ଜୟ-ବିଜୟ ଦ୍ୱାର, ବେହେରଣ ଦ୍ୱାରରେ ବି ଫାଟ: ଶ୍ରୀମନ୍ଦିର ସୁରକ୍ଷା କାହା ଦାୟିତ୍ୱ?
ସୀମା ଡେଇଁଲାଣି ପ୍ରତ୍ନତତ୍ତ୍ବ ବିଭାଗ ଅବହେଳା, କ୍ରାକ୍ ମିଟରରେ ଅନୁଧ୍ୟାନ ନାମକୁ ମାତ୍ର
ପୁରୀ : ବିଶ୍ବର ଅଗଣିତ ଭକ୍ତଙ୍କ ଅସ୍ମିତା ସହ ଜଡ଼ିତ ଶ୍ରୀମନ୍ଦିରକୁ କେତେ ଯେ ଅବହେଳା କରାଯାଉଛି, ତାହା ଏବେ ଜଳଜଳ ଦିଶିଲାଣି। କିଛିଦିନ ତଳେ ଶ୍ରୀମନ୍ଦିର ନାଟମଣ୍ଡପରେ ଫାଟ ଦେଖିବାକୁ ମିଳିଥିଲା। ଏବେ ଜୟ-ବିଜୟ ଦ୍ବାର, ବେହେରଣ ଦ୍ବାର, ଘଣ୍ଟିଦ୍ବାରରେ ବି ଫାଟ ଦେଖାଦେଇଛି। ଗୋଟିଏ ନୁହେଁ, ଏକାଧିକ ସ୍ଥାନରେ ଏଭଳି ଫାଟ ରହିଛି।
Sambad is now on WhatsApp
Join and get latest news updates delivered to you via WhatsApp
ପୂର୍ବରୁ ନାଟମଣ୍ଡପ ଛାତରେ ଫାଟ ରହିଥିବା ଦେଖିବାକୁ ମିଳିଥିଲା। ଏହି ଫାଟ ଜୟ-ବିଜୟ ଦ୍ବାର ଦେଇ ଭିତରକାଠକୁ ପ୍ରବେଶ ପୂର୍ବରୁ ଦାନ ହୁଣ୍ଡି ଓ ଜୟ-ବିଜୟ ଦ୍ବାର ମଝିରେ ଛାତରେ ଥିବା ଏକ ତିନିକୋଣିଆ କୋଠରି ଭିତରେ ରହିଛି। ଏହି କୋଠାରିରେ ଆଗରୁ ଠାକୁରଙ୍କ ଫଟୋଚିତ୍ର ଲାଗୁଥିଲା। ଏବେ ପ୍ରତ୍ନତତ୍ତ୍ବ ବିଭାଗ ଏଠାରୁ ଠାକୁରଙ୍କ ଫଟୋଚିତ୍ର ବାହାର କରିଦେଇଛି। ଏହି ତିନିକୋଣିଆ କୋଠରି ଭିତରେ ପ୍ରାୟ ଅଢ଼େଇ ଫୁଟ ଲମ୍ବ ଓ ଦେଢ଼ ଇଞ୍ଚ ଓସାରର ଫାଟ ଦେଖିବାକୁ ମିଳିଥିଲା। ଏବେ ନାଟମଣ୍ଡପର ଏକାଧିକ ସ୍ଥାନରେ ଫାଟ ରହିଥିବା ଦେଖିବାକୁ ମିଳିଛି। କିନ୍ତୁ ପ୍ରତ୍ନତତ୍ତ୍ବ ବିଭାଗର ଅଧିକାରୀମାନେ ଏହାକୁ ପୁରୁଣା ଫାଟ ବୋଲି ସଫେଇ ଦେଉଛନ୍ତି। ନାଟମଣ୍ଡପରେ ଲଗା ଯାଇଥିବା କ୍ରାକ୍ ମିଟର ଜରିଆରେ ଏହି ଫାଟର ଅନୁଧ୍ୟାନ କରାଯାଉଛି ଓ ଖଡଗପୁର ଆଇଆଇଟି ଟିମ୍ ଏହାର ଅନୁଧ୍ୟାନ କରୁଛନ୍ତି ବୋଲି କହୁଛନ୍ତି। କିନ୍ତୁ ଆଜି ଘଣ୍ଟିଦ୍ବାର, ଜୟ-ବିଜୟ ଦ୍ବାର ଓ ବେହେରଣ ଦ୍ବାରରେ ବି ବଡ଼ ବଡ଼ ଫାଟ ଦେଖିବାକୁ ମିଳିବା ପ୍ରତ୍ନତତ୍ତ୍ବ ବିଭାଗର ଏହି ମିଛକୁ ଧରା ପକାଇ ଦେଇଛି।
ଘଣ୍ଟିଦ୍ବାର ପ୍ରବେଶ ପଥ ଦ୍ବାରରେ ବାମପାର୍ଶ୍ବରେ ଚୁନ ଖସି ଫାଟ ଜଳଜଳ ଦେଖାଯାଉଛି। ଜୟ-ବିଜୟଦ୍ବାରର ଦୁଆର ବନ୍ଧରେ ବି ଏକ ଲମ୍ବା ଫାଟ ରହିଥିବା ଦେଖିବାକୁ ମିଳିଛି। ଏହି ଫାଟର ଲମ୍ବା ପ୍ରାୟ ୩ ଫୁଟ ହେବ। ବେହେରଣ ଦ୍ବାର ଦେଇ ବାହାରିବା ବେଳେ ଡାହାଣ ପାଶ୍ବରେ ବି ବଡ଼ ଫାଟ ରହିଥିବା ଦେଖିବାକୁ ମିଳିଛି। ଏହି ଫାଟ ଲମ୍ବିବାରେ ଲାଗିଛି। ଏଥିରେ ଲୁହାର ଛୋଟ କ୍ଲାମ୍ପ ଦେଇ ଫାଟ ଅଟକାଇବାକୁ ପ୍ରତ୍ନତତ୍ତ୍ବ ବିଭାଗ ଚେଷ୍ଟା କରୁଥିଲେ ମଧ୍ୟ କାମ ଯେଭଳି କରାଯାଇଛି, ତାହା ଲୋକ ଦେଖାଣିଆ ଭଳି ଲାଗୁଛି।
ଏ ସଂପର୍କରେ ଭାରତୀୟ ପ୍ରତ୍ନତତ୍ତ୍ବ ବିଭାଗର ଜନୈକ ଯନ୍ତ୍ରୀ କହିଛନ୍ତି, ନାଟମଣ୍ଡପରେ ଓ ଅନ୍ୟାନ୍ୟ ସ୍ଥାନରେ ଯେଉଁ ଫାଟ ରହିଛି, ତାହା ପୁରୁଣା ଫାଟ। ନାଟମଣ୍ଡପର ଫାଟର ତୀବ୍ରତା ମାପିବା ପାଇଁ ଏକ କ୍ରାକ ମିଟର ନାଟମଣ୍ଡପରେ ଲଗାଯାଇଛି। ଆଇଆଇଟି ଖଡ଼ଗପୁର ପକ୍ଷରୁ କ୍ରାକ୍ ମିଟର ଜରିଆରେ ଫାଟର ତୀବ୍ରତା ଅନୁଧ୍ୟାନ କରାଯାଉଛି ବୋଲି ଯନ୍ତ୍ରୀ ଜଣକ କହିଛନ୍ତି।