କଟକ ବଜାରରେ ପୁଣି ନକଲି ଔଷଧ!
ରାଜ୍ୟର ୭ ଜିଲ୍ଲାକୁ ପଠାଯାଇଛି, ୧୨ରୁ ଅଧିକ ସ୍ଥାନରେ ଚଢଉ
କଟକ : କଟକ ବଜାରରେ ପୁଣି ନକଲି ଔଷଧ! ଏକ ଦାମୀ ବ୍ରାଣ୍ଡ୍ର ଔଷଧକୁ ନକଲ କରାଯାଇ ବଜାରକୁ ଛଡ଼ାଯାଇଛି। ଏହି ଔଷଧ ପାଟଣା, ବିହାର, ବେଙ୍ଗାଲୁରୁରୁ କଟକ, ଭୁବନେଶ୍ବରକୁ ଆସିଛି। କଟକରୁ ରାଜ୍ୟର ବିଭିନ୍ନ ଜିଲ୍ଲାକୁ ଏହି ନକଲି ଔଷଧ ଯାଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ, ଉଚ୍ଚ ରକ୍ତଚାପ ରୋଗୀଙ୍କ ପାଇଁ ବ୍ୟବହାର ହେଉଥିବା ଟେଲ୍ମା-୪୦ ଓ ଟେଲ୍ମା- ଏଏମ୍ ଔଷଧର ନକଲି ବ୍ରାଣ୍ଡ୍ ବିକ୍ରି ହେଉଥିବା ଅଭିଯୋଗକୁ ଗତକାଲିଠାରୁ ବିଭିନ୍ନ ସ୍ଥାନରେ ଚଢଉ ଜାରି ରହିଛି। କଟକର ମାଣିକଘୋଷ ବଜାର, ବାଙ୍କାବଜାର, ମଙ୍ଗଳାବାଗ, ବାଦାମବାଡି ସମେତ ୧୨ରୁ ଅଧିକ ସ୍ଥାନରେ ଡ୍ରଗ୍ସ କଣ୍ଟ୍ରୋଲ ବିଭାଗ ପକ୍ଷରୁ ଚଢଉ କରାଯାଇ ଏକ ଦାମୀ ବ୍ରାଣ୍ଡ କମ୍ପାନିର ନକଲି ଔଷଧକୁ ଜବତ କରାଯାଇଛି। ଅନ୍ୟପଟେ କଟକର ଯେଉଁସବୁ ସ୍ଥାନରୁ ଔଷଧ ଜବତ୍ କରାଯାଇଛି, ସେହି ଔଷଧ ସବୁ ଉକ୍ତ କମ୍ପାନି ପ୍ରସ୍ତୁତ କରି ନଥିବା ସ୍ପଷ୍ଟ ହୋଇଥିବା ବେଳେ ଏବେ ବିଭାଗ ଔଷଧର ପରୀକ୍ଷା ରିପୋର୍ଟକୁ ଅପେକ୍ଷା କରିଛି। ନମୁନା ପରୀକ୍ଷା ରିପୋର୍ଟ ଆସିବାପରେ ଏହା ଅସଲି ନା ନକଲି ତାହା ସ୍ପଷ୍ଟ ହେବ। କିଛିମାସ ହେଲା ବଜାରକୁ ଏହି ଔଷଧ ଆସି ଥିବାରୁ ବିଭାଗ ପକ୍ଷରୁ ସତର୍କତାମୂଳକଭାବେ ଚଢଉ କରାଯାଇ ଏହାକୁ ରୋକିବା ପାଇଁ ପଦକ୍ଷେପ ନିଆଯାଇଛି।
ଔଷଧ ବିକ୍ରି ନ କରି ଫେରାଇ ଦେବାକୁ ନିର୍ଦ୍ଦେଶ
କମ୍ପାନିର ଅସ୍ବୀକାର; ରିପୋର୍ଟ ଅପେକ୍ଷାରେ ବିଭାଗ
ଅନ୍ୟପକ୍ଷରେ; କଟକ, ଭୁବନେଶ୍ବର, ବାଲେଶ୍ବର ସମେତ ରାଜ୍ୟର ପ୍ରାୟ ୭ଟି ଅଞ୍ଚଳକୁ ଏହି ଔଷଧ ଯାଇଥିବା ଜଣାପଡ଼ିବା ପରେ ସେସବୁ ଔଷଧକୁ ବିକ୍ରି ନକରିବା ପାଇଁ ନିର୍ଦ୍ଦେଶନାମା ସହିତ ସେସବୁକୁ ବଜାରରୁ ଫେରସ୍ତ ଆଣିବାକୁ ସମସ୍ତଙ୍କୁ ଚିଠି ଲେଖିଛି ଡ୍ରଗ୍ସ କଣ୍ଟ୍ରୋଲ ବିଭାଗ। ପାଖାପାଖି ହଜାରେ ଦୋକାନକୁ ଏହି ଔଷଧ ଯାଇଥିବା ଆଶଙ୍କା କରାଯାଉଛି। ଡ୍ରଗ୍ସ କଣ୍ଟ୍ରୋଲ ବିଭାଗ ଏଯାଏ ଏଭଳି ୩ ଲକ୍ଷ ଟଙ୍କାର ଔଷଧ ଜବତ୍ କରି ସାରିଲାଣି।
ଉଲ୍ଲେଖଯୋଗ୍ୟ ଯେ ଗତ ବର୍ଷ ଜୁନ ୧୨ ତାରିଖରେ କଟକରୁ ପେଟି ପେଟି ନକଲି ଔଷଧ ଜବତ୍ ଘଟଣା ସାରା ରାଜ୍ୟରେ ଚହଳ ସୃଷ୍ଟି କରିଥିଲା। ଏହି ଘଟଣାରେ ଶିବ ଜେନାଙ୍କ ସମେତ ତାଙ୍କ ପତ୍ନୀ ଓ ୨ କର୍ମଚାରୀଙ୍କୁ ଗିରଫ ବି କରାଯାଇଥିଲା। ଏହି ଘଟଣା ଏବେ ବି ଅଦାଲତରେ ବିଚାରାଧୀନ ରହିଥିବାବେଳେ ସମସ୍ତେ ଜାମିନ୍ରେ ରହିଛନ୍ତି। ଏବେ ପୁଣି ଉଚ୍ଚରକ୍ତଚାପ ଔଷଧର ନକଲ କରାଯାଇ ବଜାରକୁ ଛଡ଼ାଯିବା ଘଟଣା ଉଦ୍ବେଗର କାରଣ ହୋଇଛି। ଆଜି ଆସିଷ୍ଟାଣ୍ଟ ଡ୍ରଗ୍ସ କଣ୍ଟ୍ରୋଲର ଧର୍ମଦେବ ପୁହାଣ, ତୁଷାର ରଞ୍ଜନ ପାଣିଗ୍ରାହୀ, ହରିପ୍ରିୟା ମଲ୍ଲିକଙ୍କ ନେତୃତ୍ବରେ କଟକର ବିଭିନ୍ନ ସ୍ଥାନରେ ଚଢଉ କରାଯାଇଛି।