ସିଏମ୍ସି କାର୍ଯ୍ୟାଳୟ ଘେରାଉ ବେଳେ ପୁଲିସ-ବିଜେପି କର୍ମୀ ମୁହାଁମୁହିଁ : ଅତିରିକ୍ତ ଡିସିପିଙ୍କ ସମେତ ୪ ପୁଲିସ ଆହତ
କଟକ: ଗୁରୁବାର କଟକ ମହାନଗର ନିଗମ (ସିଏମ୍ସି ) କାର୍ଯ୍ୟାଳୟକୁ ବିଭିନ୍ନ ଦାବି ନେଇ ବିଜେପି କର୍ମୀ ଘେରାଉ କରିଥିବା ବେଳେ ପୁଲିସ୍ ସହ ମୁହାଁମୁହଁ ହୋଇଛି। ବିଜେପି କର୍ମୀମାନେ କାର୍ଯ୍ୟାଳୟ ଉପରକୁ ଅଣ୍ଡା ଓ ବିଲାତି ବାଇଗଣ ଫିଙ୍ଗିବା ସହ ଭିତରକୁ ଧସେଇ ପଶିବାକୁ ଉଦ୍ୟମ କରିବା ବେଳେ ପୁଲିସ ସେମାନଙ୍କୁ ବାଧା ଦେଇଥିଲା। ଏହାପରେ ଘଟଣାସ୍ଥଳରେ ଉତ୍ତେଜନା ସୃଷ୍ଟି ହୋଇଥିଲା।
ପୁଲିସ୍ ବିଜେପି କର୍ମୀଙ୍କୁ ଅଟକାଇବାକୁ ଗଲା ବେଳେ ସେମାନେ ଢେଲାମାଡ଼ କରିଥିଲେ। ଫଳରେ ଅତିରିକ୍ତ ଡିସିପି ରାଜକିଶୋର ପାଇକରାୟଙ୍କ ସମେତ ୩ ଜଣ କନେଷ୍ଟବଲ୍ଙ୍କ ଉପରେ ଢେଲା ବାଜିବାରୁ ସେମାନେ ଗୁରୁତର ହୋଇଛନ୍ତି। ସେମାନଙ୍କୁ ଗୁରୁତର ଅବସ୍ଥାରେ କଟକ ସିଟି ହସ୍ପିଟାଲ୍ରେ ଭର୍ତ୍ତି କରାଯାଇଛି। ଘଟଣାକୁ ଆୟତ୍ତ କରିବା ପାଇଁ ସଂପୃକ୍ତ ଅଞ୍ଚଳରେ ୪ ପ୍ଲାଟୁନ୍ ପୁଲିସ୍ ଫୋର୍ସ ମୁତୟନ କରାଯାଇଛି।
ଉଲ୍ଲେଖଯୋଗ୍ୟ କି, ମଶାତେଲ ଦୁର୍ନୀତିର ତଦନ୍ତ ଓ ଜାଇକା ପ୍ରକଳ୍ପ କାର୍ଯ୍ୟରେ ବିଳମ୍ବ ନେଇ କଟକ ନଗର ବିଜେପି ପକ୍ଷରୁ ପୂର୍ବତନ ମନ୍ତ୍ରୀ ସମୀର ଦେଙ୍କ ନେତୃତ୍ୱରେ ଗୁରୁବାର ସିଏମସି କାର୍ଯ୍ୟାଳୟ ଘେରାଉ କରାଯାଇଥିଲା।
