଯାଇଛି । ୧୪୪ଧାରା ଜାରି ରହିଥିବାବେଳେ ସ୍କୁଲ ,କଲେଜ, ଦୋକାନ ବଜାର ବନ୍ଦ ରହିଛି । ଆଇନଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ ପାଇଁ ୧୪ ପ୍ଲାଟୁନ ପୁଲିସ ଫୋର୍ସରୁ ୧୬ ପ୍ଲାଟୁନ ପୁଲିସ ଫୋର୍ସକୁ ବୃଦ୍ଧି କରାଯାଇଛି । ତେବେ କୌଣସି ଅପ୍ରୀତିକର ପରିସ୍ଥିତିକୁ ଏଡ଼ାଇବା ପାଇଁ ସହରରେ ବ୍ୟାପକ ପୁଲିସ ମୁତୟନ କରାଯିବା ସହିତ ଯୋଡ଼ା ସହରରେ ଆସନ୍ତାକାଲି ଦିନ ୧୦ଟା ପର୍ଯ୍ୟନ୍ତ ୧୪୪ ଧାରା ବଳବତ୍ତର ରହିବ ବୋଲି ପ୍ରଶାସନ ଘୋଷଣା କରିଛି |