ଯାଜପୁର ଉଠା ଜଳସେଚନ ଡିଭିଜନରେ ଦୁର୍ନୀତି: ୨୮ରେ ଲୋକାୟୁକ୍ତଙ୍କ ନିକଟରେ ଶୁଣାଣି

ଭୁବନେଶ୍ବର: ଯାଜପୁର ଉଠା ଜଳସେଚନ ଡିଭିଜନ ଦୁର୍ନୀତି ସମ୍ପର୍କରେ ‘ସମ୍ବାଦ’ର ଅନୁସନ୍ଧାନମୂଳକ ରିପୋର୍ଟ ଉପରେ ଲୋକାୟୁକ୍ତଙ୍କ ପକ୍ଷରୁ ଶୁଣାଣି କରାଯିବ। ଏଥିପାଇଁ ଆସନ୍ତା ୨୮ ତାରିଖକୁ ଦିନଧାର୍ଯ୍ୟ କରାଯାଇଛି। ଏହାପୂର୍ବରୁ ଏହି ଦୁର୍ନୀତି ଘଟଣାରେ ଲୋକାୟୁକ୍ତ ସମ୍ପୃକ୍ତ ଡିଭିଜନର ନିର୍ବାହୀ ଯନ୍ତ୍ରୀଙ୍କୁ ନୋଟିସ୍‌ ଜାରି କରିଥିଲେ।

ଗତ ସେପ୍ଟେମ୍ବର ୨୩ ତାରିଖ ‘ସମ୍ବାଦ’ରେ ‘ଚାଷୀଙ୍କୁ ମୋହରା କରି କୋଟି କୋଟି ଟଙ୍କା ଚଳୁ’ ଶୀର୍ଷକରେ ଏକ ଖବର ପ୍ରକାଶ ପାଇଥିଲା। ଏହି ଖବରରେ ଯାଜପୁର ଡିଭିଜନରେ କିଭଳି ଚାଷୀଙ୍କୁ ମୋହରା କରି ୫ ବର୍ଷରେ ୧୦୦ କୋଟିରୁ ଊର୍ଦ୍ଧ୍ବ ଟଙ୍କାର ଦୁର୍ନୀତି ହୋଇଛି, ସେ ସମ୍ପର୍କରେ ଏଥିରେ ଏକ ବିସ୍ତୃତ ତଥ୍ୟ ପ୍ରଦ‌ାନ କରାଯାଇଥିଲା।
ଉଲ୍ଲେଖଯୋଗ୍ୟ ଯେ, ଏହି ଡିଭିଜନ ଅନ୍ତର୍ଗତ ବଡଚଣା ବ୍ଲକ୍‌ ଅରଖପୁର ପଞ୍ଚାୟତରେ ଉଠା ଜଳସେଚନର ଏକ ଉପଖଣ୍ଡ କାର୍ଯ୍ୟାଳୟ ବନ୍ଧା ପଦ୍ମନାଭପୁରରେ ଥିବା ସତ୍ତ୍ବେ ଏହି ପଞ୍ଚାୟତର ଏକାଧିକ ଏଲ୍ଆଇ ପଏଣ୍ଟ ଓ ଆର୍ଏଲ୍ ପଏଣ୍ଟ ଅଚଳ । ଅରଖପୁର ପଞ୍ଚାୟତର ଅରଖପୁର-୮ ପ୍ରକଳ୍ପଟି ଅଚଳ । ୧୪ଲକ୍ଷ ୯୧ହଜାର ୮୦୦ ଟଙ୍କା ବ୍ୟୟରେ ୨୦୧୭ ମସିହାର ଏହି ପ୍ରକଳ୍ପଟି ନିର୍ମାଣ କାର୍ଯ୍ୟ ସରିବା ପରେ ଅଚଳ ହୋଇପଡିଛି । ଟ୍ରାନ୍‌ସଫର୍ମରରୁ ପମ୍ପ୍‌ହାଉସକୁ ବିଦ୍ୟୁତ ସଂଯୋଗ ହୋଇନାହିଁ। ପମ୍ପ୍‌ ହାଉସ୍‌ ବୋଲି ଯାହା କୁହାଯାଉଛି ସେଠାରେ ପାଣି ପମ୍ପ ମଧ୍ୟ ନାହିଁ। ବାଉଁଶ ଭର୍ତ୍ତି ହୋଇଛି । ସେହିପରି ଅରଖପୁର-୭ ପ୍ରକଳ୍ପ ୨୦୧୭ ମସିହାରେ ୧୪ ଲକ୍ଷ ୯୨୯ ଟଙ୍କା ବ୍ୟୟରେ ନିର୍ମାଣ ହୋଇଥିବା ବେଳେ ଏହା ମଧ୍ୟ ଅଚଳ। ଏଠାରେ ଟ୍ରାନ୍ସଫର୍ମରରୁ ପମ୍ପ୍‌ହାଉସକୁ ବିଦ୍ୟୁତ୍‌ ସଂଯୋଗ ନାହିଁ । ଗୌଡପାଟଣା ପ୍ରକଳ୍ପ ମଧ୍ୟ ଅଚଳ। ଟ୍ରାନସଫର୍ମରରୁ ପମ୍ପହାଉସକୁ ବିଦ୍ୟୁତ୍‌ ସଂଯୋଗ ନାହିଁ। ଶୁର୍ଖାଦେଇପୁର ଠାରେ ଥିବା ଆର୍ଏଲ ପଏଣ୍ଟର ଅର୍ଦ୍ଧନିର୍ମିତ ପମ୍ପ୍‌ହାଉସ ଉପରେ ଟ୍ରାନ୍‌ସଫର୍ମର ଭାଙ୍ଗି ରୁଜି ମୋଡି ହୋଇପଡିଛି । ଏହି ଗ୍ରାମର ବିଲ ମଝିରେ ଥିବା ଆଉ ଗୋଟିଏ ପ୍ରକଳ୍ପ ମଧ୍ୟ ଅଚଳ । ଅରଖପୁର ଘାଟ ଠାରେ ୨୦୧୯ ମସିହାରେ ୮ ଲକ୍ଷ ୮୮ ହଜାର ୧୩୮ ଟଙ୍କା ଖର୍ଚ୍ଚ କରାଯାଇ ନିର୍ମାଣ ହୋଇ ଥିବା ପ୍ରକଳ୍ପ ମଧ୍ୟ ଅଚଳ ହୋଇପଡିଛି। ଏହି ପଞ୍ଚାୟତରେ ସବ୍‌ଡିଭିଜନ କାର୍ଯ୍ୟାଳୟ ରହିଥିବା ସତ୍ତ୍ବେ ୨୦ ରୁ ଊର୍ଦ୍ଧ୍ବ ପ୍ରକଳ୍ପ ଅଚଳ ।

