ଭୁବନେଶ୍ବର: ୨୦୨୪ରେ ରାଜ୍ୟରେ ଆପରାଧିକ ମାମଲା ସଂଖ୍ୟା ୨ ଲକ୍ଷ ଟପିଯାଇଛି। ୨୦୨୩ରେ ଏହି ସଂଖ୍ୟା ୧ ଲକ୍ଷ ୯୯ ହଜାର ଥିଲା ବେଳେ ୨୦୨୪ରେ ରୁଜୁ ହୋଇଥିବା ଧର୍ତ୍ତବ୍ୟ ଅପରା‌ଧ ମାମଲା ସଂଖ୍ୟା ୨ ଲକ୍ଷ ୧୪ ହଜାର ୧୧୩ ହୋଇଛି। ଏହା ମଧ୍ୟରୁ ୧,୩୯,୦୦୧ ମାମଲାରେ ଚାର୍ଜସିଟ୍‌ ଦାଖଲ କରାଯାଇଛି। ଆଜି ଗୃହ ବିଭାଗ ପକ୍ଷରୁ ଜାରି ହୋଇଥିବା ଶ୍ବେତପତ୍ରରେ ଏହି ତଥ୍ୟ ଦିଆଯାଇଛି। ତେବେ ସାଇବର୍‌ ଅପରାଧ ସଂଖ୍ୟା ପ୍ରତିବର୍ଷ ବଢ଼ୁଥିବାର ତଥ୍ୟ ଚିନ୍ତା ବଢ଼ାଇଦେଇଛି। ୨୦୨୩ରେ ସାଇବର୍‌ ଅପରାଧ ମାମଲା ୨୩୪୮ ଥିଲା ବେଳେ ୨୦୨୪ରେ ତାହା ୨୫୦୧ରେ ପହଞ୍ଚିଛି। ସେଥିରୁ ମାତ୍ର ୨୭୨ଟି ଅର୍ଥାତ୍‌ ୧୧% ମାମଲାରେ ଚାର୍ଜସିଟ୍‌ ହୋଇଛି। ୭୫୦ ଜଣ ଅଭିଯୁକ୍ତ ଏହି ଅପରାଧରେ ସଂପୃକ୍ତ ଥିଲା ବେଳେ ୫୮୧ ଜଣ ଅପରାଧୀଙ୍କୁ ରାଜ୍ୟ 
ଭିତରୁ ଓ ବାହାରୁ ଗିରଫ କରାଯାଇଛି। 

Advertisment

ଦୁଷ୍କର୍ମ ଓ ହତ୍ୟାକାଣ୍ଡ ବି ଅତ୍ୟନ୍ତ ଉଦ୍‌ବେଗର ବିଷୟ ହୋଇଛି। ୨୦୨୪ରେ  ମୋଟ ୩୦୫୪ଟି ଦୁଷ୍କର୍ମ ମାମଲା ରୁଜୁ ହୋଇଛି। ଏହା ମଧ୍ୟରୁ ୨୯୮୬ ମାମଲା ସତ୍ୟ ବୋଲି ସରକାର ସ୍ବୀକାର କରିଛନ୍ତି। ତେବେ ଚାର୍ଜସିଟ୍‌ ହାର ୬୪% ରହିଛି ଅର୍ଥାତ୍‌ ୧୯୪୮ଟି ମାମଲାରେ ଚାର୍ଜସିଟ୍‌ ଦାଖଲ ହୋଇଛି। ମୋଟ ମାମଲାକୁ ହିସାବକୁ ନେଲେ ରାଜ୍ୟରେ ପ୍ରତିଦିନ ୮ରୁ ଅଧିକ ଦୁଷ୍କର୍ମ ମାମଲା ହେଉଛି ବୋଲି ଧରିବାକୁ ପଡ଼ିବ। ସେମିତି ହତ୍ୟାକାଣ୍ଡ ମାମଲାରେ ଚାର୍ଜସିଟ୍‌ ହାର ଆହୁରି ଦୁର୍ବଳ। ୨୦୨୪ରେ ୧୨୮୫ଟି ହତ୍ୟା ମାମଲା ରୁଜୁ ହୋଇଥିଲା ବେଳେ ସେଥିରୁ ୧୨୧୫ଟି ସତ ବୋଲି ସ୍ବୀକାର କରାଯାଇଛି। ଏହା ମଧ୍ୟରୁ ୫୪୨ଟି ଅର୍ଥାତ୍‌ ୪୫% ମାମଲାରେ ଚାର୍ଜସିଟ୍‌ ହୋଇଛି। ଦଙ୍ଗା ଘଟଣାରେ ମଧ୍ୟ ୪୩% ମାମଲାରେ ଚାର୍ଜସିଟ୍‌ ହୋଇଛି। ତଥ୍ୟ କହୁଛି, ୨୩୩ କୋଟି ୯୮ ଲକ୍ଷ ଟଙ୍କା ଚୋର ନେଇଯାଇଛନ୍ତି। କିନ୍ତୁ ଉଦ୍ଧାର ପରିମାଣ ମାତ୍ର ୫୧ କୋଟି ୧୮ ଲକ୍ଷ ଟଙ୍କା। ସେହିଭଳି ରାଜ୍ୟରେ ୧୨୩୭୫ ସଡ଼କ ଦୁର୍ଘଟଣା ଘଟିଥିବା ବେଳେ ୫୦% ମାମଲାରେ ଚାର୍ଜସିଟ୍‌ ଦାଖଲ କରାଯାଇଛି। 

