ଗଜପତିରେ ତିନି ମନ୍ତ୍ରୀଙ୍କ ସମୀକ୍ଷା : ଯୁଦ୍ଧକାଳୀନ ଭିତ୍ତିରେ ପୁନଃନିର୍ମାଣ କାମ ଆରମ୍ଭ
୨୪ ଘଣ୍ଟା ମଧ୍ୟରେ ଦୂର ହେବ ବିଦ୍ୟୁତ ଓ ପାନୀୟ ଜଳ ସମସ୍ୟା
ପାରଳାଖେମୁଣ୍ତି : ତିତଲି ବାତ୍ୟାର ତାଣ୍ଡବରେ ଗଜପତି ଜିଲ୍ଲାରେ ବ୍ୟାପକ କ୍ଷୟକ୍ଷତି ହୋଇଛି। ଏହାର ଆକଳନ କରିବା ପାଇଁ ଆଜି ଏଠାରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ବୈଠକରେ ମନ୍ତ୍ରୀସ୍ତରୀୟ କମିଟିର ୩ ଜଣ ସଦସ୍ୟ ମହେଶ୍ବର ମହାନ୍ତି, ନିରଞ୍ଜନ ପୂଜାରୀ, ସୁଶାନ୍ତ ସି˚ ଯୋଗ ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ଜିଲ୍ଲାରେ କେତେକ’ଣ କ୍ଷୟକ୍ଷତି ହୋଇଛି ସମୀକ୍ଷା ବୈଠକରେ ତାହାର ଆକଳନ କରାଯାଇଥିଲା। ବୈଠକରୁ ଜଣାପଡ଼ିଛି ଯେ, ଜିଲ୍ଲାେର ୫ ହଜାର ବିଦ୍ୟୁତ ଖୁଣ୍ଟ ଭାଙ୍ଗିଛି । ୩୩ କେଭିର ୧୪ଟି ଗ୍ରୀଡ କ୍ଷତିଗ୍ରସ୍ତ ହୋଇଛି । ଏଣୁ, ଜିଲ୍ଲା ପାଇଁ ଏକ ବଡ଼ ସମସ୍ୟା ଭାବେ ମୁଣ୍ତ ଟେକିଛି । ଏହାକୁ ସୁଧାରିବା ପାଇଁ ରାଜ୍ୟ ସରକାର ପୁରା ଦମରେ ଲାଗି ପଡ଼ିଛନ୍ତି । ବିଶେଷକରି ପାରଳାଖେମୁଣ୍ତି ସହରରେ ଆଜି ସନ୍ଧ୍ୟା ସୁଦ୍ଧା ୬୦ ହଜାର ପରିବାରକୁ ବିଦ୍ୟୁତ ସେବା ଯୋଗାଇବା ପାଇଁ ପ୍ରଚେଷ୍ଟା ଚାଲିଛି। ଏଥିପାଇଁ ୧୫୦ କର୍ମଚାରୀ ଓ ବାହାରୁ ଆସିଥିବା ୨୦୦ କର୍ମଚାରୀ ସମୁଦାୟ ୩୫୦ କର୍ମଚାରୀ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ ଜାରି ରଖିଛନ୍ତି।
ଆସନ୍ତାକାଲି, ଆଉ ୩୦୦ କର୍ମଚାରୀ ବାହାର ଜିଲ୍ଲାରୁ ଆସି କାର୍ଯ୍ୟରେ ଯୋଗ ଦେବେ । ପ୍ରଥମ ପର୍ଯ୍ୟାୟରେ ପାରଳାଖେମୁଣ୍ତି ସହରକୁ ବିଦ୍ୟୁତ ସେବା ଆରମ୍ଭ କରିବା ପରେ ପରବର୍ତ୍ତୀ ସମୟରେ ଜିଲ୍ଲାର ସମସ୍ତ ଜାଗାରେ କାର୍ଯ୍ୟ ଆରମ୍ଭ କରିବେ କର୍ମଚାରୀମାନେ । ଜିଲ୍ଲାର ସମସ୍ତ ବ୍ଲକରେ ପ୍ରତ୍ୟେକ ଦିନ ୧୦ ହଜାର ପରିବାରଙ୍କୁ ବିଦ୍ୟୁତ ସେବା ଯୋଗାଇ ଦେବା ପାଇଁ ବିଦ୍ୟୁତ ବିଭାଗର କର୍ମଚାରୀ କାର୍ଯ୍ୟ ଜାରି ରଖିବେ ବୋଲି ବୈଠକରୁ ଜଣାପଡ଼ିଛି।
ଅନ୍ୟମାନଙ୍କ ମଧ୍ୟରେ, ଯୋଜନା ବୋର୍ଡର ସଦସ୍ୟ ରାମଚନ୍ଦ୍ର ପଣ୍ତା, ସା˚ସଦ ସିଦ୍ଧାନ୍ତ ମହାପାତ୍ର, ଆର.ଡି.ସି ଆପାଙ୍ଗ ଆଓ, ଜିଲ୍ଲା ଦାୟିତ୍ବରେ ଥିବା ବିଧାୟକ ଡ.ପ୍ରଦୀପ ପାଣିଗ୍ରାହୀ, ପାରଳାଖେମୁଣ୍ତି ବିଧାୟକ କେ ସୂରିଆ ରାଓ , ମୋହନା ବିଧାୟିକା ବାସନ୍ତୀ ମଲିକ, ଜିଲ୍ଲାପାଳ ଅନୁପମ ସାହା ପ୍ରମୁଖ ବୈଠକରେ ଉପସ୍ଥିତ ଥିଲେ।