୩ ପଶ୍ଚିମବଙ୍ଗ ଫେରନ୍ତା ଆକ୍ରାନ୍ତଙ୍କ କଣ୍ଟାକ୍ଟ ଟ୍ରେସିଂ ଆରମ୍ଭ କଲା ଜିଲ୍ଲା ପ୍ରଶାସନ, ସରକାରୀ ସଙ୍ଗରୋଧରେ ଥିଲେ
ଭଦ୍ରକ: ଭଦ୍ରକ ଜିଲ୍ଲାରେ କରୋନା ରୋଗୀ ସଂଖ୍ୟା ୧୧ରେ ପହଞ୍ଚିଛି। ଫଳରେ ଏହା ରାଜ୍ୟର ଦ୍ବିତୀୟ ସର୍ବାଧିକ ସଂକ୍ରମିତ ଜିଲ୍ଲାରେ ପରିଣତ ହୋଇଛି। ତେବେ ଭଦ୍ରକ ଜିଲ୍ଲାକୁ କାଳ ହୋଇଛି କ୍ରମଶଃ ବଢ଼ିଚାଲିଥିବା କୋଲକାତା ଫେରନ୍ତାଙ୍କ ସଂଖ୍ୟା। ଆଉ ଆଜି ଚିହ୍ନଟ ହୋଇଥିବା ୩ ଆକ୍ରାନ୍ତ ବାସୁଦେବପୁର ବ୍ଲକ ଅଞ୍ଚଳର ହୋଇଥିବାରୁ ବ୍ଲକରେ ଆକ୍ରାନ୍ତଙ୍କ ସଂଖ୍ୟା ୬ରେ ପହଞ୍ଚିଛି। ତେଣେ ଦୁଇଟି ପଞ୍ଚାୟତକୁ କଣ୍ଟେନମେଣ୍ଟ୍ ଜୋନ୍ ଘୋଷଣା କରିଛି ଜିଲ୍ଲା ପ୍ରଶାସନ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲା ପ୍ରଶାସନର ସୂଚନା ଅନୁସାରେ ଆଜି ଚିହ୍ନଟ ହୋଇଥିବା ୩ ଆକ୍ରାନ୍ତ ଲୁଙ୍ଗା, ଅଢୁଆଁ ଓ ଲକ୍ଷ୍ମୀଦାସପୁର ପଞ୍ଚାୟତର ବାସିନ୍ଦା । ପୂର୍ବରୁ ଲକ୍ଷ୍ମୀଦାସପୁର କଣ୍ଟେନମେଣ୍ଟ୍ ଜୋନ୍ ହୋଇ ସାରିଥିବା ବେଳେ ଲୁଙ୍ଗା ଓ ଅଢୁଆଁକୁ କଣ୍ଟେନମେଣ୍ଟ୍ ଜୋନ୍ ଘୋଷଣା କରାଯାଇଛି। ଆକ୍ରାନ୍ତମାନେ ବାସୁଦେବପୁର ହାଇସ୍କୁଲରେ ଥିବା ସରକାରୀ ସଙ୍ଗରୋଧ କେନ୍ଦ୍ରରେ ଅଛନ୍ତି। ଏବେ ପ୍ରଶାସନ ଓ ପୁଲିସ ସେଠାରେ ପହଞ୍ଚି ସେମାନଙ୍କୁ ହସ୍ପିଟାଲକୁ ନେବାକୁ ଯୋଜନା କରୁଛି। ତେଣେ ଏମାନଙ୍କ ସହ କିଏ କିଏ ସମ୍ପର୍କରେ ଆସିଛନ୍ତି ସେମାନଙ୍କ ସହ ଯୋଗାଯୋଗ ଆରମ୍ଭ କରିଛି ପ୍ରଶାସନ। ଜିଲ୍ଲାର ମୋଟ ୧୧ ଆକ୍ରାନ୍ତଙ୍କ ମଧ୍ୟରୁ ୨ ସୁସ୍ଥ ହୋଇଛନ୍ତି। ଜିଲ୍ଲାରେ ପ୍ରଥମେ ୩ ପଜିଟିଭ୍ ବାହାରିବ ପରେ ୧୯ ତାରିଖରେ ୫ ଓ ଆଜି ୩ ଆକ୍ରାନ୍ତ ଚିହ୍ନଟ ହୋଇଛନ୍ତି।
ଅନ୍ୟପକ୍ଷରେ ରାଜ୍ୟ ସୂଚନା ଓ ଲୋକସଂପର୍କ ବିଭାଗ ପକ୍ଷରୁ ୨୨ ତାରିଖ ସକାଳେ ଘୋଷିତ ୩ କରୋନା ଆକ୍ରାନ୍ତଙ୍କ ସଂପର୍କରେ ସୂଚନା ଜାରି କରାଯାଇଛି। ଏହି ତିନି ଜଣ ପଶ୍ଚିମବଙ୍ଗର ରାଜଧାନୀ କୋଲକାତା ଫେରନ୍ତା ବୋଲି ଜଣାପଡ଼ିଛି। ପୂର୍ବରୁ ଭଦ୍ରକ ଜିଲ୍ଲାରେ ଚିହ୍ନଟ ହୋଇଥିବା ଆକ୍ରାନ୍ତଙ୍କ ସହ ଏମାନେ ଗୋଟିଏ ଗାଡ଼ିରେ କୋଲକାତାରୁ ଫେରିଥିଲେ। ଏହି ୩ ପୁରୁଷ ଆକ୍ରାନ୍ତଙ୍କ ବୟସ ଯଥାକ୍ରମେ ୪୦, ୫୫ ଓ ୩୫ ବର୍ଷ ବୋଲି ସୂଚନା ରହିଛି।