ନିଶା ପାଇଁ ଗଣ୍ଡଗୋଳରୁ ବାଇକ୍‌ ପୋଡ଼ି

ଯାଜପୁରସଦର: ନିଶା କାରବାରକୁ କେନ୍ଦ୍ରକରି ଯାଜପୁର ସଦର ଥାନା ଅନ୍ତର୍ଗତ ନାଥସାହି ପଞ୍ଚାୟତ ଆଦମପୁର ଗ୍ରାମରେ ଏକ ବାଇକ୍‌ ପୋଡ଼ି ଦିଆଯାଇଛି। ବାଇକ୍‌ ମାଲିକ ଯାଜପୁର ଟାଉନ ଥାନା ଅନ୍ତର୍ଗତ ରାମବାଗ ଅଞ୍ଚଳର ବିଶ୍ବରଞ୍ଜନ ମିଶ୍ର। ପୁଲିସ ବିଶ୍ବରଞ୍ଜନ ଓ ଅନ୍ୟ ଜଣେ ଯୁବକକୁ ଥାନାରେ ଅଟକ ରଖି ପଚରାଉଚରା କରୁଛି। ଅଭିଯୋଗ ଅନୁଯାୟୀ, ସଦର ଥାନା ଅନ୍ତର୍ଗତ ନାଥସାହି ପଞ୍ଚାୟତ ଆଦମପୁର ଗ୍ରାମ‌ରେ ନିଶା କାରବାର ଚାଲିଥିବା ଅଭିଯୋଗ ହୋଇଛି।

ଆଜି ଅପରାହ୍ଣରେ ଆଦମପୁର ଗ୍ରାମର ବୁଢ଼ା ନଦୀପଠାରେ କିଛି ଯୁବକ ନିଶା କାରବାର ପାଇଁ ଏକାଠି ହୋଇଥିଲେ। ଅପରାହ୍ଣ ୩ଟା ବେଳେ ରାମବାଗ ଅଞ୍ଚଳର ବିଶ୍ବରଞ୍ଜନ ଓ ଆଦମପୁର ଗ୍ରାମର ଜଣେ ଯୁବକ ମଧ୍ୟରେ ନିଶା କାରବାର ଓ ବାକିଆ ପଇସାକୁ ନେଇ ପାଟିତୁଣ୍ଡ ପରେ ମାରପିଟ ହୋଇଥିଲା। ନିଶା ବେପାର କରୁଥିବା ଆଦମପୁର ଗ୍ରାମର ସମ୍ପୃକ୍ତ ଯୁବକ ବିଶ୍ବରଞ୍ଜନଙ୍କ ବାଇକ୍‌ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲା। ଏଥିରେ ବାଇକ୍‌ଟି ପୋଡ଼ି ପାଉଁଶ ହୋଇଯାଇଥିଲା। ବାଇକ୍‌ରେ ନିଆଁ ଲାଗିଯିବା ପରେ ନିଶା ବେପାରୀ ଯୁବକ ଘଟଣାସ୍ଥଳରୁ ଦୌଡ଼ି ପଳାଇ ଯାଇଥିଲା। ସ୍ଥାନୀୟ ଲୋକେ ବିଶ୍ବରଞ୍ଜନ ଓ ଅନ୍ୟ ଜଣେ ଯୁବକକୁ ଅଟକ ରଖିଥିଲେ। ଖବର ପାଇ ଯାଜପୁର ସଦର ଥାନା ପୁଲିସ ପହଞ୍ଚି ଅଟକ ଦୁଇ ଯୁବକଙ୍କୁ ପଚରାଉଚରା କରିବା ସହ ଥାନାକୁ ନେଇଥିଲା। ପ୍ରାଥମିକ ତଦନ୍ତରୁ ବ୍ରାଉନସୁଗାର ବେପାର ପାଇଁ ଏହି ଘଟଣା ଘଟିଥିବା ପୁଲିସ ସନ୍ଦେହ କରୁଛି।