‘ସମ୍ବାଦ’ରେ ପ୍ରକାଶିତ ଏହି ରିପୋର୍ଟକୁ ଲୋକାୟୁକ୍ତ ଅଭିଯୋଗ ଭାବେ ଗ୍ରହଣ କରିବା ସହିତ ଏ ସଂକ୍ରାନ୍ତରେ ଏକ ମାମଲା ( ନମ୍ବର: ଏଲ୍‌ୱାଇ-୪୪୦/୨୦୧୯) ରୁଜୁ କରିଥିଲେ। ଏହି ମାମଲାରେ ଯାଜପୁରରୋଡସ୍ଥିତ ଉଠାଜଳଚେସନ ଡିଭିଜନର ନିର୍ବାହୀ ଯନ୍ତ୍ରୀଙ୍କୁ ନୋଟିସ୍‌ ଜାରି କରିଛନ୍ତି ଏବଂ, କେଉଁ ପରିସ୍ଥିତିରେ ଜନସାଧାରଣଙ୍କ ବିପୁଳ ପରିମାଣର ଅର୍ଥ ବାଟମାରଣା କରାଯାଇଛି ଅବଗତ କରିବା ପାଇଁ ନିର୍ଦ୍ଦେଶ ଦେଇଛନ୍ତି। ସେହିପରି, ଏ ସଂକ୍ରାନ୍ତରେ ନିଜର ମତ ରଖିବା ପାଇଁ ଜଳସମ୍ପଦ ମନ୍ତ୍ରୀଙ୍କୁ ନୋଟିସ୍‌ ମାଧ୍ୟମରେ ଜଣାଇଛନ୍ତି। ଆସନ୍ତା ନଭେମ୍ବର ୨୮ ତାରିଖରେ ଏହାର ଶୁଣାଣି ହେବ ବୋଲି ଲୋକାୟୁକ୍ତ ଦିନଧାର୍ଯ୍ୟ କରିଛନ୍ତି।