ମୋଟ ଆପରାଧିକ ମାମଲା ୨ ଲକ୍ଷ ଟପିଲା
ଚୋର ନେଇଗଲେ ୨୩୩ କୋଟିରୁ ଅଧିକ ଟଙ୍କା
ଚାର୍ଜସିଟ୍‌ ଦେବାରେ ପଛୁଆ ପୁଲିସ ବାବୁ
ସାମାଜିକ ଗଣମାଧ୍ୟମରେ ଶିଶୁଙ୍କ ଅଶ୍ଳୀଳ ଭିଡିଓ ସଂଖ୍ୟା ବଢ଼ୁଛି

ରାଜ୍ୟରେ ମାଓବାଦୀଙ୍କ କାର୍ଯ୍ୟକଳାପ ଉଲ୍ଲେଖନୀୟ ଭାବେ ହ୍ରାସ ପାଇଛି ବୋଲି ଶ୍ବେତପତ୍ରରେ ଦର୍ଶାଯାଇଛି। ୨୦୨୩ରେ ରାଜ୍ୟରେ ମାଓବାଦୀଙ୍କ ଦ୍ବାରା ୯ଟି ଘଟଣା ଘଟିଥିଲା ବେଳେ ୨୦୨୪ରେ ଏହି ସଂଖ୍ୟା ୪ରେ ସୀମିତ ରହିଛି। ୨୦୨୩ରେ ମାଓ ହିଂସାରେ ୩ ଜଣ ସାଧାରଣ ଲୋକ ପ୍ରାଣ ହରାଇଥିଲା ବେଳେ ୨୦୨୪ରେ ଜଣଙ୍କର ପ୍ରାଣ ଯାଇଛି। ସେପଟେ ପୁଲିସର ପାଲଟା କାର୍ଯ୍ୟାନୁଷ୍ଠାନରେ ରାଜ୍ୟରେ ୬ ଜଣ ମାଓବାଦୀ କ୍ୟାଡରଙ୍କର ମୃତ୍ୟୁ ‌ଘଟିଥିଲା। ୮ ଜଣଙ୍କୁ ଗିରଫ କରାଯାଇଥିଲା। ମୋଟ ୨୪ ଜଣ ମାଓବାଦୀ ଆତ୍ମସମର୍ପଣ କରିଥିଲେ। ୨୦୨୪ରେ ବ୍ୟାଙ୍କ ଠକେଇ, ଅନ୍‌ଲାଇନ୍ ଠକେଇ, ଜମିବାଡ଼ି ସଂକ୍ରାନ୍ତୀୟ ଠକେଇ ଚିନ୍ତାଜନକ ରହିଛି। ମୋଟ ୧୦୭୦.୪୬ କୋଟି ଟଙ୍କାର ଠକେଇ ମାମଲାର ତଦନ୍ତ ଭାର ଗ୍ରହଣ କରି ୩୪ ଜଣ ଅପରାଧୀଙ୍କୁ ଧରିଛି ପୁଲିସ। ଓଡ଼ିଶା ସମେତ ମଧ୍ୟପ୍ରଦେଶ, ଆନ୍ଧ୍ରପ୍ରଦେଶ, ଛତିଶଗଡ଼, ମୁମ୍ବାଇ, ରାଜସ୍ଥାନ, ଉତ୍ତରପ୍ରଦେଶ ଓ ପଶ୍ଚିମବଙ୍ଗରୁ ଅପରାଧୀଙ୍କୁ ଗିରଫ କରାଯାଇଛି। ଏହିସବୁ ମାମଲାର ଚେର ଚୀନ୍, ହଂକଂ, ଥାଇଲାଣ୍ଡ୍‌, ମାଲେସିଆ, ସିଙ୍ଗାପୁର, ନେପାଳ ଓ ଶ୍ରୀଲଙ୍କା ପର୍ଯ୍ୟନ୍ତ ଲମ୍ବିଛି। ୨୦୨୪‌ରେ ବିଭିନ୍ନ ସମୟରେ ପୁଲିସ ପକ୍ଷରୁ ୧୪ ଥର ଗୁଳିଚାଳନା କରାଯାଇଛି ବୋଲି ଶ୍ବେତପତ୍ରରେ ଉଲ୍ଲେଖ ଅଛି। 

