ହାରୁଛି କରୋନା ଜିତୁଛି ମଣିଷ: ଦ୍ରୁତ ବେଗରେ ସୁସ୍ଥ ହେଉଛନ୍ତି କରୋନା ଆକ୍ରାନ୍ତ
ଭୁବନେଶ୍ବର: ବେଶ କିଛି ଦିନ ହେଲା କରୋନାରୁ ଦ୍ରୁତ ବେଗରେ ଆକ୍ରାନ୍ତ ସୁସ୍ଥ ହେଉଥିବା ଖବର ଗଣମାଧ୍ୟମର ଶିରୋନାମା ମଣ୍ଡନ କରୁଛି । କେବେ କେବେ ଆକ୍ରାନ୍ତଙ୍କ ଠାରୁ ସୁସ୍ଥ ହେବା ସଂଖ୍ୟା ଅଧିକ ରହୁଛି । ଏବେ ଯାଏଁ ୨ହଜାର ୯୯୪ ଜଣ ଆକ୍ରାନ୍ତ ହୋଇଥିବା ବେଳେ ସୁସ୍ଥ ହୋଇଛନ୍ତି ୧ ହଜାର ୯୯୩ ଜଣ । ସକ୍ରିୟ ରୋଗୀଙ୍କ ସଂଖ୍ୟା ହେଉଛି ମାତ୍ର ୯୯୦ । ଆଇସିଏମଆର ଗାଇଡଲାଇନ୍ ଅନୁସାରେ ଯେଉଁମାନଙ୍କୁ ସୁସ୍ଥ ବୋଲି ଘୋଷଣା କରି ଘରକୁ ଛଡା ଯାଉଛି ତାଙ୍କର କରୋନା ଟେଷ୍ଟ କରାଯାଉ ନାହିଁ, କେବଳ ଗୁରୁତର କରୋନା ଆକ୍ରାନ୍ତ ରୋଗୀଙ୍କୁ ଛାଡିବା ଆଗରୁ ଥରେ କରୋନା ପରୀକ୍ଷା କରାଯାଉଛି ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟରେ ଶତାଧିକ ନୂଆ କରୋନା ଆକ୍ରାନ୍ତ ଚିହ୍ନଟ ହେଉଥିବା ବେଳେ ବେଶ୍ ଅଧିକ ସଂଖ୍ୟାରେ ରୋଗୀ ସୁସ୍ଥ ହୋଇ ଘରକୁ ଫେରୁଛନ୍ତି । ଜୁନ୍ ମାସର ପ୍ରଥମ ସାତ ଦିନର ଆକ୍ରାନ୍ତ ଓ ସୁସ୍ଥଙ୍କ ସଂଖ୍ୟା ଉପରେ ନଜର ପକାଇବା । ଜୁନ୍ ୧ ତାରିଖରେ ୧୫୬ ଜଣ ଆକ୍ରାନ୍ତ ହୋଇଥିବା ବେଳେ ସୁସ୍ଥ ହୋଇଥିଲେ ୭୬ ଜଣ । ସେହିପରି ଜୁନ୍ ୨ ତାରିଖରେ ୧୪୧ ଜଣ ନୂଆ କରୋନା ରୋଗୀ ଚିହ୍ନଟ ହୋଇଥିଲେ ଏବଂ ସେହିଦିନ ୧୧୯ ଜଣ ସୁସ୍ଥ ହୋଇ ଘରକୁ ଫେରିଥିଲେ । ଜୁନ୍ ୩ ତାରିଖରେ ୧୪୩ ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୮୦ ଜଣ ସୁସ୍ଥ ହୋଇଥିଲେ । ଅନ୍ୟପଟେ ଜୁନ୍ ୪ ତାରିଖରେ ୯୦ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୯୧ ଜଣ ସୁସ୍ଥ ହୋଇଥିବା ସୂଚନା ଦେଇଥିଲା ସ୍ୱାସ୍ଥ୍ୟ ବିଭାଗ । ଜୁନ୍ ୫ ତାରିଖରେ ୧୩୦ ଜଣ ନୂଆ ରୋଗୀ ଚିହ୍ନଟ ହୋଇଥିବା ବେଳେ ୧୨୩ ଜଣ ସୁସ୍ଥ ହୋଇଥିଲେ । ସେହିପରି ଜୁନ୍ ୬ ତାରିଖରେ ଚଳିତ ମାସର ସର୍ବାଧିକ ୧୭୩ ଜଣ କରୋନା ଆକ୍ରାନ୍ତ ରାଜ୍ୟରେ ଚିହ୍ନଟ ହୋଇଥିଲେ ଏବଂ ସେହିଦିନ ୧୧୨ ଜଣ ସୁସ୍ଥ ହୋଇଥିଲେ । ଜୁନ୍ ୭ ତାରିଖରେ ମାତ୍ର ୭୫ ଜଣ ନୂଆ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୧୭୮ ଜଣ ସୁସ୍ଥ ହୋଇ ଘରକୁ ଫେରିଥିବା ସୂଚନା ଦେଇଛି ସ୍ୱାସ୍ଥ୍ୟ ବିଭାଗ ।
ସୋମବାର ରାଜ୍ୟରେ ୧୩୮ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୯୯ ଜଣ ସୁସ୍ଥ ହୋଇଛନ୍ତି । ତେବେ ଚଳିତ ମାସରେ ଏଯାଏଁ ଓଡିଶାରେ ୧୦୪୬ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୮୭୮ ଜଣ ସୁସ୍ଥ ହୋଇଛନ୍ତି । ଏହା ନୂଆ ଆକ୍ରାନ୍ତଙ୍କ ସଂଖ୍ୟାର ପ୍ରାୟ ୮୪ ପ୍ରତିଶତ । ଶେଷ ଖବର ସୁଦ୍ଧା ରାଜ୍ୟରେ ମୋଟ ୨୯୯୪ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୯୯୦ ଜଣ ଏବେ ବି ବିଭିନ୍ନ କୋଭିଡ୍ ହସ୍ପିଟାଲରେ ଚିକିତ୍ସାଧିନ ଅଛନ୍ତି । ଅନ୍ୟପଟେ ଏଯାଏଁ ୧୯୯୩ ଜଣ କରୋନା ଆକ୍ରାନ୍ତ ସୁସ୍ଥ ହୋଇ ଘରକୁ ଫେରିଛନ୍ତି । ଏହି ତଥ୍ୟ ଅନୁସାରେ ରାଜ୍ୟରେ ବର୍ତମାନ ସୁସ୍ଥ ହୋଇଥିବା ରୋଗୀଙ୍କ ତୁଳନାରେ ୫୦ ପ୍ରତିଶତ ।