ପୁରୀ : ଶ୍ରୀମନ୍ଦିରରେ ପବିତ୍ର ଦାବାଗ୍ନି ଲୀଳା ଅନୁଷ୍ଠିତ ହୋଇଛି। ଜନ୍ମାଷ୍ଟମୀ ପରଠୁ ଶ୍ରୀମନ୍ଦିରରେ ଚାଲି ଆସୁଥିବା ଶ୍ରୀକୃଷ୍ଣ ଲୀଳା କ୍ରମରେ ଆଜି ସନ୍ଧ୍ୟା ଧୂପ ପରେ ନାଟ ମଣ୍ଡପରେ ଖଟ ଓ ଶେଜ ପଡ଼ିଥିଲା। ମହାଜନ ସେବକଙ୍କ ଦ୍ବାରା ରାମକୃଷ୍ଣ ଆଜ୍ଞାମାଳ ପାଇ ଦକ୍ଷିଣି ଘରୁ ରତ୍ନ ସିଂହାସନରୁ ନାଟମଣ୍ଡପକୁ ବିଜେ କରିଥିଲେ। ସେଠାରେ ଧୂପ ଦୀପ ନୈବେଦ୍ୟ ପରେ ମାଟିମଣ୍ଡପସାହି ଉତ୍ତରକାଳୀ ଆଖଡ଼ାରୁ ଦାବାଗ୍ନି ରାକ୍ଷସ ନୀତି ପ୍ରସ୍ତାବ ରହିଥିଲା। ରାକ୍ଷସ, ଶ୍ରୀକୃଷ୍ଣ, ଶ୍ରୀବଳରାମ ନାଟମଣ୍ଡପରେ ଅପେକ୍ଷା କରି ରହିଥିଲେ। ପ୍ରଭୁଙ୍କ ଆଜ୍ଞା ମାଳ ପାଇ ଦାବାଗ୍ନି ରାକ୍ଷସ କୃଷ୍ଣ ବଳରାମାଙ୍କ ସହ ଯୁଦ୍ଧ କରିଥିଲେ। ଶେଷରେ ଯୁଦ୍ଧରେ ଦାବାଗ୍ନି ରାକ୍ଷସ ପରାସ୍ତ ହୋଇଥିଲେ। ଶ୍ରୀମନ୍ଦିର ପକ୍ଷରୁ ମାଟିମଣ୍ଡପସାହି ଆଖଡ଼ାକୁ ପ୍ରଭୁଙ୍କ ଶ୍ରୀମହାପ୍ରସାଦ ଟାକୁଆ କ୍ଷୀରି ଓ ରେଖା ସୁନ୍ଦରୀ ଦିଆଯାଇଥିଲା। ରାକ୍ଷସ ବେଶରେ ରବୀନ୍ଦ୍ର, ଶ୍ରୀକୃଷ୍ଣ ବେଶରେ ସୌରଭ ମହାପାତ୍ର ଓ ବଳରାମ ବେଶରେ ବାସୁଦେବ ପାଢ଼ୀ ଭୂମିକା ତୁଲାଇଥିଲେ।