ଭୁବନେଶ୍ବର: ସାଇବର ଅପରାଧକୁ ମୁକାବିଲା କରିବା ଲାଗି ଆଉ ପାଦେ ଆଗେଇଛି ଓଡ଼ିଶା ପୁଲିସ | ଆଜି ଭୁବନେଶ୍ବରରେ ନବନିର୍ମିତ ସାଇବର କମ୍ପ୍ଲେକ୍ସକୁ ଉଦଘାଟନ କରିଛନ୍ତି ପୁଲିସ ଡିଜି ଅଭୟ | କଟକରେ ଅବସ୍ଥାପିତ ସାଇବର ଥାନା ଏବେ ଏଠାରେ ଚାଲିବ |
Sambad is now on WhatsApp
Join and get latest news updates delivered to you via WhatsApp
ଉଦଘାଟନ ଅବସରରେ ପୁଲିସ ମହାନିର୍ଦେଶକ ଶ୍ରୀ ଅଭୟ ଗଣମାଧ୍ୟମକୁ ସୂଚନା ଦେଇ କହିଛନ୍ତି, ସାଇବର ଅପରାଧ ମୁକାବିଲା ଏବେ ଆମ ପାଇଁ ବଡ଼ ଚ୍ୟାଲେଞ୍ଜ | ରାଜ୍ୟରେ ଯେଉଁଭଳି ସାଇବର୍ ଅପରାଧ ହେଉଛି ତାହାର ମୁକାବିଲା ଲାଗି ପୁଲିସ କର୍ମଚାରୀଙ୍କର ଦକ୍ଷତା ବୃଦ୍ଧିର ଆବଶ୍ୟକତା ରହିଛି | ଅନ୍ତତଃ ଗୋଟିଏ ଥାନାରେ ଜଣେ କର୍ମଚାରୀ ସାଇବର ଅପରାଧର ତଦନ୍ତ କରିବାକୁ ଯେପରି ସକ୍ଷମ ହେବେ ତାହା ଉପରେ ଧ୍ୟାନ ଦିଆଯାଉଛି | ପୁଲିସ କର୍ମଚାରୀଙ୍କ ତାଲିମ ପାଇଁ ଜାତୀୟ ପୁଲିସ ଏକାଡେମି ସହ ଆଲୋଚନା ହୋଇଛି | ଜାତୀୟ ପୁଲିସ ଏକାଡେମିରେ ଥିବା ନ୍ୟାସନାଲ୍ ଡିଜିଟାଲ୍ କ୍ରାଇମ୍ ରିସର୍ଚ ଆଣ୍ଡ୍ ଟ୍ରେନିଂ ସେଣ୍ଟର(ଏନଡିସିଆରଟିସି) ପକ୍ଷରୁ ଏହି ତାଲିମ ପ୍ରଦାନ କରାଯିବ | ୮ଟି ପର୍ଯ୍ୟାୟରେ ତାଲିମ ଦିଆଯିବାକୁ ଲକ୍ଷ ରଖାଯାଇଛି ବୋଲି ପୁଲିସ ମହାନିର୍ଦେଶକ ସୂଚନା ଦେଇଛନ୍ତି| ଏହି ଉଦଘାଟନୀ ଉତ୍ସବରେ କେତେକ ବରିଷ୍ଠ ପୁଲିସ ଅଧିକାରୀ ଉପସ୍ଥିତ ଥିଲେ |