ପୁରୀ : ସରକାରୀ ଘରେ ରହୁଛନ୍ତି ଠିକାଦାର। ଜନସ୍ବାସ୍ଥ୍ୟ ବିଭାଗ ଯୋଗାଇ ଦେଇଛି ସରକାରୀ କ୍ବାର୍ଟର ଭଳି ଚକାଚକ ଘର। ଯେଉଁଠାରେ କେବଳ ଠିକାଦାର ରହୁନାହାନ୍ତି, ଠିକାଦାର ଠିକା କାମରେ ଲଗାଉଥିବା ସମ୍ପୂର୍ଣ୍ଣ ଆସବାବପତ୍ର ବି ଗଦା ହୋଇ ରହୁଛି। ଜେସିବିଠାରୁ ଆରମ୍ଭ କରି ବଡ଼ ବଡ଼ ଗାଡ଼ି ବି ଏଠାରେ ରଖାଯାଉଛି। ଯେଉଁ ଲୋକେ ବି ଠିକାଦାରଙ୍କ ପାଖରେ ରହୁଛନ୍ତି, ସେମାନେ ବି ଏଠାରେ ଘର ଭଳି ରହୁଛନ୍ତି। ଏଭଳି ବିଚିତ୍ର ସ୍ଥିତି ଦେଖିବାକୁ ମିଳିଛି ତାଳବଣିଆ ହେଲିପ୍ୟାଡ୍‌ ସମ୍ମୁଖ ଜନସ୍ବାସ୍ଥ୍ୟ କାର୍ଯ୍ୟାଳୟରେ।

Advertisment

ତାଳବଣିଆ ହେଲିପ୍ୟାଡ୍‌ ସମ୍ମୁଖରେ ରହିଛି ଜନସ୍ବାସ୍ଥ୍ୟ ବିଭାଗ ସହକାରୀ ପରିଚାଳକଙ୍କ କାର୍ଯ୍ୟାଳୟ। ଏହାକୁ ଲାଗି ଜନସ୍ବାସ୍ଥ୍ୟ ବିଭାଗ କିଛି ଘର ନିର୍ମାଣ କରିଛି। ଯେଉଁଠି ନବକଳେବର ସମୟରେ ଜନସ୍ବାସ୍ଥ୍ୟ ବିଭାଗର ଟେଣ୍ଡର ନେଉଥିବା ଜଣେ ଠିକାଦାର ନିଜର ଠିକା କାମର ସମସ୍ତ ସାମଗ୍ରୀ ସହ ରହୁଥିଲେ। ଯେହେତୁ ନବକଳେବର କାମ ହେଉଛି, ସେ ଲାଗି କେହି କିଛି ପ୍ରଶ୍ନ କରିନଥିଲେ। ପରେ ପୁନର୍ବାର ସେହି ଠିକାଦାରଙ୍କୁ ଅମୃତ ଯୋଜନାରେ ସେହି ଜାଗାରେ ରହିବାକୁ ଅନୁମତି ଦିଆଗଲା। କୁହାଗଲା ଉପରୁ ନିର୍ଦ୍ଦେଶ ଆସିଛି। ସେହି ଦୃଷ୍ଟିରୁ ଠିକାଦାରଙ୍କୁ ଏହି ସରକାରୀ ଘରେ ରହିବାକୁ ଅନୁମତି ଦିଆଯାଇଛି। ଇତିମଧ୍ୟରେ ଅମୃତ ଯୋଜନା କାମ ବି ସରିଗଲାଣି। ତଥାପି ଠିକାଦାର ଏହି ଘର ଛାଡ଼ିବାକୁ ନାରାଜ। ସେପଟେ ବିଭାଗୀୟ ଯନ୍ତ୍ରୀମାନେ ବି ଠିକାଦାରଙ୍କୁ ଦରଦ ଦେଖାଇ ଆସୁଥିବା ଅଭିଯୋଗ ହୋଇଛି। ସତେ ଯେପରି ସରକାରୀ ଜାଗାରେ ଠିଆ ହୋଇଥିବା ସରକାରୀ ଘରକୁ ଠିକାଦାରଙ୍କୁ ସମର୍ପି ଦେଇଛି ଜନସ୍ବାସ୍ଥ୍ୟ ବିଭାଗ। ଯେଉଁଥିପାଇଁ ଠିକାଦାର ଜଣକ ଏବେ ନିଜ ଜେସିବି, ମାଲ ବୁହା ଗାଡ଼ି ସହ ଅନ୍ୟାନ୍ୟ ସାମଗ୍ରୀ ଏଠାରେ ରଖୁଛନ୍ତି। ବାଲି, ଗୋଡ଼ି, ସିମେଣ୍ଟଠାରୁ ଆରମ୍ଭ କରି ଅନ୍ୟାନ୍ୟ ଜିନିଷ ବି ଏଠାରେ ଷ୍ଟକୟାର୍ଡ ଭଳି ଗଦା ହୋଇ ରହୁଛି। ସେପଟେ ଯେଉଁ ଜାଗାରେ ଠିକାଦାର ରହୁଛନ୍ତି, ତାକୁ ନିୟମିତ ସଫା କରୁନଥିବାରୁ ଏହା ଜଙ୍ଗଲ ପାଲଟିଲାଣି। ଠିକା କାମରେ ଲାଗୁଥିବ ଭଙ୍ଗାରୁଜା ଆସବାବପତ୍ର ବି ଏଣେତେଣେ ବିଛାଡ଼ି ହୋଇପଡ଼ିଛି। ଘର ଭିତରେ ସିମେଣ୍ଟ ଗଦା ମରା ହୋଇ ରଖାଯାଇଛି। ବଡ଼କଥା ହେଉଛି, ଜନସ୍ବାସ୍ଥ୍ୟ ବିଭାଗ ବିଜୁଳି, ଫ୍ୟାନ, ଲାଇଟ୍‌ ବି ଠିକାଦାର ବ୍ୟବହାର କରୁଛନ୍ତି ଓ ଏହାକୁ ଠିକା କାମରେ ଲଗାଉଛନ୍ତି।

