କର୍ପୋରେଟ୍ ଦଲାଲ୍ ସୃଷ୍ଟି ପାଇଁ ବାଟ ଖୋଲାଯାଇଛି
କଟାକ୍ଷ କଲେ କଂଗ୍ରେସ, ବିଜେଡି
ଭୁବନେଶ୍ୱର : କୃଷି ନୀତିକୁ ନେଇ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସାମ୍ବାଦିକ ସମ୍ମିଳନୀ ପରେ ତାହାକୁ ସମାଲୋଚନା କରିଛନ୍ତି କଂଗ୍ରେସ ଓ ବିଜେଡି। ପିସିସି ସଭାପତି ନିରଞ୍ଜନ ପଟ୍ଟନାୟକ କଟାକ୍ଷ କରି କହିଛନ୍ତି, ବାସ୍ତବରେ କୃଷି ବିଲ୍ ଏକ ଐତିହାସିକ ବିଲ୍। କାରଣ ଏହା ଦ୍ବାରା କେନ୍ଦ୍ର ସରକାର ଅର୍ଥନୀତିକୁ ବିପର୍ଯ୍ୟସ୍ତ କରିବାକୁ ଆଉ ଏକ ବାଟ ଖୋଲିଛନ୍ତି। ଏମ୍ଏସ୍ପି ଓ ମଣ୍ଡି ରହିବ ବୋଲି କହୁଛନ୍ତି। ବିଲ୍ରେ କାହିଁକି ତାହା ନିର୍ଦ୍ଧାରଣ କରି ନାହାନ୍ତି ? ଏମ୍ଏସ୍ପି ଦର ତଳକୁ କେହି ଶସ୍ୟ କିଣିପାରିବେନି ବୋଲି କାହିଁକି ସ୍ପଷ୍ଟ ଭାବେ ଉଲ୍ଲେଖ କରି ନାହାନ୍ତି ? ଏମ୍ଏସ୍ପି ଦର ତଳକୁ ଶସ୍ୟ କିଣିଲେ ଦଣ୍ଡ ବିଧାନ ହେବ ବୋଲି ବିଲ୍ରେ ବ୍ୟବସ୍ଥା କରିଥିଲେ ଚାଷୀଙ୍କ ସ୍ବାର୍ଥ ସୁରକ୍ଷିତ ରହିଥାନ୍ତା। କିନ୍ତୁ ତାହା ନ କରି ବିଲ୍ରେ କେବଳ କର୍ପୋରେଟ୍ କ୍ଷେତ୍ର ପାଇଁ ରାସ୍ତା ଖୋଲାଯାଇଛି।
Sambad is now on WhatsApp
Join and get latest news updates delivered to you via WhatsApp
ବିଜେଡି ବିଧାୟକ ପ୍ରତାପ ଦେବ ଗଣମାଧ୍ୟମକୁ କହିଛନ୍ତି ଯେ କେନ୍ଦ୍ର ସରକାର ଚାଷୀଙ୍କ ସ୍ବାର୍ଥ ପାଇଁ କାମ କରୁଛନ୍ତି ଓ ଏମ୍ଏସ୍ପି ବ୍ୟବସ୍ଥା ଉଚ୍ଛେଦ ହେବନି ବୋଲି କେନ୍ଦ୍ର ମନ୍ତ୍ରୀ କହୁଛନ୍ତି। ତେବେ ଏମ୍ଏସ୍ପି ବ୍ୟବସ୍ଥା କଥା ବିଲ୍ରେ କାହିଁକି ରଖି ନାହାନ୍ତି ? ନୂଆ କୃଷି ନୀତି ଦଲାଲ ବ୍ୟବସ୍ଥାକୁ ଉଚ୍ଛେଦ କରିବ ବୋଲି କୁହାଯାଉଛି। ଏହା ସତ ଯେ କ୍ଷୁଦ୍ର ଓ ମଧ୍ୟମ ଦଲାଲ ଆଉ ରହିବେନି। କିନ୍ତୁ କର୍ପୋରେଟର୍ ଦଲାଲ ସୃଷ୍ଟି ହେବା ପାଇଁ ବିଲ୍ ବାଟ ଖୋଲିଦେଇଛି।