କଟକ ଜିଲ୍ଲା ଅଦାଲତ, ଏସ୍ଡିଜେଏମ୍ କମ୍ପ୍ଲେକ୍ସ ସଟ୍ଡାଉନ
କଟକ : କଟକ ଜିଲ୍ଲା ଅଦାଲତ ଓ ପରିସରରେ ଥିବା ଅନ୍ୟ ସମସ୍ତ ଅଦାଲତ ଜାନୁଆରି ୧୭ ତାରିଖ ପର୍ଯ୍ୟନ୍ତ ବନ୍ଦ ରହିବ। ରାଜ୍ୟରେ କରୋନା ସଂକ୍ରମଣ ଅପ୍ରତ୍ୟାଶିତ ଭାବେ ବୃଦ୍ଧି ପାଇବା ସହିତ ଅଦାଲତର ବହୁ କର୍ମଚାରୀ କରୋନା ଆକ୍ରାନ୍ତ ହେବା ଘଟଣାକୁ ବିଚାରକୁ ନିଆଯାଇ ଜିଲ୍ଲା ଅଦାଲତ ପକ୍ଷରୁ ଏପରି ବିଜ୍ଞପ୍ତି ପ୍ରକାଶ ପାଇଛି। ଜାନୁଆରି ୧୪ରୁ ୧୭ ତାରିଖ ପର୍ଯ୍ୟନ୍ତ ଜିଲ୍ଲା ଅଦାଲତ କମ୍ପ୍ଲେକ୍ସ ଓ ଏସଡିେଜଏମ୍ ଅଦାଲତ କମ୍ପ୍ଲେକ୍ସକୁ ସଂପୂର୍ଣ୍ଣ ଭାବେ ସଟ୍ଡାଉନ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, କଟକ ମୁଖ୍ୟାଳୟରେ କୋର୍ଟ ଓ ଏହାର କାର୍ଯ୍ୟାଳୟରେ ଜାନୁଆରି ୧୮ରୁ ସ୍ବାଭାବିକ କାର୍ଯ୍ୟ ଆରମ୍ଭ ହେବ। କୋର୍ଟ କମ୍ପ୍ଲେକ୍ସକୁ କଣ୍ଟେନମେଣ୍ଟ ଜୋନ୍ ଭାବେ ସିଏମସି ପକ୍ଷରୁ ଗତ ୧୩ ତାରିଖରେ ଘୋଷଣା କରାଯିବା ପରେ ଜିଲ୍ଲା ଅଦାଲତ ପକ୍ଷରୁ ଆଜି ଏପରି ବିଜ୍ଞପ୍ତି ପ୍ରକାଶ ପାଇଛି। ଜିଲ୍ଲା ଅଦାଲତ ପରିସର ସଂଲଗ୍ନ କଟକ ବାର୍ ଆସୋସିଏସନ କୋଠା କଣ୍ଟେନମେଣ୍ଟ ଜୋନ୍ ପରିସର ଅନ୍ତର୍ଭୁକ୍ତ ହୋଇଥିବାରୁ ଏହାକୁ ମଧ୍ୟ ସଟ୍ଡାଉନ ଘୋଷଣା କରାଯାଇଛି। ଜିଲ୍ଲା ଅଦାଲତ ଫାଟକ ସହିତ କଟକ ବାର୍ ଆସୋସିଏସନ୍ ସଂଯୋଗ ରାସ୍ତାର ଫାଟକକୁ ସିଲ୍ କରାଯାଇଛି। କରୋନା ମୁକାବିଲା ପାଇଁ ଏପରି ଘୋଷଣା କରାଯାଇଥିବାରୁ ଏଥିରେ ସହଯୋଗ କରି ଆଇନଜୀବୀମାନେ ବାର୍ ଆସୋସିଏସନ କକ୍ଷକୁ ନ ଆସିବାକୁ କଟକ ବାର୍ ଆସୋସିଏସନ୍ ସଂପାଦକ ବିଶ୍ବଜିତ ମହାପାତ୍ର ଅନୁରୋଧ କରିଛନ୍ତି।
ଉଲ୍ଲେଖ ଯୋଗ୍ୟ ଯେ ସିଭିଲ କୋର୍ଟ କଂପ୍ଲେକ୍ସରେ ୩୯ଜଣ କରୋନା ପଜିଟିଭ ଚିହ୍ନଟ ହେବା ନେଇ ସିଏମସି ନିକଟରେ ସୂଚନା ପହଞ୍ଚି ଥିଲା। ଏହାପରେ କୋର୍ଟ କଂପ୍ଲେକ୍ସକୁ କଣ୍ଟେନମେଣ୍ଟ ଜୋନ ଭାବେ ସିଏମସି କମିସନର ଘୋଷଣା କରିଥିଲେ। ହାଇକୋର୍ଟ ନିକଟରେ ଜିଲ୍ଲା ଅଦାଲତ କମ୍ପ୍ଲେକ୍ସ ରହିଥିବା ବେଳେ ଏସଡିଜେଏମ୍ ଅଦାଲତ କମ୍ପ୍ଲେକ୍ସ ରିଂ ବନ୍ଧ ପାଖରେ ଜିଲ୍ଲାପାଳଙ୍କ କାର୍ଯ୍ୟାଳୟ ପୂର୍ବରୁ ରହିଛି। ପୂର୍ବରୁ କରୋନା ସଂକ୍ରମଣ ସ୍ଥିତି ଯୋଗୁଁ ହାଇକୋର୍ଟ ଓ ଏହାର କାର୍ଯ୍ୟାଳୟକୁ ଜାନୁଆରି ୧୩ରୁ ୧୭ ତାରିଖ ପର୍ଯ୍ୟନ୍ତ ସଂପୂର୍ଣ୍ଣ ଭାବେ ସଟ୍ଡାଉନ ଘୋଷଣା କରାଯାଇଛି।