ପୁଣି ସେହି କାଳ ରାତି: ୧୪ ବର୍ଷ ତଳେ କରମଣ୍ଡଳ ନେଇଥିଲା ୧୬ଜଣଙ୍କ ଜୀବନ: ଆଉ ଏବେ କେତେ?
ଭୁବନେଶ୍ୱର: ପୁଣି କରମଣ୍ଡଳ ଦୁର୍ଘଟଣାର ଶିକାର ହୋଇଛି | ୧୪ ବର୍ଷ ତଳର କାଳ ଶୁକ୍ରବାର ଆଜି ବି କରମଣ୍ଡଳ ସହ ଘଟିଛି | ବାଲେଶ୍ୱର ଜିଲ୍ଲାର ବାହାନଗାରେ ଆଜି କୋଲକାତାରୁ ଚେନ୍ନାଇ ଅଭିମୁଖେ ଯାଉଥିବା କରମଣ୍ଡଳ ଏକ୍ସପ୍ରେସ ଦୁର୍ଘଟଣାର ଶିକାର ହୋଇଛି | ଏହି ଦୁର୍ଘଟଣାରେ ୩୦ରୁ ଅଧିକ ଯାତ୍ରୀଙ୍କ ମୃତ୍ୟୁ ହୋଇଥିବାବେଳେ ୨୦୦ରୁ ଅଧିକ ଯାତ୍ରୀ ଆହତ ହୋଇଛନ୍ତି | ତେବେ ଆଜି ଆମେ ଆପଣଙ୍କୁ ୧୪ ବର୍ଷ ତଳର ଏମିତି ଏକ ଘଟଣା ବାବଦରେ ମନେପକାଇଦେବୁ ଯାହାକି ଆପଣ ଜାଣି ଆଶ୍ଚର୍ଯ୍ୟ ହୋଇଯିବେ |
Sambad is now on WhatsApp
Join and get latest news updates delivered to you via WhatsApp
ବାସ୍ତବରେ ୧୪ ବର୍ଷ ତଳେ ବି କରମଣ୍ଡଳ ଏକ୍ସପ୍ରେସ ଯାଜପୁର ରୋଡ ନିକଟରେ ଦୁର୍ଘଟଣାର ଶିକାର ହୋଇଥିଲା ଆଉ ସେତେବେଳେ ୧୬ ଜଣ ଯାତ୍ରୀଙ୍କର ମୃତ୍ୟୁ ହୋଇଥିବାବେଳେ ପ୍ରାୟ ୧୬୧ ଜଣ ଆହତ ହୋଇଥିଲେ| ଫେବୃୟାରୀ ୧୩, ୨୦୦୯ ଦିନ ବି ଟ୍ରେନଟି ଦ୍ରୁତ ଗତିରେ ହାଓଡ଼ାରୁ ଚେନ୍ନାଇ ଅଭିମୁଖେ ଯାଉଥିବାବେଳେ ୧୩ଟି ବଗି ଲାଇନଚ୍ୟୁତ ହୋଇଥିଲା ଆଉ ଏଥିରୁ ୧୧ଟି ସ୍ଲିପର ଓ ଦୁଇଟି ଜେନେରାଲ୍ ବଗି ଥିଲା। ରାତି ପ୍ରାୟ ୭:୩୦ରୁ ୭:୪୦ ମଧ୍ୟରେ ଏହି ଦୁର୍ଘଟଣା ଘଟିଥିଲା | ଆଉ ଘଟଣାଚକ୍ରରେ ସେଦିନ ଥିଲା ଶୁକ୍ରବାର।
ଏହି ଦୁର୍ଘଟଣା ପରେ ଆହତମାନଙ୍କୁ ସ୍ଥାନୀୟ ଡାକ୍ତରଖାନା ସହ କଟକ ସ୍ଥିତ ଏସସିବି ମେଡିକାଲ କଲେଜ ହସ୍ପିଟାଲରେ ଭର୍ତ୍ତି କରାଯାଇଥିଲା | ଦୁର୍ଘଟଣାକୁ ନେଇ ତତ୍କାଳୀନ ରେଳ ମନ୍ତ୍ରୀ ଲାଲୁ ଯାଦବ ତଦନ୍ତ ନିର୍ଦ୍ଦେଶ ଦେଇଥିଲେ | ତଦନ୍ତ ରିପୋର୍ଟରୁ ଜଣାପଡିଥିଲା ଯେ ଟ୍ରେନଟି ଟ୍ରାକ ପରିବର୍ତ୍ତନ କରୁଥିବା ବେଳେ ଲାଇନଚ୍ୟୁତ ହୋଇଯାଇଥିଲା | ସେତେବେଳେ ଟ୍ରେନର ବେଗ ଘଣ୍ଟା ପ୍ରତି ୧୧୫ କିଲୋମିଟର ଥିଲା |