ଭୁବନେଶ୍ବର: ମମିତା ମେହେର ହତ୍ୟାକାଣ୍ଡ ଘଟଣାରେ ବରିଷ୍ଠ କଂଗ୍ରେସ ନେତା ଭକ୍ତ ଦାସଙ୍କ ଶାଣିତ ଆକ୍ରମଣକୁ ନେଇ ସାରା ରାଜ୍ୟରେ ଚର୍ଚ୍ଚା ହୋଇଛି । କଳାହାଣ୍ଡିରେ ଏକ ସଭାରେ ଭକ୍ତ କହିଛନ୍ତି, କେଗାଁ ଥାନା ଅନ୍ତର୍ଗତ ମହାଲିଙ୍ଗସ୍ଥିତ ସନ୍ସାଇନ୍ ପବ୍ଲିକ ସ୍କୁଲର ଅଧ୍ୟକ୍ଷା ମମିତା ମେହେରଙ୍କୁ ହତ୍ୟା କରାଯିବା ପଛରେ ଉଦ୍ଦେଶ୍ୟ କଣ ଥିଲା ତାହା ଲୋକଙ୍କ ଜାଣିବାର ଅଧିକାର ଅଛି । ବାରମ୍ବାର କାହିଁକି ସେହି ଅନୁଷ୍ଠାନକୁ ରାଜ୍ୟ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ଯାଉଥିଲେ ବୋଲି ସେ ପ୍ରଶ୍ନ ଉଠାଇଛନ୍ତି । ଏହାଛଡା ମୃତ ମମିତା, ଗୋବିନ୍ଦ ସାହୁ ଓ ମନ୍ତ୍ରୀ ଶ୍ରୀ ମିଶ୍ରଙ୍କ ଫୋନ କଲ ରେକର୍ଡ ସାର୍ବଜନୀନ କରିବା ଦରକାର ବୋଲି କହିଛନ୍ତି ଭକ୍ତ ଦାସ ।
Sambad is now on WhatsApp
Join and get latest news updates delivered to you via WhatsApp
ମମିତା ମେହେର ହତ୍ୟା ମାମଲାରେ ମନ୍ତ୍ରୀ ଦିବ୍ୟଶଙ୍କରଙ୍କୁ ବହିଷ୍କାର କରି ତାଙ୍କୁ ତଦନ୍ତ ଭୁକ୍ତ କରିବାକୁ ଦାବି କରିଛନ୍ତି ବରିଷ୍ଠ କଂଗ୍ରେସ ନେତା ଭକ୍ତ ଚରଣ ଦାସ । ଖାଲି ସେତିକି ନୁହେଁ ମମିତା ମେହେର, ଗୋବିନ୍ଦ ସାହୁ ଓ ମନ୍ତ୍ରୀଙ୍କ ଫୋନକଲ୍ ରେକର୍ଡ ଯାଞ୍ଚ କରିବାକୁ ସେ ଦାବି କରିଛନ୍ତି । ତା ସହିତ ସେ ଆହୁରି ମଧ୍ୟ କହିଛନ୍ତି ଯେ, ଏହି ହତ୍ୟା ମାମଲାରେ ୫-୬ଜଣଙ୍କର ସଂପୃକ୍ତି ରହିଛି । କଲ୍ ରେକର୍ଡ ଯାଞ୍ଚ କଲେ ସବୁ କଥା ପଦାକୁ ଆସିବ । ଏହାକୁ ସାର୍ବଜନୀନ କରିବାକୁ ସେ ଦାବି କରିଛନ୍ତି ।
କେବଳ ସେତିକି ନୁହେଁ, ଦିବ୍ୟଶଙ୍କର ମିଶ୍ରଙ୍କୁ ଏୟାରଫୋର୍ସରେ କ୍ୟାପଟେନ୍ କରିବା ପାଇଁ ସେ ସାହାଯ୍ୟ କରିଥିଲେ ବୋଲି କହିଛନ୍ତି ଭକ୍ତ । ତେବେ ତାଙ୍କର ଏହି ଶାଣୀତ ଆକ୍ରମଣ, ଦିବ୍ୟଶଙ୍କରଙ୍କ ଅଡୁଆ ବଢ଼ାଇଥିବା ବେଳେ ବିଜେଡି କହିଛି, ଏପରି ଅଭିଯୋଗର କିଛି ଆଧାର ନାହିଁ, ଆଇନ ଅନୁଯାୟୀ କାର୍ଯ୍ୟାନୂୁଷ୍ଠାନ ନିଆଯାଉଛି । ସୂଚନାଯୋଗ୍ୟ ଯେ, ମମିତା ମେହେର ଓ ପରିବାରକୁ ନ୍ୟାୟ ଦେବା ପାଇଁ କଳାହାଣ୍ଡିବାସୀଙ୍କୁ ଆସନ୍ତା ୮ ତାରିଖରେ ଜନତା କର୍ଫ୍ୟୁ ପାଇଁ ଆହ୍ୱାନ ଦେଇଛନ୍ତି କଂଗ୍ରେସର ଏହି ବରିଷ୍ଠ ନେତା ।