ଚର୍ଚ୍ଚାରେ ଓଡ଼ିଆ ସର୍ଜନ୍‌ କମାଣ୍ଡର ଅନନ୍ୟା: ଗୁରୁତର ୧୮ ନାବିକଙ୍କୁ ବଞ୍ଚାଇଲେ

ବାରିପଦା: ବାରିପଦାର ଝିଅ ‘ସର୍ଜନ୍‌ କମାଣ୍ଡର’ ଅନନ୍ୟା ଦଳବେହେରା। କ୍ଷେପଣାସ୍ତ୍ର ମାଡ଼ରେ ଧ୍ବସ୍ତବିଧ୍ବସ୍ତ ଏକ ପଣ୍ୟବାହୀ ଜାହାଜରେ ଥିବା ୧୮ ଆହତମାନଙ୍କୁ ଚିକିତ୍ସା କରି ସେ ବଞ୍ଚାଇଛନ୍ତି। ଯୁଦ୍ଧର ଘନଘଟା ଭିତରେ ସମୁଦ୍ର ଭିତରେ ଏତେବଡ଼ ଦାୟିତ୍ୱ ନିର୍ବାହ କରିବାପରେ ସେ ନିଜକୁ ଭାଗ୍ୟବାନ ମନେକରିଛନ୍ତି। ଏଥିପାଇଁ ବି ତାଙ୍କୁ ବିଭିନ୍ନ ମହଲରେ ପ୍ରଶଂସା କରାଯାଇଛି।

ସୂଚନା ଅନୁସାରେ, ଇସ୍ରାଏଲର ଗାଜା ଉପରେ ଆକ୍ରମଣ ଯୋଗୁଁ ଲୋହିତ ସାଗରରେ ଭୟଙ୍କର ପରିସ୍ଥିତି ସୃଷ୍ଟି ହୋଇଛି। ଲୋହିତ ସାଗର ଦେଇ ଭାରତ ସମେତ ଅନ୍ୟ ରାଷ୍ଟ୍ରର ପଣ୍ୟବାହୀ ଜାହାଜ ମଧ୍ୟ ଯାତାୟାତ କରୁଛି। ଏହି ଜାହାଜଗୁଡ଼ିକୁ ସୁରକ୍ଷା ଦେବାପାଇଁ ଭାରତୀୟ ନୌବାହିନୀ ସେ ଅଞ୍ଚଳରେ ସଜାଗ ଅଛନ୍ତି। ଗତ ୬ ତାରିଖରେ ସିରିଆର ହୁତି ବିଦ୍ରୋହୀଙ୍କ କ୍ଷେପଣାସ୍ତ୍ର ମାଡ଼ରେ ୱେଷ୍ଟଇଣ୍ଡିଜ୍ ବାର୍‌ବାଡୋସ୍‌ର ଏକ ପଣ୍ୟବାହୀ ଜାହାଜ ‘ଏମ୍‌ଭି ଟ୍ରୁ କନ୍‌ଫିଡେନ୍‌ସ’ ଧ୍ବସ୍ତ ହୋଇଯାଇଥିଲା। ଏହି ଜାହାଜରେ ୨୧ ଜଣ ନାବିକ ଓ କର୍ମଚାରୀଙ୍କ ମଧ୍ୟରୁ ଜଣେ ଭାରତୀୟ ମଧ୍ୟ ଥିଲେ। କ୍ଷେପଣାସ୍ତ୍ର ମାଡ଼ରେ ଘଟଣାସ୍ଥଳରେ ୩ ଜଣ ନାବିକଙ୍କର ମୃତ୍ୟୁ ହେବାସହ ଅନ୍ୟମାନେ ଗୁରୁତର ଆହତ ହୋଇଥିଲେ।

ଖବର ପାଇ ସେମ‌ାନଙ୍କୁ ଉଦ୍ଧାର କରିବାକୁ ପହଞ୍ଚିଥିଲା ଭାରତୀୟ ନୌସେନାର ଆଇଏନ୍‌ଏସ୍‌ କୋଲକାତା ଯୁଦ୍ଧପୋତ। ଉକ୍ତ ଜାହାଜର ଏକମାତ୍ର ଡାକ୍ତର ଭାବରେ ନିଯୁକ୍ତ ଥିଲେ ବାରିପଦାର ଝିଅ ‘ସର୍ଜନ୍‌ କମାଣ୍ଡର’ ଅନନ୍ୟା ଦଳବେହେରା। ଜଣେ ମାତ୍ର ଡାକ୍ତରୀ ସହାୟକଙ୍କୁ ନେଇ ଅନନ୍ୟା ରାତିତମାମ ସମସ୍ତ ଆହତଙ୍କୁ ଚିକିତ୍ସା କରି ସେମାନଙ୍କ ଜୀବନ ବଞ୍ଚାଇବାରେ ସଫଳ ହୋଇଥିଲେ। ସୂଚନାଯୋଗ୍ୟ; ମୟୂରଭଞ୍ଜର ଜଣାଶୁଣା ସାହିତ୍ୟିକ ମନୋଜ ଦଳବେହେରା ଓ ସୁପ୍ରୀତି ଦଳବେହେରାଙ୍କ ଝିଅ ହେଉଛନ୍ତି ଅନନ୍ୟା। ଅନନ୍ୟାଙ୍କ ସ୍ବାମୀ ନୀତିନ ଦାସ ମଧ୍ୟ ଭାରତୀୟ ସ୍ଥଳସେନାରେ ଡାକ୍ତର ଅଛନ୍ତି।