ଏ ସମ୍ପର୍କରେ ଜନସ୍ବାସ୍ଥ୍ୟ ବିଭାଗ ନିର୍ବାହୀ ଯନ୍ତ୍ରୀ ଇଂ. ଶରତ କୁମାର ମିଶ୍ର କହିଛନ୍ତି, ପୂର୍ବରୁ ଅମୃତ ଯୋଜନାରେ ଠିକାଦାରଙ୍କୁ ଏହି ଘର ଦିଆଯାଇଥିଲା। ଏବେ କିନ୍ତୁ ଏମାନଙ୍କୁ କଢ଼ାସରିଛି। କିନ୍ତୁ ଅନ୍ୟ କେଉଁମାନେ ଏହି ଘରେ ରହୁଛନ୍ତି, ସେ ସମ୍ପର୍କରେ ମୁଁ ଜାଣିନି। ବୁଝିବା ପରେ କିଛି କହିପାରିବି ବୋଲି ଇଂ. ମିଶ୍ର କହିଛନ୍ତି। ଜନସ୍ବାସ୍ଥ୍ୟ ବିଭାଗ ସହକାରୀ ଯନ୍ତ୍ରୀ ଇଂ. ଭବାନୀ ଶଙ୍କର ମହାନ୍ତି କହିଛନ୍ତି, ପୂର୍ବରୁ ଅମୃତ ଯୋଜନାରେ କାମ କରୁଥିବା ଠିକାଦାର ରହୁଥିଲେ। ଏହି ଅବଧି ସରିବା ପରେ ଏବେ ସମ୍ପୃକ୍ତ ଠିକାଦାରଙ୍କ ରହିବା ସମୟ ବଢ଼ାଯାଇଛି। ଏହି ଠିକାଦାର ସହରରେ ବିଭିନ୍ନ ସ୍ଥାନରେ ପାଇପ ଭଙ୍ଗାଠାରୁ ଆରମ୍ଭ କରି ଅନ୍ୟାନ୍ୟ ମରାମତି କାମ କରୁଛନ୍ତି। ରହିବା ପାଇଁ ଏକ ଏଗ୍ରିମେଣ୍ଟ କରାଯାଇଛି। ଏଗ୍ରିମେଣ୍ଟ ଜରିଆରେ ୧୨ଶହ ଟଙ୍କା ଦେଇ ସେ ରହୁଥିବା ଇଂ. ମହାନ୍ତି କହିଛନ୍ତି। ଜଣେ ଠିକାଦାରଙ୍କୁ ସରକାରୀ ଘରେ ରଖିବା ଆଇନ ବିରୋଧୀ ହୋଇଥିବା ବେଳେ ଏହାକୁ ଅମାନ୍ୟ କରି କେଉଁ ପରିସ୍ଥିତିରେ ଗତ ୭ ବର୍ଷ ଧରି ସମ୍ପୃକ୍ତ ଠିକାଦାରଙ୍କୁ ଏଠାରେ ରହିବାକୁ ସୁଯୋଗ ଦିଆଯାଉଛି, ତାହା ସାଧାରଣରେ ପ୍ରତିକ୍ରିୟା ସୃଷ୍ଟି କରିଛି।