ଭୁବନେଶ୍ବର: ଗୋଟିଏ ଅଞ୍ଜନା ଗଣଦୁଷ୍କର୍ମ ପାଇଁ କଂଗ୍ରେସ ସରକାର ଏ ରାଜ୍ୟରେ କ୍ଷମତାରୁ ଚାଲିଯାଇଥିଲା। ଏବେ ବିଜେଡି ସରକାର ସମୟରେ ପ୍ରତିଦିନ ୮ ଜଣ ଶିଶୁ, ନାବାଳିକା ଓ ମହିଳା ଦୁଷ୍କର୍ମର ଶିକାର ହେଉଛନ୍ତି। ପୁଲିସର ନିଷ୍କ୍ରିୟତା ଯୋଗୁଁ ଅପରାଧୀମାନେ କାହାକୁ ଖାତିର କରୁନାହାନ୍ତି। ଗତ ଦୁଇବର୍ଷ ଭିତରେ ସାରା ଦେଶରେ ୩୨ ହଜାର ୨୬୫ ଜଣ ଶିଶୁ, ନାବାଳିକା ଓ ମହିଳାଙ୍କୁ ଦୁଷ୍କର୍ମର ଶିକାର ହୋଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଆଜି କଂଗ୍ରେସ ଭବନରେ ସାମ୍ବାଦିକ ସମ୍ମିଳନୀ କରି କଂଗ୍ରେସ ନେତ୍ରୀ ବିଜୟଲକ୍ଷ୍ମୀ ସାହୁ ଏପରି ଅଭିଯୋଗ କରିଛନ୍ତି। ସେ କହିଥିଲେ, ପୁରୀ ନାବାଳିକା ଗଣଦୁଷ୍କର୍ମ ଘଟଣାରେ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ଏକ ୭ ଜଣିଆ ତଥ୍ୟ ଅନୁଧ୍ୟାନକାରୀ କମିଟି ଗଠନ କରାଯାଇଛି। ଆସନ୍ତାକାଲି କମିଟି ସଦସ୍ୟମାନେ ପୁରୀ ଗସ୍ତ କରିବେ। କଂଗ୍ରେସ ଅଭିଯୋଗ କରିଛି, ମୁଖ୍ୟମନ୍ତ୍ରୀ ପଞ୍ଚମ ଥର ପାଇଁ ଦାୟିତ୍ବ ନେବା ପରେ ରାଜ୍ୟରେ ମା’ଭଉଣୀମାନଙ୍କ ଉପରେ ବର୍ବରୋଚିତ ଆକ୍ରମଣ, ଅତ୍ୟାଚାର ଓ ଶୋଷଣ ବଢ଼ିଚାଲିଛି। ଏହାର ଉତ୍ତର ମୁଖ୍ୟମନ୍ତ୍ରୀ ରଖିବା ଦରକାର। ଇତିଶ୍ରୀ, କୁନ୍ଦୁଲି ପୀଡ଼ିତା, ବେବିନା, ମାଧବୀଲତା, ନିହାରିକା, ସ୍ମିତାରାଣୀ, ରାଇରଙ୍ଗପୁର ଅଧ୍ୟାପିକା ଆତ୍ମହତ୍ୟା ଘଟଣା ଓ ପୁରୀ ଘଟଣାରେ ସେ ଚୁପ୍ ରହିଛନ୍ତି। କମିଟିରେ ଶ୍ରୀମତୀ ସାହୁ ସଦସ୍ୟ ଥିବାବେଳେ, କଂଗ୍ରେସ ନେତା ବଟକୃଷ୍ଣ ତ୍ରିପାଠୀ, ଶିବାନନ୍ଦ ରାୟ, ସତ୍ୟ ପ୍ରକାଶ ନାୟକ, ବନ୍ଦିତା ପରିଡ଼ା, ସୁଦର୍ଶନ ଦାସ ଓ ରଶ୍ମି ମହାପାତ୍ର ସଦସ୍ୟ ଅଛନ୍ତି। ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ କଂଗ୍ରେସ ନେତା ପଦ୍ମାକର ଗୁରୁ ଉପସ୍ଥିତ ଥିଲେ।