୩ ଏକର ଫସଲ ଦଳିଦେଲେ ହାତୀ

ତେଲକୋଇ  : କେନ୍ଦୁଝର ବନଖଣ୍ଡ ତେଲକୋଇ ରେଞ୍ଜ ବିମଳା ଫରେଷ୍ଟ ସେକ୍ସନ ଅନ୍ତର୍ଗତ କରଦାଙ୍ଗି ଗ୍ରାମରେ ୧୨ ହାତୀ ୩ ଏକର ପାଚିଲା ଧାନ ଖାଇବା ସହିତ ମାଡିଦଳି ନଷ୍ଟ କରିଦେଇଛନ୍ତି। ଗତକାଲି ବିଳମ୍ବିତ ରାତିରେ ହାତୀ ପଲ କରଦାଙ୍ଗି ଗ୍ରାମ ବ୍ରାହ୍ମଣମୁଣ୍ଡା ଚକରେ ପଶି ରଞ୍ଜନ ନନ୍ଦ, ସୁଶାନ୍ତ ମହାନ୍ତ, ସୁଦାମ ପାତ୍ରଙ୍କ ଅମଳ ଅପେକ୍ଷାରେ ଥିବା ୩ ଏକର ପାଚିଲା ଧାନ ଖାଇବା ସହିତ ମାଡିଦଳି ନଷ୍ଟ କରିଦେଇଛନ୍ତି।

ବିମଳା ଫରେଷ୍ଟର ଜ୍ୟୋର୍ତିମୟୀ ପଟ୍ଟନାୟକଙ୍କ ନେତୃତ୍ବରେ ହାତୀ ସୁରକ୍ଷା ବାହିନୀ, ଗଜସାଥୀ ଓ ଗ୍ରାମବାସୀ ମିଶି ହାତୀ ପଲକୁ ଗାଁରୁ ଜଙ୍ଗଲ ଆଡ଼କୁ ଘଉଡ଼ାଇ ଦେଇଥିଲେ। ହାତୀ ପଲ ଶିଖେଶ୍ବରୀ ସଂରକ୍ଷିତ ଜଙ୍ଗଲ କଲଝରୀ ନିକଟରେ ରହିଥିବା ଜଣାପଡିଛି। ଆଜି ସନ୍ଧ୍ୟାରୁ ବନ ବିଭାଗ ପକ୍ଷରୁ ସ୍ଥାନୀୟ ଅଞ୍ଚଳରେ କଡ଼ା ନଜର ରଖାଯାଇଛି। ହାତୀପଲକୁ ବିରକ୍ତି ନ କରିବା ସହ ଜଙ୍ଗଲକୁ କୌଣସି ବ୍ୟକ୍ତି ନ ଯିବାକୁ ତେଲକୋଇ ରେଞ୍ଜର ରଞ୍ଜନ କୁମାର ପାଣି ସ୍ଥାନୀୟ ଅଧିବାସୀଙ୍କୁ ଅନୁରୋଧ କରିଛନ୍ତି।