ସାମାଜିକ ଗଣମାଧ୍ୟମରେ ଶିଶୁଙ୍କ ଅଶ୍ଳୀଳ ଭିଡିଓ ଭାଇରାଲ୍ ସଂଖ୍ୟା ଦିନକୁ ଦିନ ବଢ଼ିବାରେ ଲାଗିଛି। ଏହି ଭାଇରାଲ୍ ଭିଡିଓ ପାଇଁ ଅଧିକାଂଶ ସମୟରେ ପୀଡ଼ିତା ଆତ୍ମହତ୍ୟା କରୁଥିବା ଭଳି ଅଭିଯୋଗ ହେଉଥିଲେ ହେଁ ଏହା ଉପରେ ରୋକ୍ ଲଗାଯାଇପାରୁନି। ୨୦୨୩ ତୁଳନାରେ ୨୦୨୪ରେ ପ୍ରାୟ ଦୁଇ ଗୁଣା ଭିଡିଓ ଭାଇରାଲ୍ ହୋଇଥିବା ନେଇ ମାମଲା ଆସିଛି। କିନ୍ତୁ ସମସ୍ତଙ୍କୁ ଏପର୍ଯ୍ୟନ୍ତ ନ୍ୟାୟ ମିଳିପାରିନି। ୨୦୨୪ ମସିହାରେ ସାମାଜିକ ଗଣମାଧ୍ୟମ ପ୍ଲାଟଫର୍ମରେ ଶିଶୁ ଅଶ୍ଳୀଳତା, ଦୁଷ୍କର୍ମ ଓ ଗଣଦୁଷ୍କର୍ମ ସମ୍ବନ୍ଧୀୟ ସାମଗ୍ରୀ ଅପଲୋଡ୍ ସଂଖ୍ୟା ବଢ଼ିଛି। ୨୦୨୪ରେ ଏହି ଭଳି ଭିଡିଓ ଅପେଲାଡ୍ ନେଇ ୧୦୨୩ଟି ଅଭିଯୋଗ ଆସିଥିବାବେଳେ ସେଥିରୁ ୯୪୨ଟି ଅଭିଯୋଗର ତଦନ୍ତ ଶେଷ ହୋଇଛି। ଯେତେବେଳେ କି ୨୦୨୩ରେ ୫୬୯ଟି ଭିଡିଓ ଅପଲୋଡ୍ ମାମଲା ରୁଜୁ ହୋଇଥିବାବେଳେ ୫୫୦ଟିର ତଦନ୍ତ ଶେଷ ହୋଇଛି, ୨୦୨୨ରେ ୬୧୯ଟି ମାମଲା ହୋଇଥିବାବେଳେ ୪୦୫ଟି, ୨୦୨୧ରେ ୫୧୨ଟି ମାମଲା ହୋଇଥିବାବେଳେ ସମସ୍ତ ୫୧୨ଟି, ୨୦୨୦ରେ ୩୧୦ଟି ମାମଲା ହୋଇଥିବାବେଳେ ସମସ୍ତ ୩୧୦ଟି ଯାକ ମାମଲାର ତଦନ୍ତ ଶେଷ ହୋଇଛି।  ଏହିପରି ଗତ ୫ବର୍ଷରେ ୩୦୩୩ଟି ମାମଲା ରୁଜୁ ହୋଇଥିବାବେଳେ ୨୭୧୯ଟି ମାମଲାର ତଦନ୍ତ ଶେଷ ହୋଇଛି।  ସେହିପରି ୨୦୨୪ରେ ଜାତୀୟ ଅପରାଧ ନଥିପତ୍ର ସଂସ୍ଥାରୁ ୪୨ଟି ଅଭିଯୋଗ ଗ୍ରହଣ କରାଯାଇଥିବାବେଳେ ୨୮ଟିର ତଦନ୍ତ ସରିଛି।